İsrail Prezidenti İsxak Hersoq Prezident İlham Əliyevə təbrik məktubu ünvanlayıb.
Azərbaycanın Müstəqillik Günü münasibətilə İsrail dövləti və xalqı adından təbriklərini bildirən İsxak Hersoq məktubda bir sıra məqamlara toxunub. Bununla yanaşı təbrik məktubunda belə bir məqam var: “Ötən həftə baş tutan səmimi və səmərəli söhbətimizdən çox sevindim. Bu cür təmaslar əlaqələrimizin sıx olduğunu və inkişaf etdiyini göstərir. Fürsətdən istifadə edərək, müzakirələrimizi davam etdirmək üçün Sizi rəsmi olaraq İsrailə səfərə dəvət etmək istərdim. Sizi İsraildə qəbul etmək əsl şərəf olardı. Ümid edirəm ki, belə bir səfər İsraildə səfirliyinizin açılması üçün də bir fürsət ola bilər.
Ölkələrimiz xalqlarımız arasında sıx əlaqələrə əsaslanan tarixi tellərə malikdir. Azərbaycan sabitlik adasıdır və əsrlər boyu yəhudi xalqı üçün isti, qonaqpərvər və təhlükəsiz bir ev olmuşdur. Burada, İsraildə Azərbaycan əsilli vətəndaşlar cəmiyyətimizə böyük töhfələr verirlər və onlar milli rəngarəngliyimizin mühüm hissəsidir. Bu iki icma xalqlarımız arasında canlı körpü rolunu oynayır, ikitərəfli əlaqələrimizi daha da gücləndirir.
Müstəqillik Günü münasibətilə Sizə bir daha təbriklərimi çatdırıram. Xalqlarımızın qeyd edəcəkləri əlamətdar günlərin yaradacağı fürsətləri səbirsizliklə gözləyirəm”.
İsrail prezidentinin İlham Əliyevi rəsmi səfərə dəvət etməsinə və səfirliyin açılmasını arzulamasına diqqəti yönəltməsi maraq doğurur.
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustapayevin fikrincə, İsrail kimi dövlətin prezidentinin sadalanan məsələlərə toxunması önəmli əhəmiyyət kəsb edir: “Məsələ ondadır ki, İsrail dünyada kifayət qədər çəkisi, nüfuzu olan bir dövlətdir. Üstəlik dünyada yəhudi lobbisinin beynəlxalq münasibətlərə təsir imkanları kifayət qədər böyükdür. O üzdən, belə bir ölkə ilə daha sıx əlaqələr qurulmalıdır. Biz nəzərə almalıyıq ki, İsrail kimi dövlət Azərbaycanla əlaqələrə, münasibətlərə xüsusi önəm verir. Azərbaycan müstəqillik əldə edəndən sonra hər zaman bizə dəstək olublar. Azərbaycan xarici siyasətində Ermənistan xaric digər dövlətlərin demək olar hamısı ilə dost münasibətlərə malikdir. O üzdən, Azərbaycan İsraillə olan əlaqələri daha da genişləndirməlidir. Bunun üçün də İsraildə səfirliyimizin açılması vacibdir. Fələstin məsələsi ilə əlaqədar bəzi müsəlman ölkələri İsraillə ya diplomatik münasibət qurmurlar, ya da orada səfirliklərini açmırlar. Ancaq reallıq ondan ibarətdir ki, görünməyən səviyyədə müsəlman ölkələrin İsraillə əməkdaşlığı da var, münasibəti də. Bu baxımdan hesab edirəm ki, sözügedən məsələlərdə biz Azərbaycanın maraqlarından çıxış etməliyik. Azərbaycanın regionda mövqeyinin güclənməsində, nüfuzunun artmasında, hansı münasibətlər və xarici əlaqələr faydalıdırsa, onları da reallaşdırmalıyıq. Bu baxımdan hesab edirəm ki, Təl-Əvivdə səfirliyimiz fəaliyyətə başlamalıdır. Çünki heç kəsə sirr deyil ki, iki ölkə arasında kifayət qədər yaxın dost münasibətlər var. O baxımdan bizim orada diplomatik korpusumuz olsa yaxşıdır. Onu da qeyd edim ki, İsrailin Azərbaycanla olan münasibətlərə xüsusi önəm verməsi Ermənistanı çox narahat edir. Onlar istəmir ki, Azərbaycanla İsrail arasında yüksək səviyyəli münasibətlər mövcud olsun”.
Vidadi ORDAHALLI
