Erməni vandalizminin ifşa edilməsində İşğal və Zəfər muzeylərinin yaradılmasının mühüm əhəmiyyət kəsb etdiyi məlumdur. Eyni zamanda 44 günlük müharibədə qazanılan Zəfərin də gələcək nəsillərə çatdırılması üçün Zəfər muzeylərinin yaradılması dövlətin əsas hədəflərindən olub. Artıq dövlətimiz bu istiqamətdə işlərə başlayıb.
Bildiyimiz kimi, Prezident İlham Əliyev və Birinci xanım Mehriban Əliyeva mayın 26-da Füzuli və Cəbrayıldan sonra Zəngilan rayonuna səfər ediblər və Zəngilanda İşğal və Zəfər muzeyləri kompleksinin təməlqoyma mərasimində iştirak ediblər. Məlumat verilib ki, Zəngilan İşğal və Zəfər muzeyləri kompleksi layihəsinin əsas məqsədi müharibənin ətraf mühitə dağıdıcı təsirləri barədə məlumatlılığı artırmaqdır. Layihə hazırlanarkən dayanıqlılığın müxtəlif aspektləri həm landşaft, həm də bina dizaynı üçün nəzərə alınıb və BMT-nin Dayanıqlı İnkişaf Məqsədlərinə nail olmaq hədəflənib.
Zəngilan İşğal və Zəfər muzeyləri kompleksi İşğal Muzeyi, Zəfər Muzeyi və dağıntıları əks etdirən Memorial Parkdan ibarət olacaq... İşğal Muzeyi düşmənin işğalı zamanı şəhərin və bölgənin məruz qaldığı vandallığın əyani surətdə nümayiş etdirilməsi məqsədi daşıyır. Zəngilan şəhərinin müəyyən hissəsinin dağıdılmış vəziyyətdə qalması və Ermənistanın işğalçılıq siyasətinin ümumi mənzərəsini əks etdirən açıq səma altında muzey kimi nümayiş etdirilməsi nəzərdə tutulur. İşğal Muzeyində ətraf mühitə vurulan ekoloji zərərlər, xüsusilə Zəngilan şəhərində ətraf mühitə, bioloji müxtəlifliyə, meşələrə, yeraltı və yerüstü təbii ehtiyatlara ciddi ziyan vurmaq məqsədilə törədilən ekoloji terror aktları barədə məlumatlar diqqətə çatdırılacaq. Muzeyin ekspozisiyası müxtəlif audio və vizual texnologiyalardan istifadə etməklə təşkil olunacaq. Muzey binasının şüşədən hazırlanacaq fasadının üzərindəki təsvirlər və naxışlar çinar yarpağına bənzəyəcək ki, bu da Zəngilan şəhərinin təbiətlə sıx əlaqəsini tərənnüm edəcək. Zəngilan Zəfər Muzeyi Azərbaycan xalqının və şanlı Ordumuzun 44 günlük Vətən müharibəsi zamanı nümayiş etdirdiyi əzmkarlıq, rəşadət və peşəkarlığı əbədiləşdirən kompleks, həmçinin qazanılmış Qələbəni müasir təqdimat metodları ilə insanlara çatdıran məkan olacaq...
“ Zəngilanda İşğal və Zəfər muzeylərinin təməlinin qoyulması zərurətdən irəli gəlib”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bizimlə söhbətində bildirdi ki, Zəngilanda əsası qoyulan İşğal muzeyinin erməni vandalizminin ifşasında mühüm rol oynayacaq. O, həmçinin vurğuladı ki, Zəfər muzeyi də xalqımızın zəfər tarixinin canlı salnaməsi kimi çox əhəmiyyətlidir. Dövlət başçısının müharibə bitdikdən sonra Zəfər və İşğal muzeylərinin yaradılacağı ilə bağlı bəyanatlarını qeyd edən Q.Hacıyevin sözlərinə görə, bu muzeylərin yaradılması, hər iki muzeyin təməlinin Prezident İlham Əliyev və Birinci vitse-prezident Mehriban Əliyeva tərəfindən qoyulması çox mühümdür. Q.Hacıyev hesab edir ki, hər iki muzey fəaliyyətə başladıqdan sonra bütün dünya erməni vandalizminin canlı şahidi olmaqla yanaşı, həm də Qarabağ müharibəsinin nəticələri ilə bağlı, bizim şanlı zəfərimiz barədə məlumat əldə edəcəklər. “Düşmənin cavabı əyani vəsaitlərlə, faktlarla vaxtında verilməlidir ki, onun səsi kəsilsin. Çox müsbət haldır ki, Azərbaycan dövləti bu məsələyə xüsusi önəm verir. Prezident İlham Əliyevin bu məsələyə xüsusi diqqət yetirməsi, bu muzeylərin yaradılması təşəbbüsünü irəli sürməsi, sonradan onların təməlini qoyması çox mühüm tarixi hadisədir. Bu gün Zəngilanda İşğal və Zəfər muzeylərinin təməlinin qoyulması zərurətdən irəli gəlib. Çünki bu muzeylərin yaradılmasına bütün mənalarda ehtiyac duyulub.
Gizlin deyil ki, biz illər uzunu erməni vandalizmindən əziyyət çəkmişik. Amma Ermənistanda qondarma muzeylər yaradılıb və beynəlxalq aləmdə bizə qarşı qara piar kampaniyası aparılıb. Halbuki, haqlı tərəf olaraq biz bunu onlara qarşı aparmalı idik, amma keçmiş dövrdə zəiflik etdik. Amma onlar bundan bizim əleyhimizə istifadə etdi. Lakin Azərbaycan dövlətinin son illər apardığı təbliğat, gördüyü işlər, tarixçilərimizin də aktivləşməsi nəticəsində erməni yalanları ifşa edilməyə başlayıb. Heç şübhəsiz, 44 günlük müharibədə qazandığımız qələbə bizim mövqeyimizi daha da gücləndirdi. Erməni vandaliziminin ifşa edilməsi üçün Zəngilandakı İşğal muzeyi mühüm rol oyanayacaq. Bu gün əlimizdə kifayət qədər əyani vəsaitlər, faktlar var ki, onlar hamısı bu muzeylərdə əks olunacaq. Bu da ermənilərin cinayət əməllərinin beynəlxalq ictimaiyyət tərəfindən nifrətlə qarşılanmasına səbəb olacaq.
Zəfər Muzeyinə gəlincə, burada bizim şanlı zəfər tariximiz bütövlükdə öz əksini tapacaq. Dünya görəcək ki, necə vəhşi, vandal bir düşmənlə mübarizə aparmışıq və hansı nəticələr əldə etmişik. Beynəlxalq ictimaiyyət bizim vəhşi, məkrli bir toplumla döyüşdüyümüzü, onları diz çökdürdüyümüzü də biləcək” - deyə Q.Hacıyev qeyd etdi.
İradə SARIYEVA
