Məlum olduğu kimi, Milli Məclis “Müstəqillik Günü haqqında” qanun layihəsində mayın 28-nin Müstəqillik Günü, oktyabrın 18-nin Müstəqilliyin Bərpası Günü elan edilməsi ilə bağlı qərar qəbul edib.
1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan edib, xalqımızın çoxəsrlik dövlətçilik ənənələri davam edib. Qısa dövr ərzində Azərbaycanın ilk parlamenti, hökuməti yaradılıb, dövlət atributları təsis olunub, sərhədləri müəyyən edilib, dövlət quruculuğu sahəsində mühüm tədbirlər həyata keçirilib, Cümhuriyyətin beynəlxalq münasibətlər sisteminin subyekti kimi tanınması, diplomatik müstəvidə milli maraqların qorunması istiqamətində mühüm addımlar atılıb. Yeni fəaliyyətə başlamış parlamentin qəbul etdiyi qanunlar milli müstəqilliyin möhkəmləndirilməsində ölkədə siyasi, iqtisadi və mədəni inkişafın təmin olunmasında, demokratik təsbit edilməsində əsaslı rol oynayıb.
1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olunub. Konstitusiya Aktında 1918-ci il 28 may tarixli İstiqlal bəyannaməsinə və “Azərbaycan Respublikasının Dövlət Müstəqilliyini bərpa etmək haqqında” Azərbaycan Respublikası Ali Sovetinin 1991-ci il 30 avqust tarixli bəyannaməsinə istinad olunub, Azərbaycan Respublikasının Azərbaycan Xalq Cümhuriyyətinin varisi olduğu təsbit edilib. Beləliklə, “Azərbaycan Respublikasının dövlət müstəqilliyi haqqında” Konstitusiya Aktına əsasən, Azərbaycan xalqı 1991-ci il oktyabrın 18-də öz müstəqilliyini bərpa edib.
Azərbaycan xalqı 1991-ci ildən sonra ikinci dəfədir ki, bu bayramı tam fərqli olaraq, öz ərazi bütövlüyünü bərpa etmiş qalib xalq kimi qeyd edir. Bu baxımdan dövlətçilik tariximizdə müstəsna əhəmiyyətli mərhələlərin, xüsusən müstəqilliyin əldə edilməsi və bərpası kimi tarixi günlərin onların mahiyyəti və məzmununa uyğun daha dəqiq ifadə olunması böyük önəm kəsb edir.
Bu bayramı qalib xalq kimi qəbul etməyimizlə biz dünyaya hansı ismarıcları vermiş olduq?
Böyük Dayaq Partiyasının sədri Mirkazım Seyidov “Bakı-Xəbər”ə açıqlamasında bildirdi ki,
Azərbaycan tarixinə qızıl hərflərlə həkk olmuş 28 May - Müstəqillik Günü xalqımızın qürür mənbəyinə çevrilmiş tariximizin şanlı və parlaq səhifələrindən biridir: “104 il əvvəl 1918-ci ildə yaranmış Azərbaycan Xalq Cümhuriyyəti Şərqdə ilk demokratik respublika kimi dünya tarixinə düşüb. Cəmi 23 ay yaşamasına baxmayaraq, Azərbaycan Xalq Cümhuriyyəti dövründə böyük işlər həyata keçirilib. Dövlət bayrağı, dövlət himni, dövlət gerbi təsis edilib, milli ordu yaradılıb, 200-dən çox mütərəqqi qanun qəbul edilib. Müstəqillik tariximizin başlanğıcı olan 28 May - Müstəqillik Günü Azərbaycanda milli ruhun formalaşmasında və gələcək inkişafında böyük rol oynayıb. XX əsrin sonlarında yenidən müstəqilliyinə qovuşan Azərbaycanda çox ağır siyasi-iqtisadi vəziyyət hökm sürsə də, ümummilli lider Heydər Əliyevin hakimiyyətə qayıdışından sonra həyata keçirdiyi müdrik, uzaqgörən siyasət nəticəsində ölkəmiz üzərindən qara buludlar çəkildi və müstəqil Azərbaycanın sürətli inkşaf dövrü başladı. 1993-2003-cü illər Azərbaycan tarixinə dirçəliş, sürətli inkişaf və tərəqqi illəri kimi həkk oldu.
Ulu Öndər Heydər Əliyevin layiqli davamçısı cənab Prezident İlham Əliyev də həyata keçirdiyi müdrik və uzaqgörən siyasəti ilə müstəqilliyimizin daha da möhkəmlənməsinə, dövlətçiliyimizin inkşafına böyük təkan verib”.
Mirkazım Seyidovun sözlərinə görə, artıq ikinci ildir ki, xalqımız Müstəqillik gününü qalib xalq olaraq qeyd edir: “Bizlərə bu qüruru və qələbəni bəxş edən, başda Ali Baş Komandanımız, cənab Prezidentimiz İlham Əliyev olmaqla, Müzəffər Azərbaycan Ordusuna təşəkkür edirik, şəhidlərimizin əziz ruhu qarşısında baş əyirik, uca Tanrıdan qazilərimizə şəfalar diləyirik. Biz bununla həm də dünyaya ciddi mesajlar veririk ki, müstəqilliyimiz əbədi və sarsılmazdır. Onların nəzərinə çatdırdıq ki, biz heç vaxt torpağımızı güzəştə gedən deyilik. Sübut etdik ki, biz öz gücümüzə yeni reallıqlar bacaran millətik. Qoy dünya birliyi bundan ciddi nəticələr çıxarsın və Ermənistanı daha da konstruktiv olmağa dəvət etsinlər”.
Məhəmmədəli QƏRİBLİ
