İyunun 1-də Fransada fəaliyyət göstərən və bu ölkədə elan edilmiş “SOS Şərqin Xristianları” (“SOS Chrétiens d'Orient”) ictimai təşkilatının rəhbərləri Rusiya “sülhməramlı”larının yaratdığı şərait sayəsində Azərbaycan Respublikasının Laçın “dəhlizi”ndəki dövlət sərhədindən rahatca keçərək Xankəndiyə gəlib. Bu barədə moderator.az saytı məlumat yayıb.
Qeyd edilənə görə, separatçı-terrorçu rejim rəhbəri Arayik Arutyunyanla görüşdə xristianlıq pərdəsi altında gizlənən təşkilat rəhbərləri Qarabağ ərazisində “humanitar layihələri”, o cümlədən erməni apostol kilsəsinin Xankəndidəki yeparxiyasının binasının, həmçinin Tərtər rayonunun Ağdərə şəhərindəki kilsənin əsaslı təmiri məsələlərini və s. müzakirə ediblər.
Araşdırmalara görə, sözügedən “humanitar” təşkilat haqda 2022-ci ilin fevralın 18-də -Rusiyanın Ukraynaya təcavüzündən az öncə Fransa dövlət qurumları tərəfindən ciddi təhqiqat başlanılıb. Belə ki, "SOS Şərqin Xristianları “ictimai” təşkilatının Suriyanın Həma əyaləti və ətrafında hərbi cinayətlərdə ittiham olunan Bəşər Əsəd rejimini dəstəkləyən yerli silahlılarla sıx əlaqələr saxladığı bəlli olub. İstintaqı Fransa Milli Jandarmının İnsanlığa Qarşı Cinayətlər, Soyqırım və Müharibə Cinayətləri ilə Mübarizə Mərkəzi Bürosu ("OCLCH") aparır. Prokurorluq təşkilatın kəndləri qarət etmək, mülki şəxslərə atəş açmaq və uşaqlara hərbi təlim keçmək kimi hərbi cinayətlərdə günahlandırılan Əsəd rejiminin yarımhərbi qruplaşması "Şəbihə" ilə əlaqələrini araşdırır. Bildirilir ki, “Şəbihə”nin liderləri “SOS Şərqin Xristianları” ilə əlaqəsi olan xristianlar Simon Əl-Vekil və Nebil Əl-Abdullahdır. 2016-cı ildən bəri "SOS Şərqin Xristianları" Əsəd rejiminin silahlı qüvvələrinin köməyi ilə “humanitar” əməliyyatlar üçün 10 minlərlə avro topladığı deyilir. Bu vəsaitlərin dəqiq hara xərcləndiyi məlum deyil. Təşkilat mediaya "OCLCH"-ın araşdırmasını şərh etməyib.
"SOS Şərq Xristianları" təşkilatının baş direktoru Benjamin Blanşar 2021-ci ilin payızında Simon Al-Vekil ilə görüntülənib. 27 oktyabr 2021-ci ildə isə Moskvada "Xristian Dünyası" Birliyinin konfransında Nebil Əl-Abdullahın yanında əyləşib. "SOS Şərq Xristianları" üzvləri özlərini “apolitik” , yəni siyasətdən uzaq kimi qələmə versələr də, təşkilat 2013-cü ildə yarandığı gündən Fransada ifrat sağçılarla sıx əlaqə saxlayır. Təşkilatın bir çox liderləri ifrat sağçı prezidentliyə namizəd, ötən il Qarabağa qanunsuz səfər etmiş Erik Zemmurun, bəziləri isə Marin Le Penin ifrat sağçı Fransa "Milli Birlik" partiyasının üzvləridir. Bundan əlavə, Zemmurun 2019-cu ildə "SOS Şərqin Xristianları" tərəfindən Suriyanın cinayətkar “Şəbihə” qruplaşmasının nəzarət etdiyi Mıharde kəndi üçün təşkil etdiyi xeyriyyə hərracına 20 min avro bağışladığı da məlumdur. Bu haqda media yazıb.
Belə bir mənfi imicə malik olan və din pərdəsi arxasında gizlənən cinayətkar bir təşkilata başçılıq edənlər qanunsuz olaraq Qarabağa gəlib və burada separatçıbaşı ilə görüş keçirib, onları isə Azərbaycan ərazisinə Rusiya sülhməramlıları buraxıb. Nə qədər çalışsaq da, bu cür qanunsuz səfərlərin qarşısı alınmır ki, alınmır. Sülhməramlılar hər cür şərait yaradırlar ki, bu cür hallar baş versin. Sözügedən separatçı qurum hansı haqla Azərbaycan torpağına gəlib və burada kilsə “təmiri layihəsi” həyata keçirmək istəyir.
