104 il öncə bu gün müsəlman Şərqində ilk demokratik respublikanın əsasını qoyan Cümhuriyyət xadimlərimiz, cəmi 23 ay yaşamasına baxmayaraq, müstəqil Azərbaycanın təməlini atdı. Cəmi 23 ayda bizə Azərbaycan mirasını yaratdılar:
- Milli bayrağımız yaradıldı, dövlət atributları təsis edildi;
- Azərbaycan dili rəsmi dil kimi qəbul edildi;
- Milli ordumuz yaradıldı;
- Qadınlara səsvermə hüquqi verildi;
- Ən əsası, milli kimliyimiz ilk dəfə dövlət səviyyəsinə yüksəldi.
28 may milli dövlətçilik tariximizdə Cümhuriyyət xadimlərinin misilsiz xidmətlərinin yüksək dəyərləndirilməsi, onların zəngin irsinin öyrənilməsi və təbliği işi dövlət səviyyəsində həyata keçirilir.
Heydər Əliyev bir kərə yüksələn bayrağımızı bir daha enməyə qoymadı. Hakimiyyətə qayıdışdan sonra Heydər Əliyevin atdığı addımlar Cümhuriyyət irsinin günümüzə qədər gəlib çıxmasına imkan yaratdı. Xatırladaq ki, ümummilli lider Heydər Əliyev 1 fevral 2003-cü il tarixli “Azərbaycan Xalq Cümhuriyyətinə abidə ucaldılması haqqında” Sərəncam imzaladı. Prezident İlham Əliyev tərəfindən 2007-ci il 25 may tarixində İstiqlaliyyət küçəsində Azərbaycan Xalq Cümhuriyyətinin şərəfinə ucaldılmış İstiqlal bəyannaməsi abidəsinin açılışı oldu.
Bu abidənin açılışı Azərbaycan Xalq Cumhuriyyəti irsinin yaşadılması, əbədilişdirilməsi və elmiləşdirilməsi istiqamətində hansı əhəmiyyəti daşıyır?
Azər Həsrət: “Prezident İlham Əliyev Xalq Cümhuriyyətinin irsini yüksək qiymətləndirib”
Siyasi şərhçi Azər Həsrət “Bakı-Xəbər”ə açıqlamasında bildirdi ki, Azərbaycan Respublikası 1918-1920-ci illərdə mövcud olmuş Azərbaycan Xalq Cumhuriyyətinin varisidir. Varislik o deməkdir ki, həmin cumhuriyyətinin əldə etdiyi, həyata keçirdiyi, qəbul etdiyi bütün dəyərlərə ölkəmiz sahib çıxır. O cümlədən, istiqlal məsələsində Azərbaycan Respublikası Xalq Cumhuriyyətinin açdığı yolla davam edir: “Bu səbəbdən də ölkəmizdə belə bir abidənin ucaldılması o dövrün cumhuriyyət qurucularının xatirəsinin əbədləşdirilməsi, o cümlədən, Azərbaycan Xalq Cumhuriyyətinin xatirəsinin yüksək səviyyədə dəyərləndirilməsi sevindiricidir”.
Həmsöhbətimiz onu da əlavə etdi ki, Azərbaycanın ərazi bütövlüyü bərpa edilib. Ermənistan tərəfindən zəbt edilmiş torpaqlarımız işğaldan azad edilib.
Siyasi şərhçinin sözlərinə görə, ümummilli lider Heydər Əliyev 1 fevral 2003-cü il tarixdə “Azərbaycan Xalq Cümhuriyyətinə abidə ucaldılması haqqında” sərəncam imzalayıb. Heydər Əliyev siyasi kursunun layiqli davamçısı Prezident İlham Əliyev tərəfindən 2007-ci il mayın 25-də Bakı şəhəri, Səbail rayonu, İstiqlaliyyət küçəsində Azərbaycan Xalq Cümhuriyyətinin şərəfinə ucaldılmış İstiqlal bəyannaməsi abidəsinin açılışı olub. Prezident İlham Əliyev Xalq Cümhuriyyətinin irsini yüksək qiymətləndirib.
Tural İsmayılov: “Prezident İlham Əliyev hər zaman Azərbaycan Xalq Cumhuriyyəti dövrünün tarixi irsinə böyük əhəmiyyət verib”
Sosial Tədqiqatlar Mərkəzinin baş məsləhətçisi, politoloq Tural İsmayılov bildirdi ki, Prezident İlham Əliyev hər zaman Azərbaycan Xalq Cumhuriyyəti dövrünün tarixi irsinə böyük əhəmiyyət verib. Xüsusilə də, Prezident tərəfindən Xalq Cumhuriyyətinin tarixi irsinin araşdırılması və 28 Mayın Azərbaycan dövlət və müstəqillik tarixində oynadığı rolla bağlı bir sıra qərarlar verilib. Həmin qərarlardan biri 2007-ci ildə Xalq Cumhuriyyəti şərəfinə ucaldılmış İstiqlal bəyannaməsidir: “Abidənin açılışında şəxsən Prezident İlham Əliyev iştirak edib. Şəhərin ən gözəl və diqqəti cəlb edən yerində İstiqlal bəyannaməsi abidəsi yerləşir. Onu da nəzərə almaq lazımdır ki, abidənin olduğu yer olduqca strateji əhəmiyyətə malikdir. Belə ki, daxili və xarici turistlər həmin ərazidə çox olurlar. Həmçinin, həmin yer coğrafi baxımdan da xüsusi əhəmiyyətə malikdir”.
Həmsöhbətimiz onu da əlavə etdi ki, Azərbaycan dövləti Xalq Cumhuriyyəti ənənələrini hər zaman yaşadıb, tarixi irsinin davam etdirilməsi üçün dövlət tərəfindən hər cür dəstək göstərilib: “Hesab edirəm ki, həmin dövrün daha yaxşı öyrənilməsi, mənimsənilməsi və tədris edilməsi üçün dövlət tərəfindən lazımi imkanlar yaradılıb. Qeyd olunan tarix xüsusi şəkildə öyrənilməli və ətrafda olanlara da bu barədə geniş məlumat verilməlidir. 23 ay ərzində qəbul edilən qərarlar, özəlliklə qadınlara səsvermə hüququnun verilməsi tək ölkə tarixində deyil, regional tarix üçün mühum əhəmiyyətə malikdir”.
Günel CƏLİLOVA
