Şuşanın yaxınlığında yerləşən Kiçik Qaladərəsi kəndində, Azərbaycanın Qarabağ bölgəsində Rusiya sülhməramlılarının müvəqqəti dislokasiya zonasında ermənilər Azərbaycana məxsus yük avtomobilinin hərəkətinə maneə yaradıblar.
Belə bir hadisə ilk dəfə baş vermir. Qarabağda rus sülhməramlılarının nəzarətində olan ərazilərdə dəfələrlə vətəndaşlarımıza, maşın karvanlarımızın sürücülərinə qarşı hörmətsizlik edilib.
Sülhməramlıların ermənilərin törətdiyi təxribatlara göz yumması qəbuledilməzdir və Qarabağdakı təxribatçı, cinayətkar ünsürlər ölkəmizin qanunvericiliyinə əsasən cəzalandırılmalıdır. Bəzi ekspertlər hesab edir ki, Azərbaycan Müdafiə Nazirliyi baş verən hadisəni sülhməramlıların komandanlığı ilə müzakirə etməlidir. Görünür, rus sülhməramlıları şanlı Ordumuzun Fərruxdakı kimi orada da bayrağımızı dalğalandırmasını istəyirlər. Əgər oradakı ermənilərə gücləri çatmırsa, qoy bu işi bizim ordumuzun ixtiyarına buraxsınlar. Ermənilərin etdikləri birbaşa Azərbaycanın dövlət strukturlarının fəaliyyətinə mane olmaqdır. Ona görə sözügedən ermənilərin kimlikləri haqqında məlumat əldə edilməli və onlar dərhal həbs edilməlidir.
“Tərxis Olunmuş Hərbçilərin Gəncləri Maarifləndirmə” İctimai Birliyinin sədri, hərbi ekspert Emin Həsənli “Bakı-Xəbər”ə açıqlamasında bildirdi ki, ermənilər Rusiya, Azərbaycan və Ermənistan dövlət rəhbərlərinin 10 noyabr 2020-ci il və 11 yanvar 2021-ci il bəyanatlarına əməl etmirlər: “Təəssüflər olsun ki, bölgədəki Rusiya sülhməramlıları da belə hallara göz yumur. Ermənistan bilməlidir ki, belə təxribatlarla nəyəsə nail ola bilməyəcəklər. Ya münasibətləri normallaşdırıb, ərazi bütövlümüzü tanıyaraq normal bir dövlət kimi yaşayacaq, ya da Ermənistana bu dəfəki “dəmir yumruq” çox pis dəyəcək. Bunun üçün Ermənistan bizim irəli sürdüyümüz 5 şərti qəbul etməlidir. Ermənistana 44 günlük müharibənin nəticələrini aradan qaldırmağa hələ 20-30 il zaman lazımdır. Bu ölkə Rusiyadan aldığı silahların kredit pulunu hələ ödəməyib. Rusiya üçün də indiki situasiyada sülhməramlı missiya son şansdır. Bütün dünyaya normal ölkə olduğunu göstərməlidir. Bununla Ukraynada zədələdiyi imicini bərpa edə bilər. Bundan əvvəlki sülhməramlı missiyaların heç birində normal nəticə ortaya qoymayıb. Azərbaycan Rusiyaya qarşı heç vaxt pis addım atmayıb. Bizim aramızda müttəfiqlik münasibətləri var. Rusiya bunları nəzərə alıb, normal fəaliyyət ortaya qoymalıdır. Bundan əvvəl bir erməni bizim posta qumbara atdı. Dedilər ki, dəlidir. Niyə həmin adamı bizə təhvil vermədilər? Bu məsələlər belə davam edə bilməz. Hazırda nə 1920, nə də 1990-cı illər deyil. İndi yeni reallıqlar var. Ermənistan buna əməl etməlidir. Rusiya öz sülhməramlı missiyası ilə buna nəzarəti həyata keçirməlidir. Bizim bir xüsusi təyinatlı taborumuz yetərlidir ki, həmin ərazilərdə antiterror əməliyyatları həyata keçirək”.
Məhəmmədəli QƏRİBLİ