“Dini təşkilat” adı altında Xankəndiyə gələnlərin məqsədi revanşizmə, separatizmə dəstək verməkdir”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, Ermənistan müharibədə məğlub olandan və dünya erməniliyi diz çökdürüləndən sonra ermənilər hər cür avantürüst, mənasız hərəkətlər edirlər. “Son dövrlər ermənilər elə hərəkətlər edirlər ki, burada məqsədləri birbaşa Azərbaycan xalqının heysiyyatına toxunmaqdır. Təsəvvür edin ki, Azərbaycanın möhtəşəm qələbəsindən sonra nə buradakı ermənilər, nə də dünyadakı erməni lobbisi rahatlıq tapa bilir. Birinci Qarabağ müharibəsi ərəfəsində, eləcə də müharibə dövründə və ondan sonra yeritdikləri siyasəti bu gün təkrar edirlər. O zaman da müəyyən xarici təşkilatları “humanitar dəstək” adı ilə Qarabağa gətirib buradakı abidələri, dini məbədləri “təmir etdirirdilər”. Onlar yalandan rəy yaradıblar ki, guya Qarabağdakı bütün xristian abidələri ermənilərə aiddir. Halbuki, ermənilər özləri də, bu dini-humanitar “təşkilatlar” da çox yaxşı bilirlər ki, bu kilsələr ermənilərə məxsus deyil. Aydındır ki, müharibə bitib, münaqişə həll olunub və gec-tez Qarabağdakı ermənilər Azərbaycan vətəndaşlığını qəbul edəcəklər. Çünki onlar bizim vətəndaşlarımızdır. Bildiyim qədər ordakı az-çox normal düşünməyi bacaran sadə ermənilər bunu istəyir ki, canlarını separatçılardan qurtarıb sakit şəkildə yaşasınlar, bunun da yolu Azərbaycan vətəndaşlığını qəbul etməkdir. Onlar Azərbaycan ərazisində yaşayırlarsa vətəndaşlığı da qəbul etməlidirlər. Qarabağdakı separatçılar gözlənilən hadilərdən əndişəyə düşüblər, odur ki, bütün vasitələrdən istifadə edib təxribat törədirlər, məqsəd də dünyanın diqqətini öz üzərilərinə yönəltməkdir. Orada bir qrup terrorçu, revanşist qüvvələr var ki, onların çıxarılması vacibdir, bu da baş verəcək. Bu gün xaricdəki erməni lobbisi cinayətkar işbirliyində olduğu qondarma təşkilatların bizim ərazilərə gəlməsi yolverilməzdir. Azərbaycan dövlətinin razılığı olmadan belə səfərlər, görüşlər cinayətdir.
Qondarma “SOS Şərqin Xristianları” təşkilatının “rəhbərlərinin” sülhməramlıların nəzarətində olan ərazidən keçib Qarabağa gəlməsi böyük təxribatdır. Bu təşkilatın təxrtibatçı, qondarma bir qurum olduğu ortadadır. Bu qondarma qurum Qarabağda qanunsuz fəaliyyət həyata keçirmək istəyir və bununla gösrərmək istəyir ki, guya bura “müstəqildir” və istədikləri vaxt orada gəlib gedirlər”.
Q.Hacıyevin sözlərinə görə, onların məqsədi dünyada tamam başqa rəy yaratmaqdır, amma buna nail ola bilməyəcəklər. Bunun Azərbaycan dövlətinə qarşı olduğunu deyən Q.Hacıyev qeyd etdi ki, bu cür səfərlərin qarşısının alınması üçün sülhməramlıların rəhbərliyi tədbir görməlidir: “Azərbaycan dövləti Qarabağa qanunsuz səfərlərlə bağlı dəfələrlə mövqe bildirib və dünyaya çağırış edib ki, Azərbaycanın icazəsi olmadan bu ərazilərə səfər etmək yasaqdır. Amma gördüyünüz kimi Fransanın rəsmilərindən tutmuş cinayətkar təşkilatlarına qədər heç biri Qarabağa səfər etməkdən çəkinmir. Fransanın Birinci Qarabağ Müharibəsində etdikləri hamınızın yadınızdadır. Terrorçuların çoxu orada hazırlanıb gətirilirdi. Erməni-qriqoryan dini mərkəzlərinin ən böyüyü Parisdə yerləşir. Bunlar din pərdəsi altda terriorla, təxribatla məşğul olurlar. Erməni kilsəsi apastol kilsəsi deyil, bunu anlamaq elə də çətin deyil. Qarabağdakı kilsələrin də ermənilərlə heç bir əlaqəsi yoxdur. Fransadan gələn “din xadimləri” də, Ermənistandan gələn bu cür adamlar hamısı terrorçudurlar. Dini “təşkilat” adı altında Xankəndiyə gələnlərin məqsədi revanşizmə, separatizmə dəstək verməkdir. Məqsəd erməni azərbaycanlı münaqişəsini canlandırmaqdır. Son günlər sülhdən, demarkasiya və delimitasiya məsələlərindən danışılır. Bu da sözsüz ki, Fransanı da, onun qurumlarını da narahat edir. Bu səbəbdən də bu cür hərəkətlərə yol verilir. Düşünürəm ki, bu kimi hallara rəvac verən amillərin hamısı aradan qaldırılmalıdır. Fransadan gələn “dini” qrup heç bir əsasla orada hər hansı bir tikinti-bərpa işində iştirak edə bilməz. Bu qanunaziddir”.
İradə SARIYEVA
