İran prezidenti Seyid İbrahim Rəisi Ermənistanın baş naziri Nikol Paşinyanla telefon danışığında bildirib ki, Ermənistanı dost ölkə hesab edir və İrəvanla mehriban qonşuluq münasibətlərinə böyük önəm verir. İran prezidentinin mətbuat xidmətinin məlumatına görə, Rəisi davam edən məsləhətləşmələri iki ölkə arasında dostluq əlaqələrinin dərinliyinin əlaməti adlandırıb.
O qeyd edib ki, İran Ermənistan və Azərbaycan arasında sülh danışıqlarında irəliləyişi dəstəkləyir: “Ümid edirik ki, bu sahədə qalan məsələlər sülh yolu ilə və iki ölkənin suverenliyi və ərazi bütövlüyünə hörmətlə, beynəlxalq hüququn prinsiplərinə uyğun olaraq, həmçinin bütün xalqların hüquq və təhlükəsizliyi nəzərə alınmaqla həll olunacaq. İran İslam Respublikası regionun məsələlərinin bütün region ölkələrinin konsensus və əməkdaşlıq əsasında, ümumi maraqlar və qarşılıqlı hörmət əsasında həll edilməsinə dərindən sadiqdir”.
Rəisi vurğulayıb ki, “Sionist rejim (İsrail - red.) heç bir halda region xalqlarının dostu deyil və bu rejimin Fələstin xalqına etdiyi zülm misilsizdir: "Sionist rejimin regionda təsirinin qarşısını almaq üçün bu rejimin hərəkətlərinə diqqətli və ehtiyatlı yanaşmaq lazımdır”.
Maraqlıdır, İran prezidenti İsraildən Paşinyana niyə şikayətlənir? Bunu Azərbaycanın İsraillə yaxın əməkdaşlığına etiraz edən fikirlər kimi qəbul etmək olarmı?
Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, İranın Ermənistanı dost hesab etməsi təsadüfi deyil: “Bunun səbəblərini biz çox yaxşı bilirik. Çünki İran hesab edir ki, Azərbaycan da onun tərkib hissəsidir. Hətta Ermənistan və Gürcüstanı da öz ərazi vahidi kimi qəbul edir. Ən əsası da, tərkibində olan soydaşlarımızın çoxluğundan ehtiyat etdiyi üçün bizimlə əks qütbdə olan Ermənistanla daha sıx əməkdaşlıq edir. Biz bunu uzun illərdir müşahidə edirik. Hətta müharibə və ondan sonrakı dönəmdə də aydın gördük. Biz mütləq mənada siyasətimizdə bu amili nəzərə almalıyıq. İran istəmir ki, bizimlə Türkiyə arasındakı əlaqələr güclü olsun. Xüsusilə də birbaşa quru əlaqələrimizim bərpasını arzulamır. Buna görə də tez-tez Ermənistanın ərazi bütövlüyü ilə bağlı bəyanatlar verir. Bir qonşu ölkə kimi biz İranla normal münasibıtlərin olmasını istəyirik. İndi də İsraildən Ermənistana şikayət edir. Çünki 44 günlük müharibıdə İsrail birmənalı olaraq bizim yanımızda oldu. Bu eyhamlar bizə yönəlib. İran hər zaman şikayətlənib ki, İsrail Azərbaycan ərazilərindən istifadə etməklə ona qarşı təxribatlar törədir. İran şikayət edir ki, İsrail müsəlmanlara zülm edir. Onda ermənilərə niyə müsəlmanlara divan tutduğuna görə etiraz etmirdi? Ermənilər məscidlərimizə donuz bağlayanda da bir müsəlman ölkəsi olaraq səsini çıxarmadı. Ölkənin milli demokratik qüvvələri İranın bu atmacalarına layiqli cavab verməlidir”.
Məhəmmədəli QƏRİBLİ
