Ermənistanda revanşist qanada yaxın olan siyasilər hər vasitə ilə Azərbaycanla sülh sazişinin imzalanmasını əngəlləmək istəyirlər. Bu məsələdə əsas tezis ondan ibarətdir ki, hazırkı dövrdə saziş Ermənistanın maraqlarına uyğun deyil. Bir müddət əvvəl Ermənistanın sabiq xarici işlər naziri (1998-2008) Vardan Oskanyan da bənzər çağırış etdi.
Bu arada keçmiş baş nazir Vazgen Manukyan da bəyanatla çıxış edərək belə bir çağırış edib. Manukyan qeyd edib ki, tələsik imzalanan istənilən yekun sənəd indi Ermənistanın ziyanına olacaq. O, bir sıra ölkələri misal gətirərək qeyd edib ki, sülh sazişi olmasa da olar: “Sərhədlərin müəyyən edilməsi, sülh müqaviləsinin imzalanması kimi proseslər bir çox ölkələr arasında onilliklərdir davam edir. Məsələn, Rusiya ilə Yaponiya arasında sülh müqaviləsi hələ də imzalanmayıb. Bir çox başqa ölkələr var ki, sərhədləri dəqiqləşdirilməyib, lakin bu, onların sülh münasibətlərini saxlamasına mane olmur. Bizi həmişə mövqelərimizi yumşaltmağa, qarşı tərəfi isə şərtlərimizi qismən qəbul etməyə çağırıblar. Amma indi situasiya fərqlidir. Başa düşmək lazımdır ki, indiki şəraitdə istənilən konkret sənəd Ermənistanın ziyanına olacaq. İstənilən qeyri-müəyyənlik həm də riskləri ehtiva edir, lakin eyni zamanda gələcək üçün imkanlar yaradır. Ona görə də indi ya danışıqlara getməmək, ya da qarşı tərəfin onları qəbul edib-etməməsindən asılı olmayaraq real milli ilkin şərtlər qoymaq lazımdır”.
Bütün bunlar növbəti pozuculuq cəhdləridir. Görünən odur ki, Manukyan da revanşistlərin mövqeyindən çıxış edərək prosesi yubatmağa çalışır.
“Ermənilər, vaxt gələcək ki, indi bizim təklif etdiyimiz sülh təkliflərinə xəyal kimi baxacaqlar”
Məsələyə münasibət bildirən AMİP sədrinin müavini Afsəddin Nəbiyevin fikrincə, keçmiş hakimiyyəti təmsil edən nümayəndələrin reallığı əks etdirməyən açıqlamaları onların illərlə apardıqları uğursuz siyasətin göstəricisidir: “Vazgen Manukyan kimi düşünənlər bir məsələni dərk edə bilmirlər ki, sülh müqaviləsinin bağlanması hansısa şəxslərin istəyinə bağlı olan məsələ deyil. Bu, bir prosesdir. Elə bir prosesdir ki, bölgədə sülhün, təhlükəsizliyin davamlı təmin olunmasına xidmət etməlidir. Manukyan Rusiya ilə Yaponiya arasında indiyədək sülh müqaviləsinin bağlanmadığını əsas gətirərək Azərbaycanla Ermənistan arasında bağlanacaq sülh müqaviləsi ilə müqayisə aparmaq çox qüsurludur. Əvvəla, Rusiya ilə Yaponiya arasında hər hansı bir formada digərinin ərazi bütövlüyünü tanımamaq kimi bir məsələ yoxdur. Ermənistanın siyasi dairələri ən vacib məsələni bilərəkdən etiraf etmirlər. Baxın, erməni siyasətçiləri dünya mətbuatında çıxışlar edirlər ki, Ermənistan Azərbaycanın ərazi bütövlüyünü 1991-ci ildə tanıyıb. Bu necə tanınma olub ki, dövlətin ərazi bütövlüyünü tanıyıb, sonra həmin dövlətin 20 faizini işğal edib bir milyondan artıq insanı məhrumiyyətə məruz qoyursan? Bax, bu sualın cavabı ermənilər tərəfindən verilə bilmir. Məhz buna görə spekulyativ açıqlamalarla vaxtı uzatmağa çalışırlar. Məsələnin vacib mahiyyəti ondan ibarətdir ki, sülh müqaviləsi indiki durumda daha çox hansı tərəfə lazımdır? Belə bir qədim latın ifadəsi var: "Sülh istəyirsənsə müharibəyə hazır ol". Azərbaycan dövləti və xalqı indiki proseslərə bu prizmadan baxmaqla Müzəffər Ordumuzun peşəkarlığını hər gün artırmağı düşünməlidir. Necə ki, bunu edir. Ermənilər vaxt gələcək ki, indi bizim təklif etdiyimiz sülh təkliflərinə xəyal kimi baxacaqlar. Sülh müqaviləsini ermənilər ləngitməyə çalışsalar, bundan itirən tərəf elə Ermənistanın özü olacaq”.
Bu baxımdan sədr müavini hesab edir ki, Ermənistan tərəfi onlara verilən şansı dəyərləndirməlidir.
Vidadi ORDAHALLI
