Rusiya Prezidenti Vladimir Putinlə Ermənistan Baş naziri Nikol Paşinyan arasında telefon danışığı olub. Bu barədə Kremlin mətbuat xidmətindən bildirilib.
Qeyd olunub ki, onlar Cənubi Qafqazdakı durumu müzakirə ediblər:
“Azərbaycan, Rusiya və Ermənistan liderləri arasında üçtərəfli sazişlərin icrası müzakirə edilib. Həmçinin regional sabitliyin təmin edilməsi, o cümlədən Cənubi Qafqazda nəqliyyat və logistika infrastrukturunun inkişafı üçün birgə işin intensivləşdirilməsinin vacibliyi vurğulanıb”.
Paşinyan Azərbaycan Prezidenti İlham Əliyev və Avropa İttifaqı Şurasının Prezidenti Şarl Mişel ilə mayın 22-də baş tutan təmaslarından danışıb.
O eyni zamanda bildirib ki, son Brüssel görüşünün nəticələri ilə bağlı cəmiyyətə doğru olmayan məlumatlar verilir.
Bu arada Avropa İttifaqı Şurası Prezidentinin mətbuat katibi Ermənistan və Azərbaycan dövlət başçılarının 22 may Brüssel görüşündən sonra baş verənləri spekulyasiya adlandırıb və bundan təəssüfləndiyini deyib.
Bu barədə Şarl Mişelin mətbuat katibinin yaydığı bəyanatda bildirilir.Tərəflərə çağırış edilir ki, münaqişəyə ilə bağlı terminologiyaya həssas yanaşılsın:
"Prezident Şarl Mişelin liderlərin 22 may görüşünün yekunlarına dair bəyanatı heç bir şəkildə müzakirələrin əvvəlcədən müəyyən edilmiş nəticəsinin təqdiri kimi şərh edilməməlidir. Nəticə etibarilə, ən vacibi odur ki, bütün məsələlər hərtərəfli həll olunsun. Bu bütün əhali qruplarının hüquq və təhlükəsizliyini özündə ehtiva edir. Mayın 22-də Brüsseldə regionun açılması imkanları xüsusilə müzakirə olunub. Bu kontekstdə hər iki tərəf gələcək nəqliyyat infrastrukturu ilə bağlı eksterritorial iddiaların olmamasını təsdiqləyib. Əksinə, spekulyasiyalar təəssüf doğurur”.
Bəyanatda Şarl Mişelin mayın 24-də hər iki ölkənin sərhəd komissiyalarının ilk tarixi iclasını alqışladığı bildirilir:
"Ermənistanla Azərbaycan arasında münasibətlərin davamlı normallaşdırılması üçün həll edilməmiş bütün məsələlərin həlli vacibdir. O cümlədən, gələcək sülh müqaviləsinin irəliləməsi və münaqişənin köklü səbəblərinin aradan qaldırılması da. Şarl Mişelin fikrincə, Dağlıq Qarabağda birinci müharibəyə, eləcə də 2020-ci ildə hərbi əməliyyatların bərpasına gətirib çıxaran bütün əsas problemlər möhkəm və ədalətli sülhə şərait yaratmaq üçün bütün əlaqədar tərəflər vasitəsilə həll olunmalıdır”.
Mətbuat katibi Prezident Mişelin əhalinin sülhə hazırlanmasının vacibliyini və bu baxımdan ictimai ritorikanın birinci dərəcəli rol oynadığını da vurğuladığını qeyd edib:
"O, Yerevanla Bakı rəhbərliyini alqışlayıb və danışıqların davam etdirilməsi üçün əlverişli atmosferin yaradılması yönündə vicdanla işləmək niyyətində olduğunu bildirib. Həmçinin Avropa İttifaqının inam tədbirlərinə dəstəyini artırmağa hazır olduğunu deyib. Yaxın günlərdə Avropa İttifaqının xüsusi nümayəndəsi Klaar müzakirə olunan bütün aspektləri izləmək üçün regiona səfər edəcək”.
Əslində, Mişelin adından yayılan bəyanatda yalnız erməni əsilli vətəndaşların deyil, bütün əhali qruplarının təhlükəsizliyi və hüquqlarının qorunmasından söhbət gedir. Sonra deyilir ki, Brüsseldə hər iki tərəf gələcək kommunikasiyaların açılmasında ərazi iddialarından imtina etdiklərini təsdiqləyib. Bu iki vacib məqam əslində Paşinyana ünvanlanan tutarlı cavabdır. Ancaq belə mətləbləri açıq və ünvanlı söyləmək lazımdır ki, Paşinyanın spekulyasiya ilə məşğul olduğu üzə çıxsın.
Poıitoloq Əhəd Məmmədli “Bakı-Xəbər”ə açıqlamasında bildirdi ki, Ermənistan ənənəvi xislətinə uyğun davranışlar ortaya qoyur: “Hər zaman olduğu kimi, danışıqların mahiyyətini təhrif edir. Mətbuat katibi deyir ki, tərəflər bu cümlələrdə ifadə olunmuş fikirlərdə əlavə hansısa məna axtarmasınlar. Yəni ermənilər qəzənləniblər ki, cənab Mişelin bəyanatında niyə Artsaxın adı, statusu yoxdur. Avropa İttifaqı da cavab verir ki, bəli, yoxdur, çünki danışıqlar konkret aparılıb, hansısa nəticələr də əldə olunub. Bundan əlavə şeylər axtarmaq lazım deyil. Bu tip bəyanatlarda diplomatik ifadələrlə mahiyyət çatdırılır, tərəflərə lazım olan fikirlər də əks olunub. Sadəcə, Paşinyan daxili auditoriya və Putinin qəzəbindən suğortalanmaq üçün Brüsseldəki razılaşmanın mahiyyətini təhrif edir. Mişelin adından yayılan bəyanatda Paşinyanın fikirlərinə eyham var. Yəni bildirilir ki, heç bir erməni əhalisinə ayrıca statusdan söhbət gedə bilməz. Sadəcə, Avropa Birliyi yaxşı olardı ki, bəyanatın tonunu bir qədər fərqli, yəni məsuliyyətləri bərəbərləşdirən tərzdə deyil, daha ünvanlı ifadə edəydi. Deyərdi ki, Paşinyan siyasi spekulyasiya ilə məşğul olur. Bir qədər konkret mövqe ifadə olunmayanda ermənilər daha da azğınlaşır”.
Məhəmmədəli QƏRİBLİ
