Youtube kanallarının sayı çox olsa da, təəssüf onların çoxunun tutduqları yol düzgün deyil, ölkəyə, cəmiyyətə xeyirləri yoxdur. Azərbaycanda fəaliyyət göstərən bu tipli kanalların bir çoxun olduqca biabırçı xətt seçiblər.
Onlara fikir versək görərik ki, təqdim etdikləri nümunələrdə, mətnlərdə, süjetlərdə, çıxışlarda etik qaydalar gözlənilmir. “Babam mənə kor deyib, gəlib gedəni vur deyib” prinsipini əsas götürən bu yotube kanallarında olduqca biabırçı mənzərə müşahidə olunur. Çox təəssüf ki, şər-şamatanı, qarayaxmanı öz fəaliyyət prinsiplərinə çevirən belələri birbaşa insanların şəxsi həyatlarına müdaxilə edirlər. Bu kanallardan çoxunda vətəndaşların, xüsusən də məmurların hədəfə götürüldüyü məlumdur.
Ekspertlər deyir ki, söyüşlə, şantajla məşğul olan yotub kanallarının fəaliyyət üslubu cəmiyyəti narahat edir. Onların şəxsi həyata müdaxilə etməsi, dövlət məmurlarını şantaj etməsi, bununla qazanc əldə etməsi hallarının geniş yayıldığını deyən ekspertlərin sözlərinə görə, ölkənin ciddi problemləri bir tərəfdə qalır, onlar diqqəti insanların şəxsi həyatlarına yönəldirlər. Halbuki, bu bütün mənalarda, o cümlədən də mənəvi və qanunvericilik prinsiplərinə ziddir, cinayətdir. Yotub kanalların qeyri-etik fəaliyyət üslubunun getdikcə kütləviləşməsi və şantaj üsuluna çevirilməsi, ənənəvi mediadan özünü sürətlə kənarda qoyması halları müşahidə olunur. Çox təəssüf ki, bir çoxları yotubeni öz tərbiyəsiz davranışının təbliğatçısı kimi görür və burada ölkə, xalq, xalqın mənəvi dəyərləri əleyhinə kampaniyalar aparırlar. Məsələ burasındadır ki, yotube özü belə kanalları bağlamır, dondurmur, əksinə onlara “ilham” verir. Ekspertlər hesab edir ki, yotubedəki “reket media” ilə bağlı ciddi tədbir görülməlidir, əks halda onların fəaliyyəti daha böyük ziyanlara səbəb olacaq. Söyüş, şantaj kimi neqativlərlə məşğul olan belə kanallar həm də dövlətin beynəlxalq nüfuzunu zədələməyə yönəlib. Bəziləri bu kanallar vasitəsilə Azərbaycan dövlətini də hədəfə alırlar. Çox təəssüf ki, bu təqdimatlar əsasən şəxsiləşdirilir.
İSBAM sədri Samir Adıgözəlli “Bakı-Xəbər”ə şərhində bildirdi ki, dövlətin aidiyyatı qurumları şantajçı kanallara qarşı ciddi tədbir görməlidir. Bunun artıq bir tələbə çevirildiyini deyən İSBAM sədrinin sözlərinə görə, hazırda belələri az deyil və bilmirsən onları hansı adla çağırasan. “Bəzi yotube kanallarının tutduğu yol çox biabırçılıqdır. Təəssüflər olsun ki, hələ də cəmiyyətimizdə “reket media” var və onların həm daxildəki, həm də xaricdəki bəzi adamlardan aldıqları “qonorar”a görə hərəkət edirlər. Onların arasında müəyyən məmurlar, iş adamları var ki, bu cür əl kanallarına maliyə verirlər. İstisna etmək olmaz ki, bunların arasında başqa-başqa ölkələrin xüsusi xidmət orqanlarına işləyənlər, birbaşa ermənilərlə iş birliyində olan adamlar ki, onlar Azərbaycan vətəndaşına qənim kəsiliblər. Hansısa bir problemi gündəmə gətirmək əvəzinə sonradan bunu konkret şəxslərə yönəldirlər. Xüsusi sifarişlər əsasında ölkədə xüsusi nüfuza malik olan şəxsləri hədəfə alırlar və onları qaralayırlar. Bu kanallar vasitəsilə dövlət məmurlarını, nüfuzlu şəxsləri, tanınan adamları şantaj edib pul tələb edirlər. Təəssüf ki, dilə gətirilməsi mümkün olmayan sözlərdən, söyüşlərdən istifadə edirlər, biz son zamanlara qədər belə söyüşlər efirdə səslənməyib. Hətta bəziləri öz adlarına siyasi bloger deyirlər. Amma tutduqları yolun adı şantajdır. Hesab edirəm ki, şantajçı yutuberlərlə mübarizə gücləndirilməlidir, onlara qarşı konkret tədbir görülməlidir” - deyə S.Adıgözəlli qeyd etdi.
İradə SARIYEVA
