Azərbaycana qarşı qara piar aparan və mütəmadi olaraq Qarabağdakı separatçıları reklam edən Rusiyanın “RİA Novosti” agentliyinə giriş Azərbaycan ərazisində məhdudlaşdırılıb. Azərbaycan rəsmi olaraq “RİA Novosti”ni bloklayıb. Bunun ardınca “Sputnik” də bloklana, “Sputnik Azərbaycan” ölkədən çıxarıla, onun fəaliyyətinə son qoyulması gözlənilə bilərmi?
Qeyd edək ki, bəzi ekspertlər hesab edirlər ki, sözügedən media qurumu ilə bağlı da analoji qərarın verilməsi gözləniləndir.
“Bu məsələ, əlbəttə ki, Sputnik-Azərbaycana da aiddir”
“Azərbaycan hüquqi-demokratik dövlətdir. Lakin bununla yanaşı, həmçinin informasiya təhlükəsizliyini təmin edən bir ölkə olaraq dünyada öz sözünü deyir. Əbəs deyil ki, məhz bunun nəticəsi olaraq Azərbaycan sabit ölkə olaraq inkişaf yolunu tutub, eyni zamanda etibarlı qonşu kimi istər regional, istərsə də dünyəvi siyasi arenada nüfuz qazanmışdır”. Bu fikirləri “SƏS” qəzetinin baş redaktoru, siyasi ekspert Bəhruz Quliyev mövzu ilə bağlı “Bakı-Xəbər”ə şərhində deyib.
Onun sözlərinə görə, ancaq daha bir mühüm aspekt həm də ondan ibarətdir ki, ölkəmiz müstəqil siyasət aparmaqla və öz təhlükəsizliyini təmin etməsi yönündə nə vaxt hansı addım atacağını müəyyən edir: “Xüsusilə informasiya sahəsində təhlükəsizlik amili daim diqqətdə saxlanılır. Beləliklə, ölkəmiz necə xarici siyasətində milli maraqları əsas götürməsi ilə öz sözünü deyirsə, informasiya məkanında da bu maraqları əsas götürür. Əbəs deyil ki, Prezident İlham Əliyev dəfələrlə öz çıxışlarında milli maraqların əsas götürüldüyünü vurğulayır və bu siyasət əsas faktor kimi ön götürülüb”.
B.Quliyevin sözlərinə görə, beləliklə, hər hansı informasiya agentliyi Azərbaycanın əleyhinə əsassız fikirlər formalaşdırırsa, bu zaman dərhal ölçü götürülür və müvafiq addımlar atılır. Siyasi ekspertə görə, biz bunu Rusiyanın RİA Novosti saytında ölkəmizin suverenliyinə və ərazi bütövlüyünə qarşı gedən qəbulolunmaz, təxribatçı informasiyanın ictimailəşdirilməsindən sonra gördük: “Qeyd edim ki, bu, adıçəkilən agentliyin ilk təxribatı deyildi və təəssüf doğuran məsələ də budur ki, Azərbaycan Rusiya ilə müttəfiqlik səviyyəsində əlaqələr qurub və müttəfiq ölkənin hakimiyyət dairələrinə yaxın olan informasiya resursunun belə bir əmələ yol verməsi, əlbəttə ki, qəbuledilməz bir məsələdir. Və söz yox ki, burada Azərbaycanın dövlət təhlükəsizliyinə qarşı sifarişlərin həyata keçirildiyi məlum olur, hesab edirəm ki, məhz həmin məsələ araşdırılaraq günahkarlar layiqli cəzalarına çatdırılacaqlar”.
Bəhruz Quliyev bildirib ki, biz Sputnik-Azərbaycan informasiya resursunun da zaman-zaman bəlli informasiyaları yaymasının müşahidə edildiyini deyə bilərik: “Təbii ki, Azərbaycan dövləti belə olan halda öz təhlükəsizliyini təmin etməsi üçün bütün mümkün və zəruri addımlarını atır, bundan sonra da atacaq. Bəlkə də bundan istifadə edən qonşu ölkənin bəzi qaragüruhçuları atılan addımı söz və mətbuatın boğulması kimi qələmə verəcəklər, amma biz onu da unutmamışıq ki, məhz Rusiyanın özündə Azərbaycanın dörd rusdilli informasiya agentliyinin fəaliyyətinə blok qoyulub.
Azərbaycana gəldikdə isə, ölkəmizdə söz və ifadə azadlığı mövcuddur və haqqında bəhs etdiyimiz məsələnin bu amilə ümumiyyətlə aidiyyəti yoxdur. Yəni bu, bilavasitə Azərbaycanın milli dövlətçilik maraqlarının təmin olunmasıdır və qarşıda təkrar təxribatçı, sifarişli əməllərə yol verilərsə, inandırım ki, Azərbaycan dövləti dərhal zəruri qərarlarını verəcək, zərərli tendensiyarın qarşısı alınır və alınacaq. Bu məsələ, əlbəttə ki, Sputnik-Azərbaycana da aiddir”.
İradə SARIYEVA
