Azərbaycanın Birləşmiş Millətlər Təşkilatının Təhsil, Elm və Mədəniyyət üzrə Təşkilatına (UNESCO) üzvlüyünün 30 ili tamam olur və bu münasibətlə tədbirlər keçirilir. Azərbaycan və UNESCO arasında əməkdaşlığın 30 illik bir tarixi var və dövlətimiz UNESCO-nun əksər layihələrində yaxından iştirak edib, bu quruma güclü dəstək verib.
UNESCO-nun təşkilatın baş katibinin müavini Firmin Edouard Matoko “Azərbaycan təşkilatın ən fəal üzvlərindəndir”deyib.
O qeyd edib ki, ölkəmiz qurumun fəaliyyətində yaxından iştirak edir.
UNESCO-nun İcraiyyə Şurasının prezidenti Tamara Rastovac Siamaşvili isə Azərbaycanın bir sıra sahələrdə uğurlarının olduğunu bildirib: “Azərbaycanın UNESCO daxilindəki fəaliyyəti yüksək qiymətləndirilir”.
Nəzərə alsaq ki, Azərbaycan öz üzərinə düşən vəzifələri layiqincə yerinə yetirir, UNESCO rəhbərliyi də ölkəmizin addımlarını müsbət qoymətləndirir, bu halda bu təşkilat niyə öz üzərinə düşən vəzifəni yerinə yetirmək istəmir? Əməkdaşlıqdan məmnun olduğu ölkənin azad ərazilərinə nə üçün missiya göndərmir? Ən azından ortada 30 illik bir əməkdaşlıq əlaqəsi var və UNESCO-da buna qarşılıq verməlidir.
“Azərbaycan-UNESCO münasibətləri fərdlərdən, şəxslərdən asılı deyil, gec-tez haqq-ədalət öz yerini tutacaq”
Qafqaz Tarix Mərkəzinin rəhbəri Rizvan Hüseynov bizimlə söhbətində bu mövzunun çox aktual olduğunu bildirdi: “Bu çox yerinə düşən sualdır. Sözsüz ki, Azərbaycanın UNESCO-nun fəaliyyətinə çox böyük töhfəsi var. Xüsusilə də son 15 ildə bu məsələdə UNESCO-nun ölkəmizdəki xoşməramlı səfiri, ölkəmizin Birinci vitse-prezidenti Mehriban Əliyevanın böyük əməyi, zəhmət, əvəzsiz töhfəsi var. UNESCO rəhbərliyi bütün dönəmlərdə çox sıx əməkdaşlıq edirdi, Azərbaycan və UNESCO həddən artıq maraqlı layihələr gerçəkləşdirirdilər. Bu təkcə Azərbaycan ərazisində deyil, neçə-neçə Avropa ölkəsində möhtəşəm layihələr həyata keçirilirdi. Tanınmış abidələrin restavrasiyası olub, humanitar layihələr gerçəkləşdirilib. Elə bir sahə yoxdur ki, Azərbaycan tərəfi çox maraqlı təşəbbüslə çıxış etməsin. Yəni istənilən sahədə Azərbaycan tərəfi nəinki təşəbbüskar, həm də o layihələrin icrasını təmin edən tərəf kimi çıxış edib. Azərbaycan UNESCO çərçivəsində çox maraqlı fəaliyyət tərzi sərgiləyib. Fikir versəniz görərsiniz ki, UNESCO-nun əvvəlki rəhbərliyindən fərqli olaraq, qurumun indiki rəhbəri Odre Azule Azərbaycana bir qədər başqa cür yanaşma sərgiləyir. O, tanınmış qadın siyasətçidir. Fikir versəniz görərsiniz ki, bayaq qeyd edilən sözləri UNECO-nun baş katibinin müavini, yaxud bir başqa qurum nümayəndələri deyir. Amma çox təəssüf ki, Odre Azulenin dilindən biz bunu eşitmirik. Ümid edirik ki, UNESCO rəhbərinin mövqeyi dəyişəcək. Məsələn, bir neçə gün əvvəl Şuşada çox möhtəşəm tədbir keçirildi. Dünyanın tanınmış təşkilatları bir araya gəldilər və həm Şuşanın bərpası, həm humanitar layihələr haqda çox gözəl çıxışlar oldu. Ən tanınmış, ən mötəbər qurumların rəhbərləri Şuşada keçirilən beynəlxalq tədbirdə iştirak etsə də, çox təəssüflər olsun ki, o tədbirə UNESCO-nun baş direktoru qatılmadı, Şuşaya gəlmədi. Səhv etmirəmsə, tədbirdə UNESCO-nun keçmiş məmurlarından bizə dost olanlar iştirak edirdilər. Çox təəssüf ki, hazırda UNESCO-da işləyənlər gəlmədilər. Ola bilsin bu, UNESCO-nun indiki rəhbərliyinin mövqeyidir. O, Mərakeşdəndir, Mərakeş kralının müşavirinin qızıdır və əslində müsəlman dünyasına yaxın şəxs olmalıdır. Həyatının bir dönəmi Mərakeşdə keçib. Təbii ki, Fransada doğulub-böyüyüb. 1972-ci il təvəllüdlüdür, nisbətən gəncdir, sosialist baxışlarla siyasi arenaya atılıb. O, Fransada çox aktiv siyasi fəaliyyətlə məşğuldur, millətçi təbəqəyə yaxındır. Yəni Fransanın mədəniyyətini, kinematoqrafiyasını qorumaq kimi təşəbbüslərlə çıxış edib. Fransada mədəniyyət naziri olub, kinematoqrafiya sahəsində rəhbər vəzifələrdə çalışıb”.
R.Hüseynovun sözlərinə görə, təəssüf ki, həddən artıq millətçi kəsimə mənsub olan UNESCO-nun baş katibi Azərbaycan və Türkiyənin mövqeyini bir qədər yad qarşılayan şəxsdir. O hesab edir ki, bəlkə də bu subyektiv səbəblərə görə UNESCO-nun azad ərazilərimizə missiya göndərməsi düyünə düşüb: “Əvvəlki dövrlərdə olan yüksək səviyyəli əməkdaşlıqlar, birgə layihələr hazırda qismən dondurulmuş vəziyyətdədir. Amma bu müvəqqəti bir məsələdir. Şübhə yoxdur ki, yaxın zamanlarda bu vəziyyət dəyişə bilər. Azərbaycan-UNESCO münasibətləri fərdlərdən, şəxslərdən asılı deyil, gec-tez haqq-ədalət öz yerini tutacaq. Bu məsələyə Azərbaycan həmişə təmkinlə, səbrlə yanaşır. Bunun bariz nümunəsi bizim Qarabağ müharibəsində qazandığımız zəfərimizdir. Biz uzun illər hazırlaşıb zəfər qazandıq. Baxmayaraq ki, dünyanın ən güclü mərkəzləri bizim məqsədimizə, zəfərə çatmamağımız üçün əlindən gələni edirdi. Amma biz məqsədimizə çatdıq. Dünyadakı siyasi nüfuzumuzdan istifadə edərək, dostlarımıza, ən əsası isə Azərbaycan xalıqına və ordusuna arxalanaraq zəfər əldə etdik. Şübhəsiz ki, mədəniyyət cəbhəsində də gec-tez məqsədimizə nail olacağıq. Çünki məqsədimiz kiminsə haqqını əlindən almaq yox, öz haqqımızı tələb etməkdir, həqiqətin bərqərar olmasına nail olmaqdır”-deyə R.Hüseynov qeyd etdi.
İradə SARIYEVA
