Xəbər verildiyi kimi, Avropa İttifaqı Şurasının Prezidenti Şarl Mişel Brüsseldə Azərbaycan Prezidenti İlham Əliyev və Ermənistan baş naziri Nikol Paşinyanla keçirilmiş görüşün yekunlarına dair mətbuata açıqlama verib. Açıqlamasında Ş.Mişel bir sıra məqamlara aydınlıq gətirib.
O cümlədən, Ş.Mişel açıqlamasında belə bir məqamı vurğulayıb: “Kommunikasiya ilə əlaqədar liderlər nəqliyyat əlaqələrinin açılması istiqamətində işlərin davam etdirilməsi zərurəti üzərində razılığa gəldilər. Onlar Azərbaycanın qərb hissəsi ilə Naxçıvan və Azərbaycan ərazisindən Ermənistanın müxtəlif hissələri arasında tranzitləri, habelə hər iki ölkənin kommunikasiya infrastrukturu vasitəsilə beynəlxalq nəqliyyat daşımalarını tənzimləyəcək prinsiplər üzərində razılığa gəldilər. Onlar xüsusilə beynəlxalq daşımalar kontekstində sərhəd idarəetmə prinsipləri, təhlükəsizlik, eləcə də gömrük rüsumları və qaydaları barədə razılığa gəliblər və yaxın günlərdə Baş nazirlərin müavinləri bu işi davam etdirəcəklər”.
Göründüyü kimi, Aİ-nin vasitəçiliyi ilə bu dəfə Azərbaycanla Ermənistan arasında əldə olunan razılaşmaların əhatə dairəsi əvvəlkilərdən daha genişdir. O baxımdan bütün bunları ekspertlər necə dəyərləndirir?
“Bu gün Azərbaycandan daha çox Ermənistan münasibətlərin düzəlməsində, sərhədlərin dəqiqləşdirilməsində, Zəngəzur...”
Məsələyə münasibət bildirən millət vəkili Aydın Mirzəzadə hesab edir ki, Ermənistan bu dəfə də üzərinə götürdüyü öhdəlikləri yerinə yetirməsə, bu ilk növbədə onun ziyanına işləyəcək: “Əvvəla, bugünkü gün üçün reallıq odur ki, Ermənistan Azərbaycanın 5 prinsipini qəbul edib. Və bununla bağlı Brüsseldə müəyyən ümumi razılığa gəlinib. Bu məsələdə nə dərəcədə Ermənistan səmimidir və nə dərəcədə razılıqlarını yerinə yetirmək istəyəcəyi sonrakı mərhələdə özünü göstərəcək. Bu gün Azərbaycandan daha çox Ermənistan münasibətlərin düzəlməsində, sərhədlərin dəqiqləşdirilməsində maraqlı olmalıdır. Zəngəzur dəhlizinin açılmasına Ermənistan xüsusən maraq göstərməlidir. Çünki Ermənistan apardığı işğalçılıq və qonşu dövlətlərlə münaqişə siyasəti ilə özü-özünü dalana dirəyib. Ora investisya qoyulmur, regional-iqtisadi layihələrdən kənarda qalıb. Bu gün Ermənistan beynəlxalq birlikdə hər hansı bir siyasi nüfuza malik deyil. Bütün bu proseslərdən azacıq da olsa yararlanmaq üçün ilk növbədə Azərbaycanla normal münasibətlər qurulmalıdır. Zəngəzur dəhlizinin işləməsi Ermənistan büdcəsinə heç bir xərc çəkmədən yüz milyonlarla vəsait gətirəcək. Bu baxımdan gələcək göstərəcək ki, Ermənistan dediklərinə sadiqdir, yoxsa yox. Əgər əməl etməyəcəksə, Azərbaycanla konflikt siyasəti yeridəcəksə, müvafiq olaraq da cavabını alacaq. Azərbaycan bu gün öz işğaldan azad edilmiş ərazilərində suveren hüquqlarını addım-addım bərpa edir”.
Millət vəkili bildirdi ki, bundan sonra bir qarış torpağımızı da heç kəsə güzəştə getmək fikrində deyilik.
Vidadi ORDAHALLI
