Uzun illərdir ki, reket jurnalistlər mövcuddur və əvvəllər qəzetlər vasitəsilə şantaj əməlləri ilə məşğul olanlar indi də yutub üzərindən “fəaliyyətlərini” davam etdirirlər. Reket medianın yutub transformasiyası, onların yaratdığı problemlər və bu neqativ halla mübarizənin gücləndirilməsi çox vacibdir, o cümlədən hüquq-mühafizə orqanlarının tədbirlər görməsi çox zəruridir.
Çox təəssüflər olsun ki, bu gün hərə əlinə bir kamera götürüb ortaya düşüb və nəticədə də reket jurnalistika yotube-yə daşınıb, bu gün bu platformada reket jurnalistika genişlənir.
“Jurnalistikada şantajçı üslub cinayət sayılır və bu hala qarşı barışmaz olmaq lazımdır”
“Novoye vremya” qəzetinin baş redaktoru Şakir Ağayev bizimlə söhbətində bildirdi ki, bu gün reket jurnalistlərin yutub kanallarında tüğyan etməsi çox zərərli tendensiya yaradıb və bu halın qarşısı alınmalıdır. “Reket adlandırdığımız media ilə məşğul olanlar dələduzlardır, dilənçilərdir. Reket jurnalistika bir növ medianın təhqir edilməsi deməkdir. Amma çox təəssüf ki, müasir cəmiyyətdə bu var. Bu çap mediasından başladılar, sonra onlayn mediada görsəndilər, indi də yotube-yə ayaq açıblar. İlk növbədə reketlərlə cəmiyyətin özü mübarizə aparmalıdır. Çox təəssüflər olsun ki, cəmiyyət yalanlara, qışğırığa, hay-küyə daha çox inanır, nəinki real informasiyalara. Əfsuslar olsun ki, bu insanlar şantajla, təhqirlə, yalandan hücuma keçmələrlə özlərinə cəmiyyətdə yer tapa bilirlər. Reketlərin hədəfə götürdüyü insanlar da bunlarla dil tapmağa, bazarlıq etməyə, pul verməyə çalışırlar ki, onlar tənqidi dayandırsınlar. Bir media rəhbəri kimi mən də izləyirəm, yotube kanallarının çoxuda bir adamı hədəfə götürürlər və istəklərinə çatmaq üçün bunu təkrar edirlər. Bunun qarşısını almaq üçün Azərbaycan məmurları peşəkar mətbuata açıq olmalıdır. Əsl mətbuat, əsl jurnalistika üçün məlumat əlçatan olmalıdır. Neqativ hallar varsa ondan çəkinilməməlidir, o deyilməlidir ki, aradan qaldırılsın. Hər sahədə neqativ hallar var və üzərilərinə gedən kimi meqativlərin içində olduqları üçün onun ictimailəşməsini istəmirlər”.
Ş.Ağayev hesab edir ki, yotubedə meydan sulayan şantajçı reket medianın sıradan çıxması üçün tənqidi mətbuatın inkişafına əhəmiyyət verilməlidir. Onun fikrincə, nə qədər ki, tənqidi mətbuat inkişaf etməyib, insanlar yalanlara inanacaq. Ş.Ağayevin sözlərinə görə, bütün cəmiyyətlərdə problemlər var, amma baxır hansında çox, hansında azdır: “Bu çətinlikləri də gündəmə reketlər təhqir və şantajla gətirirlər. Bu neqativ hallara normal tənqidi münasibət olarsa insanların bu cür kanallara inamı azalacaq. Əlbəttə, yutubda geniş meydan açan reketlərə qarşı mübarizə tədbirləri daha da genişləndirilməlidir, bu işdə ictimaiyyət də aktiv olmalıdır. Hüquq-mühafizə orqanlarının da üzərinə iş düşür, onlar gərər rüşvət verənlə rüşvət alanı müəyyənləşdirib cəzalandırsınlar. Bu, məsələnin bir tərəfi. Digər tərəfdən də, Azərbaycanda hüquq-mühafizə orqanları reketlərə qarşı tədbir görməyə başlayarsa Qərbin bizə ikili standartlarla yanaşan “söz azadlığı” təşkilatları yalandan hay-küy salacaqlar ki, guya bizim ölkədə söz azadlığı boğulur və sair. Onların onsuz da bəhanələri çoxdur, həmişə bizdə neqativ axtarırlar. Amma təbii ki, jurnalistikada şantajçı üslub cinayət sayılır və bu hala qarşı barışmaz olmaq lazımdır. Bu sahədə tədbirlər görülməlidir. Mübarizə aparılmalıdır. Jurnalistika inkişaf etməlidir, insanların əsl mətbuata, informasiyaya çıxışı olmalıdır, analiz jurnalistika inkişaf etməli, cəmiyyətə əsl həqiqətlər alınmalıdır. Belə olarsa, şübhəsiz, ziyanlı reket media da bütün istiqamətlərdə sıradan çıxar”.
İradə SARIYEVA
