Son məlumatlara görə, Türkiyə ordusu Suriyanın şimalında genişmiqyaslı antiterror əməliyyatlarına start verib.
İlk olaraq, sərhəddə yerləşən Ayn əl Ərəb bölgəsini terrorçulardan təmizləyəcəyi bildirilir. Növbəti hədəf isə Tel Rifat bölgəsi olacaq. PKK/PYD terror qruplaşmasının liderləri isə Türkiyənin bu dəfə daha qətiyyətli davranacağından artıq narahat olmağa başlayıblar. Onlar öz beynəlxalq himayədarlarına müraciət edərək, Türkiyənin dayandırılmasını istəyirlər.
Təbii ki, PKK/PYD-nin himayədarları rəsmi Ankaranı antiterror əməliyyatlarından çəkindirmək üçün əlindən gələn hər şeyi edir. Ağ Evdən verilən son açıqlamada PYD-nin ABŞ-ın bölgədə strateji tərəfdaşı olduğu bildirilir. ABŞ-ın Türkiyənin antiterror əməliyyatlarına qarşı olduğu vurğulanır və rəsmi Ankara bu plandan imtina etməyə çağırılır. Ən maraqlısı Rusiyanın davranışı oldu. Rusiya, nə qədər qəribə də olsa, Türkiyənin antiterror əməliyyatlarını Suriyanın ərazi bütövlüyünə və suverenliyinə qarşı atılmış addım kimi dəyərləndirir. Həmçinin bildirir ki, Rusiyanın bu addımından sonra bölgədəki terrorçular daha da fəallaşıb. Kreml unudur ki, Rusiya heç bir ciddi səbəb olmadan Ukrayna ərazilərini işğal edib. Və indi Rusiyanın başqa bir dövlətlə bağlı ərazi bütövlüyü mövzusunu gündəmə gətirməsi ən azından məntiqsizdir.
Türkiyə prezidenti Rəcəb Tayyib Ərdoğan vurğulayıb ki, antiterror əməliyyatı mütləq davam edəcək : "Türkiyə sərhədlərin boyunca 30 kilometrlik təhlükəsizlik zonasının yaradılmasında növbəti faza başlayır. Biz Tel Rifat və Membiçi terrorçulardan təmizləyəcəyik. Buna əngəl olmaq istəyənlərin nə edə biləcəklərini də görəcəyik".
Maraqlıdır ki, Rusiya tədricən Liviya və Suriyadan öz hərbi kontingentini çıxartmaq qərarı verib. Artıq bu prosesə start verildiyi də məlumdur. Ancaq Rusiya tərk etdiyi bölgələrə nəzarəti ABŞ və Qərbin ixtiyarına buraxmaqda da maraqlı deyil. Belə olan təqdirdə Rusiyanın Türkiyənin fəallığına etirazı başa düşülmür. Türkiyənin Suriyanın şimalında yeni antiterror əməliyyatına hazırlığı ilə bağlı Moskvanın rəsmi reaksiyasına diqqət edək. Rusiya Xarici İşlər Nazirliyinin sözçüsü Mariya Zaxarova açıqlamasında bildirib ki, Ankara Suriyada onsuz da narahat olan vəziyyətin təhlükəli şəkildə pisləşməsinə səbəb ola biləcək hərəkətlərdən çəkinməlidir: “Eyni zamanda, Suriyanın sərhəd bölgələrindən Ankaranın Türkiyənin milli təhlükəsizliyi üçün yaranan narahatlığını anlayırıq”.
Onun iddiasına görə, Suriyanın qanuni hökumətinin razılığı olmadan atılacaq belə bir addım bu ölkənin suverenliyi və ərazi bütövlüyünün birbaşa pozulması olacaq və bu, ölkədə gərginliyi daha da artıracaq
Kremlin məlum etirazlarına baxmayaraq, Rusiyanın Türkiyəyə qarşı hər hansı yolverilməz addımlar atması inandırıcı təsir bağışlamır. O halda Rusiyanın Türkiyəyə yönəlik bu eyhamını necə dəyərləndirmək olar?
Politoloq Qabil Hüseynli “Bakı-Xəbər”ə açıqlamasında bildirdi ki, YPG və PKK terror təşkilatı Suriyanın şimalındakı təhlükəsiz bölgələrə hücumlarında baza olaraq istifadə etdiyi Tel Rıfat və Membiç rayonlarını bölgə xalqına təzyiq edərək 6 ildir işğal edib:
“Türkiyə Silahlı Qüvvələrinin həyata keçirdiyi “Fərat Qalxanı”, “Zeytun Budağı”, “Barış Pınarı” və “Bahar Qalxanı” əməliyyatları terror təşkilatı və tərəfdarlarının Suriyanın şimalında qurmağa çalışdığı “terror dəhlizi”nə sədd qoyub.
Hələbin Tel Rıfat rayonu 2016-cı ilin fevralında Rusiyanın hava dəstəyi ilə YPG və PKK terrorçularının əlinə keçib. Rayonun əhali strukturunu dəyişdirən YPG və PKK bu yolla Tel Rıfatı işğal edərkən təxminən 250 min mülki ərəbi köç etməyə məcbur edib. Tel Rıfatdan didərgin düşmüş insanlar Türkiyə sərhədinə yaxın ərazilərə sığınıblar.
Terror təşkilatı 2016-cı ilin əvvəlində Rusiyanın hava dəstəyi ilə o dövrdə işğal etdiyi Afrindən hücumlar həyata keçirərək Tel Rıfatı işğal edib. Rayonun işğalında Rusiyanın dəstəyini alan təşkilat ABŞ qüvvələrinin dəstəyi ilə Membiçi işğal edib.
2019-cu ildə Suriyanın şimalında başladılan "Barış Pınarı" əməliyyatı zamanı Türkiyə ABŞ və Rusiya ilə ayrı-ayrı razılaşmalar əldə edib.
YPG və PKK-ya bu razılaşmalara uyğun olaraq Türkiyə sərhədinin 30 kilometr dərinliyindəki ərazidən çəkiləcəyini vəd edən ABŞ və Rusiya 2,5 ildən sonra belə vədlərini yerinə yetirməyib.
Rusiya, həmçinin, 2019-cu ilin oktyabrında "Barış Pınarı" əməliyyatı zamanı Türkiyə ilə əldə etdiyi razılaşma ilə terror təşkilatını bütün elementləri ilə Tel Rıfat və Membiçdən çıxarmağı öhdəsinə götürüb.
Moskva Suriyada verdiyi bu vədlərin heç birini yerinə yetirməyib.
Hazırda terror təşkilatı YPG və PKK, sözügedən razılaşmalara baxmayaraq, müəyyən edilmiş sərhədlərdən və bölgələrdən çəkilməyərək işğalını davam etdirir.
Bu baxımdan da, Rusiyanın bu eyhamı nəyisə dəyişən deyil. Çünki Ankara əməliyyatı başlamaq üçün olduqca uğurlu zaman seçib. Rusiyanın əsas diqqətinin Ukraynaya yönəldiyi bir zamanda Türkiyə öz sərhədlərinin təhlükəsizliyini heç bir maneə olmadan təmin edə biləcək”.
Məhəmmədəli QƏRİBLİ
