Ermənistan mətbuatı Brüssel görüşü ilə bağlı maraqlı bir iddia ilə çıxış edib. Azərbaycan mediası yazır ki, həmin iddiaya görə, Azərbaycan Prezidenti İlham Əliyev Ermənistanın Baş naziri Nikol Paşinyandan Birinci Qarabağ savaşı, ən əsası isə Xocalı qətliamında iştirak etmiş yüksək çinli erməni hərbçilərinin cinayət məsuliyyətinə cəlb edilməsini, habelə onların Azərbaycana təhvil verilməsini tələb edib. Hətta Azərbaycan Prezidenti Şarl Mişelə bu tələbdən imtina etməyəcəyini bildirib.
“Hraparak” qəzetinin yazdığına görə, İlham Əliyevin Nikol Paşinyandan tələb etdiyi şəxslər generallar Manvel Qriqoryan, Aşot Minasyan, Yuri Xaçaturov, Seyran Ohanyan və Qnel Manukyandır. Bundan başqa, daha bir neçə polkovnik və polkovnik-leytenantın da Azərbaycana təhvil verilməsini istəyib.
Qeyd edilənə görə, adları sadalanan erməni generallarından yalnız Qnel Makukyan 44 günlük müharibədən az sonra ölüb.
“...Azərbaycan rəhbərliyinin bu məsələni gündəmə gətirməsi tam məntiqlidir”
Mövzuya şərh verən Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, bu iddiadır, rəsmən təsdiq olunmamış məlumatdır, amma Ermənistan mediasının bu iddanı ortaya atmasının özü maraqlıdır. “Bunu bir tərəfdən Ermənistanda özünə müxalifət deyənlər və son dövrlər davamlı aksiya keçirənlər də feyk məlumat kimi ortaya ata bilər. Onlar bu iddiadan Paşinyan hakimiyyətini devirmək üçün də istifadə edə bilərlər, çünki onlar mübarizədə hər cür metoddan istifadə edirlər. Bu, variantlardan biri də ola bilər. Lakin digər tərəfdən, Azərbaycan rəhbərliyinin bu məsələni gündəmə gətirməsi tam məntiqlidir və onun Xocalı soyqırımında günahı olan canilərin tutulub Azərbaycana verilməsini tələb etməsi tamamilə təbiidir. Çünki ermənilər Birinci Qarabağ müharibəsində də, ondan əvvəl və sonra da xalqımıza qarşı qanlı cinayətlər törədib. Onların bir-bir tutulub beynəlxalq məhkəməyə verilməsi, ağır şəkildə cəzalandırılması çox vacibdir. Onların arasında kütləvi və fərdi cinayətlər törədənlər də var və onların tulub həbsə atılması beynəlxalq praktikada da var. Hesab edirəm ki, Xocalı qatillərini Paşinyan hökuməti həbs edib Azərbaycana təhvil verməlidir. Paşinyan Ermənistanı sivil bir dövlət kimi inkişaf etdirmək istəyirsə, Avropa, Qərb dəyərlərinə üstünlük mütləq mənada verirsə, Azərbaycan tərəfin müraciətlərinə diqqətlə yanaşmalıdır”.
A.Nağının sözlərinə görə, Azərbaycan Prezidentinin müraciəti barədə rəsmi açıqlama yoxdur, ola bilsin, Azərbaycan rəhbərliyi bu barədə hələlik açıqlama vermək istəmir. “Bilirsiz ki, dəfələrlə biz Xocalı soyqırımını törədən canilərin azadlıqda olmasından təəssüflə danışmışıq. Mütləq mənada onlar həbs edilməlidir. Azərbaycanla Ermənistan arasında sülh sazişinin imzalanmasına hazırlıq gedrsə, bu ölkə mütləq Xocalı qətliamını törədən cinayətkarları tutub Azərbaycana təhvil verməlidir. Ermənistandakı hərbi canilər törətdikləri cinayətlərə görə cavab verməlidirlər. Bu məsələdə Ermənistan hakimiyyəti özü maraqlı olmalıdır. İnanıram ki, bir gün Xocalı soyqırımını törədənlər beynəlxalq məhkəmdə otura bilər, Ermənistan hökuməti də onların tutulub məsuluyyətə cəlb olunmasına kömək etməlidir”.
A.Nağı hesab edir ki, bu məsələ ilə bağlı QHT-lər, siyasi partiyalar da aktiv olmalı və xarici əlaqələrindən istifadə edib əməkdaşlıq etdiyi təşkilatlar vasitəsilə Ermənistan hökumətinə təzyiq göstərilməsinə nail olmalıdır. “Biz Xocalı soyqırımını törədən şəxslərin beynəlxalq aləmdə ifşasına nail olmalıyıq. Bu çox vacibdir. Bunu da vətəndaş cəmiyyəti həyata keçirilməlidir. Hüquq – mühafizə orqanlarımızda Xocalı qatillərinin siyahısı da, onlarla bağlı materaillar da var. Maraqlıdır, bu soyqırımın törədilməsində aktiv iştirak edən və əli xalqımızın qanına batan Köçəryan və Sarkisyanın adını qeyd etməyiblər. Amma bütövlükdə, canilər cəzasız qalmamlıdır. Erməni medaisının bu iddiasını davamlı izləmək lazımdır”-deyə A.Nağı vurğuladı.
İradə SARIYEVA
