Ermənistan TŞ katibi Brüsseldən sonra Zəngəzur dəhlizinə maraqlı izah verdi...

Məhəmməd Əsədullazadə: “Baş verənlər Azərbaycanın uğurlu siyasətinin nəticəsidir”

img

Ermənistan Təhlükəsizlik Şurasının katibi Armen Qriqoryan kommunikasiyaların açılması məsələləri ilə bağlı təfərrüatlara toxunaraq Zəngəzur dəhlizinə maraqlı izah verib. O qeyd edib ki, Ermənistanın yükləri, vətəndaşları Yerasxdan Naxçıvan ərazisi vasitəsilə Meğriyə gələcəklər.

A.Qriqoryan bunu belə əsaslandırıb: “Söhbət ondan gedir ki, məsələn, Ermənistan vətəndaşları və yükləri Yerasxdan Meğriyə və ya əksinə çatmaq üçün Naxçıvan Muxtar Vilayətinin ərazisindən keçəcəklər. Eyni prinsiplər üzrə Azərbaycan vətəndaşları və yükləri də Horadizdən Naxçıvana Ermənistan ərazisi ilə keçəcəklər”.

Jurnalistlər maraqlanıblar ki, Ermənistanın bir hissəsindən başqa hissəsinə keçilməsi üçün niyə Naxçıvan ərazisindən istifadə olunmalıdır? A.Qriqoryan bunu belə izah edib ki, Ermənistanın şimalı ilə cənubunu birləşdirən dəmir yolu Naxçıvandan keçir: “Müzakirə olunan mövzu regionda bütün kommunikasiyaların açılmasıdır. Buna görə də bu açılmanın prinsipləri məsələsi həll olunmalıdır. Müzakirələr bu məntiqlə gedir”.

Ən nəhayət, A.Qriqoryan xatırladıb ki, habelə Ermənistanın Naxçıvan ərazisi ilə İrana və Azərbaycanın şərq regionları vasitəsilə Rusiyaya çıxışı müzakirə olunur.

Görünən odur ki, Ermənistan Zəngəzur dəhlizinin əhəmiyyətini getdikcə daha aydın dərk etməyə başlayır.

  • “Əvvəl Ermənistan bundan imtina edirdi, amma indi vəziyyət dəyişdiyi üçün bunu qəbul etmək zorunda qalıblar”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin fikrincə, Ermənistan Zəngəzur dəhlizi ilə razılaşmağa məhkumdur: “Ermənistan tərəfindən sərhədlərin delimitasiya və demarkasiya komissiyasının sədri Armen Qirqoryan konkret olaraq Brüsseldə əldə olunan razılaşmanı qeyd edir. Çünki razılaşmada ikitərəfli kommunikasiyaların açılması istiqamətində Zəngəzur dəhizinin açılması qeyd edilir. Ermənistan əvvəl bundan imtina edirdi, amma indi vəziyyət dəyişdiyi üçün bunu qəbul etmək zorunda qalıb. Çünki bu istiqamətdə Ermənistana təzyiqlər var. Ümumiyyətlə, Mehri ilə Ermənistanın şimalını birləşdirən dəmir yolu yoxdur. Bu, Naxçıvan ərzisindən keçir. Ermənistan bundan istifadə edəcək. Azərbaycan da öz növbəsində Zəngəzurdan keçən yollardan istifadə edəcək. Prezident İlham Əliyev Rəcəb Tayyib Ərdoğanla telefon söhbətində Zəngəzur dəhlizi ilə bağlı razılığın əldə edildiyini vurğuladı. Hesab edirəm ki, artıq Ermənistan üçün geri dönüş yolu yoxdur və bu porses başlayıb. Zəngəzur dəhlizi də Ermənistanın maraqlarına cavab verir. İlk növbədə Ermənistan prosesi pozmasa və Rusiyanın təzyiqlərini neytrallaşdıra bilsə sülh əldə olunacaq. Demək olar ki, baş verənlər Azərbaycanın uğurlu siyasətinin nəticəsidir”.

Politoloq onu da əlavə etdi ki, Zəngəzur dəhlizinin açılması qaçılmazdır.

Vidadi ORDAHALLI

Peşə etikası

Son xəbərlər