Ermənistan xarici işlər naziri Ararat Mirzoyan Hindistanda rəsmi səfərdə olub. Səfər çərçivəsində keçirdiyi görüşlər zamanı ənənəvi olaraq Azərbaycanın ünvanına həqiqətə uyğun olmayan fikirlər səsləndirib.
A.Mirzoyan növbəti dəfə həyasız açıqlama ilə çıxış edərək, heç bir tutarlı fakt ortaya qoymadan bəyan edib ki, İkinci Qarabağ müharibəsi zamanı Minsk Qrupunun həmsədr ölkələrinin kəşfiyyat orqanları pakistanlı muzdluların Azərbaycan tərəfində döyüşdüyünü təsdiqləyib: “Bəli, belə bir məlumat var idi. Muzdluların əksəriyyəti Yaxın Şərqdən köçürülüb. Azərbaycan “Artsaxa” qarşı müharibə zamanı Pakistan muzdluları tərəfindən dəstəklənib. Bunu ATƏT-in Minsk Qrupunun həmsədr ölkələrinin kəşfiyyat xidmətləri də təsdiqləyib”.
Bu boyda yalan olar? Haçan həmsədr ölkələrin kəşfiyyat xidmətləri belə məlumat yayıb?
“Mirzoyanın sərsəm bəyanatı həm də Ermənistan rəhbərliyinin mövqesizliyinin göstəricisidir”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev hesab edir ki, erməni həyasızlığı heç bir əndazəyə sığmır: “Əvvəlcədən qeyd edim ki, ermənilərdə onlara məxsus olmayan torpaqlara qarşı ərazi iddiaları irəli sürmək xəstəliyi ilə yanaşı, belə bir sağalmaz xəstəlik də mövcuddur – ictimai rəyə olmayanı olan kimi göstərmək cəhdi. Bu baxımdan, Ararat Mirzoyanın ATƏT-in Minsk Qrupunun ümumiyyətlə olmayan bəyanatını “olan” kimi göstərmək cəhdi sadəcə istehza doğurur. Əslində ATƏT-in Minsk Qrupunun 30 illik fəaliyyəti göz önündədir və reallığa qalanda bunu heç fəaliyyət də adlandırmaq olmaz. Azərbaycan dövləti və xalqı öz şanlı Ordusu ilə işğal altındakı torpaqlarını özü azad etdi və beləliklə, 44 günlük mücadilədə ATƏT-in Minsk Qrupunun heç bir rolu olmadı. Nəticədə BMT-nin çıxardığı və realizə olunmayan 4 qətnaməsini məhz Azərbaycanın özü heç bir başqa dövlətin, ölkələrin orduları müdaxilə etmədən realizə etdi”.
Politoloq əlavə edib ki, bu gün ermənilərin bu və ya digər şəkildə öz kapitulyasiyalarına müxtəlif adda donlar geyindirmələri, yaxud öz məğlubiyyətlərinə gülünc bəhanələr gətirmələri onların mövcud vəziyyətlərinin daha acınacaqlı olduğunu göstərir: “Heç bir çərçivəyə, həqiqətə sığmayan bəyanatın bir ölkənin XİN başçısı tərəfindən səsləndirilməsi isə həm də belə nəticəyə gəlməyə zəmin yaradır ki, qarşı tərəfdə ciddi siyasi şizofreniya xəstəliyi mövcuddur və onlar hələ də bu ənənəvi xəstəliklərinə çarə tapa bilmirlər. Ararat Mirzoyanın sərsəm bəyanatı həm də Ermənistan rəhbərliyinin mövqesizliyinin göstəricisidir. Mirzoyanın məhz Hindistana səfəri zamanı belə bir iddia ilə çıxış etməsi təsadüfi deyil. Bu gün Hindistanla Pakistan arasında Kəşmir problemi mövcuddur və hər iki ölkə bu məsələdə çox həssasdır. Azərbaycan isə Kəşmir məsələsində dost və qardaş Pakistanın maraqlarını dəstəkləyir. Bu baxımdan, Mirzoyanın məhz belə bir çıxış etməsi ikibaşlı hesab oluna bilər. Ermənistanın XİN başçısı isə səfəri çərçivəsində Hindistandan Swatch WLR RLS-ləri və yeni raket kompleksləri əldə etmək niyyətində olduğunu bəyan edib. Bütün bunlar isə erməni tərəfinin hindlilərə xoş görünmək, həmin vasitələrlə silah əldə etmək məqsədindən xəbər verir. Amma nədənsə, Hindistan rəsmiləri ötən ilin aprelində İrəvanın mərkəzində Hindistanın nüfuzlu siyasət xadimi Mhatma Qandinin heykəlinin yandırılması faktını xatırlatmayıblar. Ümumiyyətlə, Ermənistan rəhbərliyinin mövqesizlikləri, hər cinahda fərqli şəkildə görünmələri artıq bu ölkə rəhbərliyinin nə qədər acınacaqlı vəziyyətdə olduğunu isbatlamış olur. Gör bunlar nə qədər başlarını itiriblər ki, sübut olmadan digər ölkələrə böhtan atırlar. Həm də ortada hansısa fakt olmaya-olmaya. Ancaq düşünürəm ki, Ararat Mirzoyanın səsləndirdiyi sərsəm, məntiqsiz və qeyri-diplomatik bəyanatı elə Hindistandaca havaya buxarlanıb yox olacaq”.
Bir sözlə, politoloq hesab edir ki, belə iftira xarakterli açıqlamalar Azərbaycana zərər vura bilməz.
Vidadi ORDAHALLI
