HAVELSAN şirkəti Türkiyə Hərbi Dəniz Qüvvələri Komandanlığı Araşdırma Mərkəzi Komandanlığı ilə birlikdə hazırladıqları “Advent” Döyüş İdarəetmə Sistemini (SYS) Azərbaycanın yeni inşa edilən dəniz patrul gəmilərində istifadə etməyi hədəf seçib. Bu barədə Türkiyənin HAVELSAN şirkətinin baş direktoru Mehmet Akif Nacar bildirib.
Qeyd edək ki, müvafiq sistemləri HAVELSAN şirkəti “TEKNOFEST Azərbaycan” Aerokosmik və Texnologiya Festivalı çərçivəsində nümayiş etdirib. Mehmet Akif Nacar bu xüsusda qeyd edib: “Danışıqları yekunlaşdırdıq, Türkiyədə istifadə olunan sistemləri nümayiş etdirdik. Mövcud gəmilərin modernləşdirilməsi üçün danışıqlar aparırıq. “Advent” ilə Azərbaycanın Hərbi Dəniz Qüvvələri müasir və üstün döyüş idarəetmə sisteminə sahib olacaq”. Nacar bu il Azərbaycan üçün ixrac və biznesin inkişafı fəaliyyətlərinin daha da intensivləşəcəyini bildirib: "İllərdir Türkiyə Silahlı Qüvvələrinə təqdim etdiyimiz yüksək texnologiyalı məhsul və həllərimizi dost və qardaş ölkə Azərbaycanın müvafiq qurumlarının xidmətinə təqdim etmək istəyirik”. Mehmet Akif Nacar vurğulayıb ki, təhlükəsizlik sistemləri həlləri çərçivəsində HAVELSAN tərəfindən hazırlanan barmaq izi tanıma sistemi ilə Türkiyə dünyada öz imkanları ilə biometrik məlumat sistemini inkişaf etdirən 7-ci ölkə olub. Mehmet Akif Nacarın bu açıqlamaları Ermənistanda da xüsusi diqqətlə izlənilib və izlənilməkdədir. Erməni mediası yazır ki, Türkiyə ilə əməkdaşlıq şəraitində Azərbaycan ordusunu daha da gücləndirir. Bu vəziyyətdə Ermənistanın Azərbaycanın bütün şərtlərini yerinə yetirməkdən başqa çıxış yolu da qalmır. Məsələ ilə bağlı “armenianreport” portalı yazır ki, dünya dövlətləri də İrəvanın gözlədiyi kimi Azərbaycan-Türkiyə tandeminə qarşı çıxmır: “Bakı və Ankaraya heç bir təzyiq yoxdur. Türkiyə ümumiyyətlə istədiyini edir. O, NATO-nu açıq şəkildə şantaj edir, tələblərinin yerinə yetirilməsini tələb edir, istədiklərini almadığı halda Finlandiya və Danimarkanın Alyansa qoşulmasına razılıq verməyəcəyini bildirir. Bu hal Rusiyada alqışlanır. Baş “qoşulmayan” dövlət statusunu çoxdan nümayiş etdirən Azərbaycan da izləyir. Putin artıq dəfələrlə Əliyevi tərifləyib. Amma problem ondadır ki, Əliyev həm Bayden, həm də Makron tərəfindən təriflənir. Bəli, Fransanın yenidən seçilmiş prezidenti Azərbaycan liderini müstəqillik günü münasibətilə təbrik etmək qərarına gəlib. İki ölkə arasında əlaqələrin səviyyəsini yüksək qiymətləndirib”.
Xatırladaq ki, bu günlərdə Fransa prezidenti Emmanuel Makron Azərbaycanın Müstəqillik Günü münasibətilə prezident İlham Əliyevə təbrik məktubu göndərib. Makron məktubunda Azərbaycanla Fransa arasında diplomatik münasibətlərin qurulmasından ötən 30 il ərzində möhkəm ikitərəfli əlaqələr, siyasi, iqtisadi və mədəni sahələrdə geniş əməkdaşlığa nail olunduğunu vurğulayıb, ölkələrimizi birləşdirən əlaqələri daha da dərinləşdirmək arzusunu ifadə edib. Fransa prezidenti ölkəsinin Azərbaycanla Ermənistan arasında sülh sazişi üzrə danışıqlara və münasibətlərin normallaşmasına dair sarsılmaz sadiqliyini bir daha təsdiqləyib: “Əmin ola bilərsiniz ki, Azərbaycanla Ermənistan arasında istər xarici işlər nazirləri səviyyəsində birbaşa təmasların qurulması, istərsə də sərhəd məsələsi üzrə ikitərəfli komissiyanın yaradılması istiqamətində son aylarda yaranmış və nəticələrini gördüyümüz müsbət dinamikanı dəstəkləyirəm. Etimad mühitinin yaradılması regionda sülhün qurulması üçün vacibdir”. Emmanuel Makron hücuma məruz qalan Ukraynaya və onun əziyyət çəkən xalqına Azərbaycanın humanitar sahədə göstərdiyi dəstəyi yüksək qiymətləndirib. Məktubda, həmçinin deyilir: “Müharibənin qitəmizdə təhlükəsizliyi və sabitliyi ciddi şəkildə sarsıtdığı bir vaxtda arzu edirəm ki, bu gün xüsusi əhəmiyyət daşıyan siyasi dialoqumuzu daha da gücləndirək”. Belə yanaşma Ermənistanda ciddi narazılığa səbəb olub. Bununla bağlı “armenianreport” portalı yazır ki, Fransa, digər Qərb ölkələri Azərbaycanla münasibətləri dərinləşdirir və bu da Bakının diplomatik gedişlərinin nəticəsidir: “Azərbaycan Rusiya ilə Ukrayna arasında müharibənin gedişindən mümkün qədər məharətlə faydalanır. Makron bunu açıq şəkildə qeyd edə bilərdi. Amma etmədi. O bildirib ki, Fransa Azərbaycanla Ermənistan arasında münasibətlərin normallaşması prosesində müsbət dinamikanı qoruyur. O, həmçinin, regionda sülhün bərqərar olması üçün etimad mühitinin yaradılmasının vacibliyini vurğulayıb. Və sonra bütün bunlara Fransanın necə reaksiya verəcəyinizi bilmirsiniz. Reallıqda Ermənistanın belə dostları varsa, bizə düşmən də lazım deyil. Makron elə edir ki, sanki Qarabağın gələcəyi ilə bağlı məsələnin məqsədyönlü şəkildə gündəmdən silinməsi ilə bağlı gedən prosesin mahiyyətini başa düşmür. Digər tərəfdən, onun dostu Şarl Mişel də ermənilərin əleyhinə qərarlar verir. Azərbaycana sevinc bəxş edən də budur. Makron bütün bunları başa düşür və “özünü başa düşməyən kimi göstərir”. Makron Bakı ilə Ankara arasında dərinləşən hərbi əməkdaşlığı “görmür”. O, erməni əsgərinin öldürülməsini və rəsmi Bakının istətyinə çatmaqda israrlı olduğunu açıq şəkildə bəyan etməsini “görmür”. O, bu Makrondur”.
Nahid SALAYEV
