Erməni XİN müavinini divara dirədilər - "Artsax Azərbaycanda olmayacaq" demədi…

Elşad Musayev: “Ermənistan rəsmilərinin qeyri-adi davranış və açıqlamaları da prosesi yubatmağa hesablanıb”

img

Ermənistan parlamentinin müxalifət fraksiyalarının üzvləri polislərin müşayiəti ilə Ermənistan Xarici İşlər Nazirliyinin binasına daxil olub və xarici işlər nazirinin müavini Mnatsakan Səfəryanla görüşüblər.

Ermənistan mediasının yazdığına görə, deputatlar nazir müavinindən Artsaxın heç vaxt Azərbaycanın tərkibində olmayacağını rəsmən bəyan etməyi xahiş ediblər. Nazir müavini “Artsax Azərbaycanın tərkibində olmayacaq” cümləsini tələffüz etməkdən imtina edib.

Qeyd edək ki, xarici işlər nazirinin müavini Mnatsakan Səfəryan Ermənistan Respublikası ilə Azərbaycan arasında dövlət sərhədinin delimitasiyası və təhlükəsizliyi üzrə komissiyanın üzvüdür. Xatırladaq ki, Müqavimət Hərəkatının üzvləri itaətsizlik aksiyası keçirərək Ermənistan Xarici İşlər Nazirliyinin binasının girişlərini bağlayıblar.

Erməni məmurun bu davranışını necə şərh etmək olar?

Böyük Azərbaycan Partiyasının sədri Elşad Musayev “Bakı-Xəbər”ə açıqlamasında bildirdi ki, hazırda Ermənistanda vəziyyət həddən artıq gərgindir: “Ermənistanın müxalif qüvvələri ayrı-ayrı dövlət qurumlarının önündə etiraz aksiyalarını davam etdirirlər. Belə aksiyalar həm Nazirlər Kabineti, həm də Xarici İşlər Nazirliyinin binası qarşısında keçirilir. Əsas tələbləri də Paşinyanın istefasıdır. Onlar hesab edirlər ki, Paşinyan hakimiyyəti Qarabağla bağlı danışıqlarda prinsipial mövqe nümayiş etdirmir. Sizin dediyiniz mənzərənin necə baş verdiyi ilə bağlı mənim ətraflı məlumatım yoxdur. İstənilən halda, hazırda Ermənistan hakimiyyətində, hətta Paşinyan da daxil olmaqla, heç kim Qarabağın tərkibində qalmasını istəmir. Birmənalı şəkildə onların mövqeyi budur. Ola bilər ki, hansısa məmur indiki həssas məqamı nəzərə aldığı üçün belə açıqlama verməyib. Ancaq xislətlərində olan başqa şeydi. Artıq məlumat yayılıb ki, sərhədlə bağlı yüksək dövlət rəsmiləri arasında görüş keçirilib. Söhbət birbaşa, vasitəçilərin iştirakı olmadan baş tutan təmasdan gedir. Bu görüşdə də razılıq olub ki, növbəti təmas Moskvada olsun. Ardınca Brüsseldə görüşün olacağı nəzərdə tutulur. Düzü, məni narahat edən məsələ sülh sazişinin arxa plana keçməsidir. Çünki sərhədlərin dəqiqləşməsi uzun zaman aparacaq. Ona kimi Ermənistan mövqeyini dəyişə də bilər. Artıq Ermənistan Təhlükəsizlik Şurasının katibi bəyan edib ki, Ermənistan ərazisindən heç bir dəhliz keçə bilməz. Prezident Əliyevlə Ərdoğan arasında baş tutan telefon danışığı zamanı isə bəyan edilib ki, dəhlizin açılışı ilə bağlı tərəflər razılığa gəlib. Bir az keçəndən sonra bir başqa bəhanə də gətirə  bilərlər. Buna görə də, hərtərəfli təzyiqlərimizi davam etdirməliyik. Ermənistan belə manevrləri ilə həm Rusiya, həm də Avropadan əlavə güzəştlər toparmaq istəyir. Ermənistan rəsmilərinin qeyri-adi davranış və açıqlamaları da prosesi yubatmağa hesablanıb. Biz təzyiqlərimizi artırmaqla Ermənistanı sülhə məcbur edə bilərik”.

Məhəmmədəli QƏRİBLİ

Peşə etikası

Son xəbərlər