28 may Azərbaycan Xalq Cumhuriyyətinin yarandığı gündür. 1991-ci ilin dekabrında SSRİ dağıldıqdan sonra Azərbaycan özünü Xalq Cümhuriyyətinin varisi elan edib və ölkənin müstəqilliyi yenidən bərpa olunub.
Prezident İlham Əliyevin sərəncamı ilə 2021-ci il oktyabrın 15-də “Müstəqillik günü haqqında Azərbaycan Respublikasının Qanunu”nu qəbul olunduqdan sonra Müstəqillik günü Azərbaycanda ilk dəfədir ki, qeyd edilir. 15 oktyabr 2021-ci il tarixindən 28 may Müstəqillik günü adlandırılmağa başlanıb.
“Cəmiyyət də bunu müsbət qarşıladı”
Dövlət müstəqilliyimizə yeni baxış ideologiyasının 1 ilinin tamam olmasına şərh verən Siyasi elmlər üzrə fəlsəfə doktoru, dosent, millət vəkili Aydın Mirzəzadə “Bakı-Xəbər”ə bildirdi ki, 28 mayın Müstəqillik Günü adlandırılması tamamilə məntiqlidir. “Zaman-zaman Azərbaycan öz dövlətçiliyində yeni mərhələyə qədəm qoyur. Hər mərhələnin də zaman zirvəsindən tarixə daha dərin, daha məzmunlu baxış mümkün olur. Azərbaycan xalqı 100 il bundan əvvəl Azərbaycan Xalq Cumhuriyyətini elan edənlərin xatirəsini əziz tutur. Dövlət və cəmiyyət üçün çox böyük bir fədakarlıq etdiklərini hər kəs qiymətləndirir. Eyni zamanda 1991-ci ildə Azərbaycan öz dövlət müstəqilliyini yenidən bərpa etdi. Ancaq məsələyə hərtərəfli baxanda 28 may Azərbaycanda Müstəqillik günüdür. Düzdür, respublika elan edilib, Azərbaycan respublika üsul-idarəsinə keçib. Ancaq Azərbaycan öz müstəqil dövlətini elan edib. Ona görə də, cənab Prezidentin təşəbbüsü ilə 28 may tarixi Müstəqillik Günü adlandırıldı. Artıq ötən ildən başlayaraq biz bu bayramı Müstəqillik Günü adı ilə qeyd edirik. Həmçinin dövlətçiliyimizin bərpa edildiyi 18 oktyabr tarixi də tariximizin şərəfli səhifələrindəndir. Həmin tarix isə dövlət müstəqilliyinin bərpası günü kimi qeyd ediləcək. Bu tarix də xalqımızın qəlbindədir və bunu xalqımız yüksək qiymətləndirir”.
A.Mirzəzadə hesab edir ki, 28 may tarixinin Müstəqillik Günü adlandırılması daha dəqiq ifadədir: “Cəmiyyət də bunu müsbət qarşıladı. Çünki 28 may Azərbaycanın Müstəqillik günüdür. 28 may 1918-ci ilə qədər Azərbaycan xalqının 100 ildən daha çox müddətdə müstəqil dövləti olmayıb. O başqa məsələdir ki, dövlət müstəqilliyinin hansısa mərhələsində respublika üsul-idarəsini seçə və respublika kimi adlana bilər. Respublika olduğumuzu bir daha vurğulayır. Eyni zamanda 28 mayı Müstəqillik günü kimi qeyd edirik və bundan sonra da qeyd edəcəyik”.
İradə SARIYEVA
