Sanksiyalara baxmayaraq, Rusiya Avropa ölkələri ilə neft-qaz ticarətini davam etdirir və məhz bu ticarət Rusiya prezidenti Vladimir Putinə orduya pul ödəməyə imkan verir".
Azərbaycan mətbuatı xəbər verir ki, bunu iqtisadçı Maksim Mironov deyib. "Enerji ticarəti Putinə təkcə orduya deyil, həm də dövlət işçilərinə maaş ödəməyə imkan verir. Avropa ona gündə 700-800 milyon avro göndərməkdə davam edir və bu, büdcə balansını saxlamağa imkan verir, üstəlik idxala tələbat azalıb, ölkəyə dollar gəlir. Bu, Putinə qeyri-sabit büdcəni saxlamağa imkan verir”, - Mironov bildirib.
Rusiyalı ekspert də təsdiqləyir ki, demək, Avropanın xeyli sayda ölkəsi neft və qaz almaqla Rusiyanın maliyyə təminatını həyata keçirir və bununla da bu şəkildə müharibədə Ukraynaya qalib gəlməsinə dəstək verirlər. Əslində, Avropa ölkələri bütövlükdə Rusiya qazından və neftindən imtina edəcəklərini açıqlasalar da, ona qarşı sərt sanksiyalar tətbiq edəcəklərini bəyan etsələr də, bu gün ortaya çıxan faktlar göstərir ki, bəzi Avropa ölkələri, nəinki sanksiyalara qoşulmayıb, hətta Rusiyadan neft-qaz alıb ona kömək edir. Bu da bəzi Avropa ölkələrinin əsl niyyətlərini ortaya qoyur.
"Buna isə birmənalı olaraq riyakarlıq demək daha doğru olardı"
Siyasi ekspert Rövşən Rəsulov bizimlə söhbətində bildirdi ki, bir neçə Avropa ölkəsi Rusiyaya işlədiklərini, onun maraqlarına xidmət etdiklərini bu şəkildə ortaya qoyur. "Bu gün Qərb dövlətləri Ukraynaya münasibətdə ikiüzlü oyun oynayır və biz bunu müxtəlif proseslərdə müşahidə edirik. Əbəs deyil ki, Ukrayna kartı qurbanlıq quzu kimi ortaya atılıb və bundan əziyyət çəkən də məhz ukraynalılardır. O cümlədən, Rusiyanın əleyhinə çıxış edən bir sıra Avropa siyasətçiləri, xüsusilə Fransa, Almaniya kimi ölkələrin dövlət başçıları necə deyərlər, “saman altından su yeritməklə” Rusiya ilə iqtisadi münasibətlərini saxlamaqdadırlar. Hazırda Rusiyaya qarşı sanksiyalarda yer alan bu kimi ölkələr və onların liderləri əl altından Moskva ilə ticari əlaqələrini saxlamaqda, hətta Rusiyadan qaz və s. enerji resursları alırlar. Əbəs deyil ki, rusiyalı iqtisadçı Maksim Mironov da bu ətrafda danışarlkən həmin etirafı edib, üstəlik ehtimal edilən gəlir imkanlarını da açıqlayıb - 700-800 milyon avro gəlir. Bu Avropa regionunun avro ilə hesablamasıdır, amma nəzərə alsaq ki, onların bir çoxu Rusiya qazını məhz Kremlin şərtləri ilə - rublla əldə edirlərsə, nəticədə Rusiyanın iqtisadi mövqeyi möhkəmlənir, yəni rubl valyuta ekvivalenti olaraq möhkəmlənməkdədir. Bu gün Rusiyanın mərkəzi bankından ən çox rubl alan ölkələr sırasında Fransa və Almaniya öncüllük təşkil edirlər və həmin amil digər Avropa ölkələrinə də aiddir. Deməli, Qərb, Avropa bir tərəfdən Ukraynanı Rusiya ilə müharibəyə təhrik edir, ona silah və s. təchizatlar göndərir, digər tərəfdən isə düşmən elan etdikləri Rusiya ilə iqtisadi əlaqələrini itirmirlər. Buna isə birmənalı olaraq riyakarlıq demək daha doğru olardı. Nəticədə nə əldə olunur? Rusiya hərbi sənayesini inkişaf etdirir, müdafiə xərclərini saxlayır, ölkəyə dollar, avro axını daxil olur və ən əsası, büdcə tükənmir".
R.Rəsulovun sözlərinə görə, əslində, Ukrayna prezidenti Zelenskinin vaxtaşırı məhz Fransa və Almaniya liderlərini hədəfə alması da əbəs deyil. "O, bu vasitə ilə ən əsas dəstəkçisi ABŞ-dan da tələb edir ki, mövcud məsələlərdə həmin ölkələrə təzyiqini artırsın. Əks halda, Rusiyanın bu ölkədəki hərbi əməliyyatları daha da artır, insan tələfatları kütləviləşir, müharibə uzanır və barış, sülh prinsiplərinin əldə edilməsi ümumiyyətlə mümkün görünmür.
Ukraynada müharibə başlayarkən rus qazından, neftindən, digər enerji resurslarından imtina edəcəklərini ağızdolusu bəyan edən Qərb liderləri məhz Ukraynadakı savaş üzərindən öz maraqlarını təmin edir, iqtisadiyyatlarını qan üzərində saxlayırlar. Bütün bunlar isə, ümumiyyətlə, heç bir humanitar, yaxud digər müvafiq şərtlərə cavab vermir, bu riyakarlıq xəmiri isə, təəssüf ki, hələ çox su aparacaq" - deyə siyasi ekspert Rövşən Rəsulov bildirdi.
İradə SARIYEVA
