"Ukraynada bir vaxtlar ağlasığmaz olan nüvə müharibəsi təhlükəsi yenidən mövcuddur". Bunu BMT baş katibinin müavini Rameş Racasinqam bildirib.
Bundan əvvəl Almaniyanın xarici işlər naziri Annalena Berbok bildirib ki, Ukraynada baş verənlər səbəbindən nüvə müharibəsi təhlükəsini tamamilə istisna etmək olmaz. NATO-nun keçmiş rəhbəri Anders Foq Rasmussen də Rusiyadan gələn nüvə təhlükəsindən danışıb. O bildirib ki, Rusiyanın nüvə silahı atacağı ilə bağlı xəbər yeni deyil: “Bu, Ukraynaya silah tədarükünü azaltmaq üçün NATO müttəfiqlərini qorxutmaq cəhdidir. İstər taktiki nüvə, istər bioloji silahlardan istifadə zamanı Putin bilir ki, qəti cavab alacaq”. O bildirib ki, Moskvadan gələn bu təhdidlərə imkan vermək olmaz. Rusiyanın xarici işlər naziri Sergey Lavrov isə qeyd edir ki, nüvə müharibəsi təhlükəsi realdır və onun yolverilməzliyi Rusiyanın prinsipial mövqeyidir. Rusiya Təhlükəsizlik Şurasının sədr müavini Dmitri Medvedyev də Sarovdakı nüvə mərkəzinə səfərindən sonra məsələyə münasibət bildirib: “Rusiya Üçüncü Dünya müharibəsinin başlamasına imkan verməyəcək. Ölkənin nüvə sipəri müasir, etibarlı, effektiv silahların arsenalıdır. Daim xatırlatmaq məcburiyyətindəyik ki, ölkəmizə hücum olarsa, dərhal cavab verilə bilər. Təəssüf ki, NATO ilə Rusiya arasında potensial münaqişə ehtimalı artır. Ukraynanın silahla təmin edilməsi bu ehtimalı artırır. Beləliklə, bu da nüvə müharibəsinə çevrilə bilər. Bu isə hamı üçün fəlakətli ssenaridir”. NATO isə yaxın həftələrdə Ukraynada müharibənin daha da genişlənəcəyini gözləyir. Alyansın baş katibi Yens Stoltenberqin sözlərinə görə, Ukraynaya silah tədarükü davam edəcək: “Kiyev uzunmüddətli perspektivdə özünü yalnız sovet dövründən qalmış silahlarla müdafiə edə bilməz. Artıq Ukraynaya müasir silahlar verilməlidir”. Stoltenberq, həmçinin, Ukraynada nüvə silahının tətbiqi ilə bağlı Kremlə xəbərdarlıq edib: “Bizim mesajımız birmənalıdır. Nüvə silahından istifadə nəticəsində hər iki tərəf uduzacaq. Nüvə müharibəsi qələbəyə səbəb ola bilməz”. Rusiyanın müdafiə naziri, ordu generalı Sergey Şoyqu isə bu mövqe ilə razılaşmır. Şoyqu vurğulayır ki, Ukraynanın nüvə silahı yaratması ilə bağlı real təhlükə olub: “Ukraynanın nüvə silahı və onların çatdırılması vasitələri yaradacağına dair real təhlükə yaranmışdı”. O bildirib ki, NATO Ukraynanı Rusiyaya düşmən dövlətə çevirməklə onu Moskvaya təzyiq aləti edib: “Şimali Atlantika Alyansı bizim sərhədlərimizə yaxınlaşdı və döyüş potensialını dəfələrlə artırdı. Ukraynanın NATO-ya qoşulması, ərazisində koalisiya hərbi infrastrukturunun yerləşdirilməsi üçün səylər gücləndirildi və Rusiyaya təzyiq aləti kimi bizə düşmən olan dövlətə çevrildi”. Bu arada Finlandiya ilə də bağlı maraqlı proseslər baş verir. Rusiya Xarici İşlər Nazirliyinin nümayəndəsi Mariya Zaxarova NATO-ya daxil olmaq istəyən Finlandiyaya cavabın “sürpriz” olacağını açıqlayıb. Bu fonda Rusiyanın artıq nüvə qüvvələrini Finlandiya sərhədinə köçürməyə başladığına dair məlumatlar var. “Nyu-York Post” nəşri yazır ki, Rusiya-Finlandiya sərhədindən 250 kilometr aralıda yerləşən Vıborq şəhərinə hərbi eşelon yola düşüb: “Bura təchizat maşınları, 7 “İsgəndər” raketi və digər texnikalar daxildir. Bu, yeni hərbi hissənin formalaşdırıldığı əsasını yaradır. “İsgəndər” raket kompleksi taktiki nüvə silahları üçün istifadə oluna bilər”. ABŞ Hərbi Hava Qüvvələrinin yüksək rütbəli zabiti nəşrə bildirib ki, kəşfiyyat xidmətləri “İsgəndər” raketlərindən ehtiyatlanır və onları ciddi təhlükə olaraq görür. Bundan əvvəl isə Rusiya Dövlət Dumasının Müdafiə Komitəsinin sədr müavini Aleksey Juravlyov açıq şəkildə bildirib ki, Finlandiya məhv ediləcək: “Finlandiya NATO-nun tərkibində Rusiya ilə silahlı qarşıdurmaya girməyə cəhd etsə, məhv olacaq. Finlandiya Rusiya ilə yaxşı münasibətlər saxlamağa çalışıb və indiyə qədər buna nail olub. İndi o, Şimali Atlantika Alyansına qoşulmaqla Moskvaya əlavə problemlər yaratmağa hazırlaşır”. Deputat həmçinin qeyd edib ki, Rusiya nüvə raketlərindən istifadə etməyə hazırdır: “Bu, Rusiya Federasiyasının mövcudluğuna təhlükə yaranarsa baş verəcək. ABŞ dövlətimizi təhdid edir: Buyurun, sizin üçün “Sarmat” raketi. Rusiyanın var olmamasını düşünürsünüzsə, sizin yerinizdə nüvə külü olacaq. Finlandiya isə ABŞ-la bir olduğunu deyir. Yaxşı, sıraya girin. Finlər ümumilikdə dövlət olduqları üçün Finlandiyanın bir ölkə kimi mövcudluğuna görə Rusiyaya minnətdar olmalıdırlar. Biz Finlandiyanı Sibirdən “Sarmat”la vura bilərik, hətta İngiltərəni də vura bilərik. Və Kalininqraddan hücum etsək... Hipersoniklərin hədəfə çatma sürəti 200 saniyədir! Davam edin, bəylər. Bizim strateji silahlarımız 20, hətta 10 saniyəyə Finlandiyaya çatacaq “Kinjal” sinifli silahlarımız olacaq”.
Qeyd edək ki, son vaxtlar Rusiya mətbuatında ölkənin inventarında olan nüvə silahları ilə bağlı daha çox məlumatlar diqqət mərkəzinə gətirilir. Hətta bu günlərdə Moskvanın nüvə hücumu xəritəsini canlı yayımlayan dövlət televziyası belə bir vəziyyətdə London, Paris və Berlinin 202 saniyəyə xəritədən silinəcəyini bildirib. Rusiyalı ekspertlər də vurğulayır ki, belə bir hücum baş verərsə, hədəfə alınan şəhərlərdə sağ qalan olmayacaq.
Ramil QULİYEV
