“Hayastan” fondu Xocalı ərazisinə köçmüş ermənilər üçün 211 ev tikir. Bu barədə moderator.az saytı məlumat yayıb. Bildirilənə görə, Xocalı rayonunun Azərbaycan Ordusu tərəfindən azad edilmiş Sığnaq, Moşhmaat, Mədətkənd və s. kəndlərindən könüllü köçmüş ermənilər üçün “Astxaşen” adlandırılmış Daşbulaq kəndi ərazisində separatçı-terrorçu rejim tərəfindən inşa edilən yeni bir qəsəbədə inşa olunan evlərdən 90-nın artıq bu ilin sonunadək istifadəyə verilməsi nəzərdə tutulur.
Erməni nəşrlərinin yaydığı məlumata görə, bu haqda separatçı-terrorçu rejimin qanunsuz “şəhərsalma nazirliyi”ndən bildirilib. “Qəsəbədə ümumilikdə 211 fərdi ev tikiləcək. Ümumi tikinti sahəsi 523 min kvadratmetrdir. Layihəyə əsasən, tikilməkdə olan yeni qəsəbədə bələdiyyənin yerləşəcəyi bir icma mərkəzi, tibb mərkəzi, 200 nəfərlik sosial tədbirlər salonu, uşaq meydançası və stadion olacaq.
90 evin 2022-ci ilin sonuna qədər tam istifadəyə verilməsi planlaşdırılır. Tikintinin maliyyələşdirilməsi “Hayastan” ümumerməni fondu tərəfindən aparılır. Podratçı şirkət “Kapavor MMC”-dir”. Bu sözlər separatçı qurumun yaydığı xəbərdə əksini tapıb.
Separatçılar niyə durub-dayanmaq istəmirlər? Brüssel görüşündən sonra bu cür təxribatçı informasiyalar yaymaqda onlar daha da azğınlaşıblar və elə təsəvvür yaratmaq istəyirlər ki, guya orada bunlar tikinti-quruculuq işləri aparırlar və s.
Ermənistan bir tərəfdən sülh danışıqlarından bəhs edir, o biri tərəfdən isə Paşinyan hökumətinin dəstəyi ilə “Hayastan” fondu başqa ölkənin ərazisində “tikinti-quruculuq” işləri aparır. Qeyd etdiyimiz kimi, bu qanunsuzluğa da Ermənistan hökuməti rəvac verir.
“Azərbaycan mütləq şəkildə qətiyyətli addımlar atmalıdır”
Siyasi ekspert Rövşən Rəsulov bizimlə söhbətində bildirdi ki, bu kimi məsələlərin üzə çıxması bir daha nə Ermənistanın, nə də Qarabağdakı separatçıların dinc dayanmaq fikrində olmadıqlarını göstərir. “Onların bizim ərazilərimizdə qanunsuz inşaat işləri aparması, “şəhərsalma nazirliyinin” fəaliyyəti heç də görüntü xarakteri daşımır. Bu, eyni zamanda, bunların cinayətkar əməllərinin davamıdır. Əgər bu gün Qarabağda qanunsuz erməni silahlı dəstələri mövcuddursa, həmçinin də orada qeyri-qanuni inşaat işləri aparılırsa, bu iki amili paralel olaraq nəzərdən keçirmək lazımdır. Yəni hər ikisi bilavasitə Azərbaycanın ərazi bütövlüyünə və suverenliyinə qarşı çıxış etmək anlamını daşıyır. Eyni zamanda erməni tərəfinin bu kimi addımları həm də Azərbaycanı qıcıqlandırmağa hesablanıb. Onlar yaxşı bilirlər ki, indən sonra Azərbaycan müəyyən qədər səbr göstərə bilər, amma həmin səbrin müddəti çox olmaya bilər”.
R.Rəsulovun sözlərinə görə, Azərbaycan qanunsuz tikililərə qarşı sərt addım atsa, bu, ermənilərin əlinə müəyyən imkanlar verə bilər dünyaya yalandan car çəkib iddia etsin ki, “rəsmi Bakı Qarabağ ermənilərinin hüquqlarını pozur”. “Brüssel görüşündən sonra Nikol Paşinyan yenidən köhnə havasını çalıb, qeyd edib ki, Ermənistan hakimiyyəti Qarabağ ermənilərinin hüquqlarının müdafiəsində sona qədər duracaq, “status” məsələsində axıra qədər gedəcək. Artıq bunun özü faktiki olaraq göstərir ki, Ermənistan nə üçtərəfli bəyanatlara əməl etmək istəyir, nə Brüssel danışıqlarında öz üzərinə götürdüyü öhtəlikləri yerinə yetirmək istəyir. Sadəcə, Ermənistan danışıqlar xatirinə danışıqlara gedir. Bu isə belə davam edə bilməz. Azərbaycan mütləq şəkildə qətiyyətli addımlar atmalıdır. Hətta Rusiya sülhməramlılarına da xəbərdarlıq edilməlidir ki, Azərbaycan artıq səbr etməyəcək və müvafiq addımlar - antiterror addımları atacaq”.
R.Rəsulovun sözlərinə görə, Rusiyanın bu məsələdə sözdə vasitəçi kimi görünməsi sadəcə dırnaqarası təsir bağışlayır, onun bölgədəki maraqları da zatən hər kəsə məlumdur. “Bu baxımdan Azərbaycanın qətiyyətli addımlar atması vacibliyi günü-gündən daha da artmağa başlayır. Bütövlükdə, Xankəndi də daxil olmaqla, yerdə qalan ərazilər qısa zamanda antiterror əməliyyatları və başqa vasitələrlə erməni separatçılarından, işğalçılarından təmizlənməlidir”- deyə R.Rəsulov qeyd etdi.
İradə SARIYEVA
