“Green card” - ABŞ-da yaşamağa və işləməyə icazə olmaqla okeanın o tayına köçməyin ən asan və sərfəli variantıdır. Digər variantlar böyük investisiya yatırımları və əlavə tələblər qarşılığında mümkündür və onunla müqayisədə lotereya ABŞ-a köçmək üçün əsl fürsətdir.
Qeyd edək ki, “Green card” proqramına ildə cəmi bir dəfə müraciət etmək mümkündür. Bu kartı qazanan şəxs qanuni şəkildə ABŞ-da yaşamaq, işləmək, oxumaq və daimi vizasız rejimdə girib-çıxmaq hüququna malik olur.
Onu da bildirək ki, Amerikada yaşamaq üçün “Green card”a müraciət edənlər arasında Azərbaycan vətəndaşları üstünlük təşkil edir.
Məlumat üçün vurğulayaq ki, ötən il ABŞ-da yaşamaq üçün 90 min Azərbaycan vətəndaşı müraciət edib. Müraciət edənlərin çoxu 1990-cı illərdə doğulmuş şəxslərdirlər. Ən cavan “Green card” qalibinin 17 yaşı var.
Maraqlıdır, təbii resurslarla zəngin və müharibədən qalib çıxan bir ölkənin insanı niyə Azərbaycandan getmək üçün yollar axtarır? Gənclər niyə Amerikaya maraq göstərir?
Natiq Cəfərli: “Ölkədə biznes mühitinin yaxşı olması, elmi potensialın açılması üçün imkanların olması vacibdir, belə olduqda…”
İqtisadçı-ekspert Natiq Cəfərli bildirdi ki, gənc nəslin təhsil və ya iş yerləri ilə bağlı ölkədən köçmək üçün axtardığı imkanlar çoxdan başlayan bir trenddir: “Təəssüf ki, bu tendensiya bu gün də davam edir. Ölkədə özünü realizə etmək üçün imkanların məhdud olduğunu hiss edən gənclik, əsasən də təhsilli insanlar ölkədən çıxmağa cəhd edirlər. Bu, təəssüf doğurur. Çünki Azərbaycanın intellektual potensialını, iş gücünü azaldan faktorlardan biridir. Bunlar hökumətin düşünməsi üçün kifayət qədər əsaslar yaradır. Ölkədə biznes mühitinin yaxşı olması, elmi potensialın açılması üçün imkanların olması vacibdir. Belə olduqda gənclər öz gələcəklərini Azərbaycanla asossiasiya edəcək. Ona görə də hökumət bu haqda tədbirlər görməlidir. Bunun əsas istiqamətləri elm və biznes azadlıqlarının genişləndirilməsi, rəqabətli mühitin yaradılmasıdır. Bütün bunlar vətəndaşları və gəlcəklərini ölkəyə bağlayan ciddi faktora çevrilə bilər. Təəssüf ki, bununla bağlı ciddi problemlər var”.
Aytəkin Kamranqızı: “Ölkəni tərk edib başqa yerdə yaşamaq onu deməyə əsas vermir ki, burada yaşayış üçün normal şərait yoxdur”
Sosioloq Aytəkin Kamranqızı bildirdi ki, ölkəni tərk edib başqa yerdə yaşamaq onu deməyə əsas vermir ki, burada yaşayış üçün normal şərait yoxdur: “Doğrudur, Azərbaycandan xarici ölkələrə gedənlər çoxdur, amma nəzərə almaq lazımdır ki, bizim ölkəyə üz tutanlar da az deyil. Ölkəmizdə yaşayış üçün münbit şərait yaradılıb. Ola bilər ki, gənclər xarici ölkələrə əsasən təhsil almaq, nisbətən də işləmək üçün gedirlər. Azərbaycanda elə orta yaşlı təqaüdçü ingilislər var ki, qiymətlər, xüsusilə də ərzaq məhsulları daha ucuz olduğu üçün ölkəmizdə yaşamağı seçiblər. Bu proses dünyanın hər yerində gedir, insanlara necə xoşdursa, elə də yaşayırlar. Sevindirici haldır ki, belə şərait yaranıb, yəni, insanlar istədikləri ölkədə rahat yaşayışlarını təmin edə bilirlər”.
Günel CƏLİLOVA
