Hazırda bütün dünyanın gözü ölkəmizdədir. Mayın 26-da start götürən “Texnofest Azərbaycan” festivalı ayın 29-na qədər davam edəcək.
"Teknofest-2022"nin Azərbaycanda keçirilməsi iki ölkə arasındakı qardaşlığın, müttəfiqliyin bariz nümunəsidir. Festival müxtəlif müsabiqələr, sərgilər, mədəni proqramlarla əyləncəni özündə ehtiva etməklə yanaşı, iki ölkə arasında aviasiya, kosmos və texnologiya sahəsində əlaqələri möhkəmləndirir, bu sahədə fəaliyyət göstərən təşkilatların, qurumların əməkdaşlığı üçün şərait yaradır.
Ölkəmizin ev sahibliyi etdiyi bu festivalın Azərbaycana qazandıracağı dividendləri dəyərləndirən siyasi ekspertlər hesab edirlər ki, bu gün dünyanın gözü yenə Bakıdadır və bu tədbir ölkəmiz üçün olduqca böyük əhəmiyyətə malikdir.
Vüqar Bayramov: “Teknofest-2022"nin ölkəmizdə keçirilməsi Azərbaycana olan xüsusi diqqətdir”
Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov bildirdi ki, festivalın Azərbaycanda keçirilməsi xüsusi əhəmiyyət kəsb edir: “Azərbaycan regionda Dördüncü Sənaye İnqilabına dəstək verən ölkələrdəndir. Davos Dünya İqtisadi Forumunun Dördüncü Sənaye İnqilabı üzrə mərkəzi məhz Bakıda yaradılıb. Bu da ondan xəbər verir ki, innovasiya, eləcə də texnologiyanın transferi Azərbaycan üçün prioritetdir və bu istiqamətdə ölkəmiz fəaliyyətini genişləndirir. "Teknofest-2022"nin ölkəmizdə keçirilməsi Azərbaycana olan xüsusi diqqətdir. Festival, xüsusən texnologiya sahəsində kifayət qədər nüfuzu olan tədbirdir. Çoxlu virtual və yerində izləyicilərin olduğunu nəzərə alaraq tədbir Azərbaycanın innovativ və texnoloji ölkə olduğunu təqdim etməsi baxımından da vacibdir. Eyni zamanda Azərbaycan şirkətləri, startapçıları üçün həm tanışlıq, həm də potensiallarını göstərmək baxımından böyük əhəmiyyət kəsb edir”.
Millət vəkili hesab edir ki, "Teknofest"in Azərbaycanda keçirilməsi ölkə iqtisadiyyatı, xüsusən innovativ iqtisadiyyat üçün yeni imkanlar yaradacaq. Bu imkanlar nəticə etibarilə Azərbaycanın real sektoruna, həm texnoloji transferinə xüsusi töhfə verəcək. Buna görə festival yalnız texnoloji deyil, həmçinin Azərbaycan iqtisadiyyatının təqdimatı üçün vacib tədbirlərdən hesab olunur.
Mehman İsgəndərov: "TEKNOFEST Azərbaycan" festivalı yerli şirkətlərin, startapların özlərini tanıtması, investor cəlb etməsi baxımından böyük əhəmiyyət kəsb edəcək”
İnformasiya texnologiyaları üzrə ekspert Mehman İsgəndərovun sözlərinə görə, əhəmiyyətli tədbirlərə ev sahibliyi etmək ölkəmizə dividendlər qazandırır: “Müasir dövrdə cəmiyyətin və iqtisadiyyatın inkişafında innovasiyanın rolu danılmazdır. Zamanın çağırışlarına cavab verib innovativ inkişafla ayaqlaşan ölkələr daim öncül sıralardadır. Son illər Azərbaycanda da bu istiqamətdə ciddi addımlar atılmaqdadır. Məhz lV Sənaye İnqilabının çağırışlarına cavab vermək və rəqəmsal inkişafa nail olmaq üçün Azərbaycan Prezidenti İlham Əliyev tərəfindən bir sıra fərman və sərəncamlar imzalanıb. Həmçinin informasiya texnologiyaları sahəsində fəaliyyət göstərən yerli və xarici şirkətlərin fəaliyyətini genişləndirməsinin şahidi oluruq. Məhz bu proseslərin məntiqi davamıdır ki, "TEKNOFEST Azərbaycan" müsabiqəsi reallaşır”.
Ekspert hesab edir ki, belə bir möhtəşəm tədbirə ev sahibliyi etmək ölkəmizin imicinin daha da artmasına səbəb olacaq və xarici texnologiya şirkətlərinin, transmilli holdinqlərin ölkəmizə marağı artacaq: “Nəzərə almaq lazımdır ki, 44 günlük Vətən müharibəsində də bizim qələbə çalmağımıza şərait yaradan vasitələrdən biri də texnologiyanın son nailiyyətlərindən istifadə etməyimiz oldu. Məhz həmin dövrdə Azərbaycanın hərb tarixində ilk dəfə olaraq 5-ci nəsil müharibə əməliyyatları aparması ilə hərb tarixinə düşdü. Bu gün dünyanın qabaqcıl hərbi məktəblərində bizim Vətən müharibəsindəki taktika və strategiyamız tədris olunur. Məhz İkinci Qarabağ müharibəsində bizim istifadə etdiyimiz və ən son texnoloji həllərə malik "Bayraktar TB2" dronları sonradan dünyanın bir sıra ordularının arsenalına qatıldı. "TEKNOFEST Azərbaycan" festivalı yerli şirkətlərin, startapların özlərini tanıtması, investor cəlb etməsi baxımından böyük əhəmiyyət kəsb edəcək. Bu, həmçinin, xarici şirkətlərin Azərbaycanda mərkəzləşməsinə də imkan yaradacaq. Bu isə gələcəkdə ölkəmizin regional haba çevrilməsinə şərait yaradacaq”.
Günel CƏLİLOVA
