“Ermənistanla Azərbaycan arasında sülh müqaviləsinin imzalanmasını həqiqətən istəyirik”. Bunu Ermənistan prezidenti Vaaqn Xaçatryan xarici KİV-ə müsahibəsində deyib.
Ermənistan prezidenti Azərbaycanla sülhdən danışarkən bütün qonşu ölkələrlə münasibətlərin yoluna qoyulmasının vacibliyindən bəhs edib: “Həqiqətən də ərazidə qonşuların dinc yaşayışı olmadan, təkcə bizim deyil, regionun bütün ölkələri üçün irəliyə doğru addımlamaq mümkün deyil. Mən Türkiyə, İran, Azərbaycan, Gürcüstan və Ermənistanı nəzərdə tuturam”.
Xaçatryanın sözlərinə görə, Ermənistan regionda dinc yaşayış üçün imkanlar tapmalıdır. O vurğulayıb ki, sülh müqaviləsi imzalanandan sonra birgə dinc yanaşı yaşama erası başlamalıdır.
Görünən odur ki, Ermənistan prezidenti baş nazir Nikol Paşinyandan fərqli olaraq, sülh sazişi məsələsində daha qətiyyətli görünür. Zamanın düzgün dəyərləndirilməsi mövqeyindən çıxış edir. O baxımdan bütün bunları ekspertlər necə dəyərləndirir?
“Vaaqn Xaçatryan, əvvəlki prezident Armen Sarkisyandan fərqli olaraq, revanşist qanada yaxın siyasi fiqur deyil”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, regionda sülhün pozulmasının, münaqişənin yaranmasının, milyonlarla insanın qaçqın düşməsinin səbəbkarı erməni faşizmidir: “O cümlədən, “dənizdən-dənizə böyük Ermənistan” xəstəliyidir. Ancaq ermənilərin də içində praqmatk düşünən, erməni millətçiliyindən uzaq olan şəxslər, siyasətçilər var. Anlayırlar ki, regiona faciəni bunlar gətirib. Ancaq o da bir reallıqdır ki, yaşanan faciədən ermənilər də əziyyət çəkir. Çünkü onlar Rusiya tərəfindən türk torpağında, İrəvan xanlığı ərazisində məskunlaşdırılıb. Demək olar, bunların hər tərəfi türklərdir. Ermənistan müstəqil dövlət deyil ki, özünün təbii olaraq başqa xalqlarla sərhədləri, əlaqələri olsun. Ona görə də bunlar bizə və qonşu dövlətlərə qarşı qəsbkarlıq planları həyata keçirəndə, istər-istəməz, ətrafdakı bütün türklərlə münaqişədə olurlar. Çünki istər Anadolu türkləri olsun, istərsə də Güney Azərbaycan türkləri olsun, biz eyni millətik. Ermənilərin yalnız Gürcüstan üzərindən harasa çıxışı qalır. Son vaxtlar Ermənistanda sosial-iqtisadi durumun daha da pisləşməsi ortadadır. Az-çox sağlam düşünən siyasətçilər anlayır ki, qonşularla münasibətlər yoluna qoyulmasa Ermənistanı ciddi fəlakət gözləyir. Xüsusən də Azərbaycanla sülh sazişinin imzalanmasının gecikdirilməsi Ermənistanın ziyanına işləyir. Çünki xarici yardımlarla davamlı olaraq dövləti saxlamaq mümkün deyil. Bir məqamı nəzərə almaq lazımdır ki, Vaaqn Xaçatryan, əvvəlki prezident Armen Sarkisyandan fərqli olaraq, revanşist qanada yaxın siyasi fiqur deyil. Ermənistanda prezidentin səlahiyyətləri elə də böyük olmasa da, o, daha mötədil mövqedən çıxış edir. Hiss olunur ki, Xaçatryan kompromislərə meyllidir. Bundan başqa etiraf etmək lazımdır ki, sabiq prezident Levon Ter-Petrosyan da konstruktiv mövqedən çıxış edir. Dəfələrlə kompromislərə getməklə bağlı çağırışlar edib. Bunların müəyyən qismi anlayır ki, sülhdən başqa alternativ yoxdur. Bu çağırışların özünü nə dərəcədə doğruldacağını isə zaman göstərəcək”.
Bir sözlə, Əli Mustafayev hesab edir ki, Ermənistanın mövcudluğu qonşularla normal münasibətlər qurmasından keçir.
Vidadi ORDAHALLI
