Ermənistanın baş naziri Nikol Paşinyan Freedom House təşkilatı tərəfindən həyata keçirilən “Erməni Demokratiya Forumu” adlı tədbirdə iştirak edib.
Tədbirdə ER Parlamentinin sədri Alen Simonyan, Konstitusiya Məhkəməsinin sədri Arman Dilanyan, Parlament sədrinin müavinləri Hakob Arşakyan, Ruben Rubinyan, deputatlar, hökumət üzvləri, Aİ-nin Ermənistandakı nümayəndəliyinin rəhbəri, səfir Andrea Viktorin, ABŞ-ın Ermənistandakı fövqəladə və səlahiyyətli səfiri Lin Treysi, Freedom House-un Avropa və Avrasiya üzrə proqram direktoru Mark Behrendt, vətəndaş cəmiyyətinin nümayəndələri və ekspertlər iştirak edib. Tədbirdə çıxış edən Paşinyan bildirib ki, Ermənistan vətəndaşları hökumətin elan etdiyi sülh gündəliyini həyata keçirmək üçün hakimiyyətə mandat verib: “ Biz ölkəyə demokratiya bəxş etdiyimiz kimi sülh də gətirməliyik. Ermənistanda bu missiya ətrafında birləşmiş siyasi güc var. Bütün demokratik qüvvələr bu missiya ətrafında birləşməlidir. Ermənistanda demokratiyanın ən vacib institutu vətəndaş institutudur. Bu institutlar demokratiyanın təminatçısıdır, qərarların qəbulunun əsas subyektidir. Müharibədən sonra (2020-ci ilin payızında) Ermənistan böyük sarsıntılar keçirdi, lakin dövlətçiliyinin dağılmasının qarşısını məhz vətəndaşlar aldı. Demokratiya Ermənistanın suverenliyinin qorunub saxlanmasının qarantıdır. Ölkənin daxili və xarici təhlükəsizliyini təmin edə biləcək amil məhz demokratiyadır”.
Forum müxalifətin Paşinyanın istefası tələbi ilə keçirilən etiraz aksiyası fonunda baş tutub. Tədbirin keçirildiyi otelin binası polis tərəfindən mühasirəyə alınıb. Qeyd edək ki, sözügedən tədbirə erməni müxalifətindən heç kim dəvət edilməyib.
Müxalifət nümayəndələri bildiriblər:
“Biz bu diktatura rejimini dəstəkləyən Treysiyə onun Ermənistanda heç bir işi olmadığını söyləməyə gəlmişik. Ermənistanda demokratiya böhranı formalaşıb”.
Buna baxmayaraq, ABŞ və Fransa səfiri tədbirdə Ermənistanda demokratiyanın vacibliyi mövzusunda olduqca sərt çıxışlar ediblər. Erməni müxalifətinin belə tədbirdən kənar saxlanmasını necə qiymətləndirə bilərik?
Siyasi şərhçi Sahil Kərimli “Bakı-Xəbər”ə bildirdi ki, hazırda Ermənistandakı siyasi vəziyyət çox gərgindir: “Nikol Paşinyan faktiki olaraq revanşist-radikal qüvvələrin təsiri altındadır. Bundan əvvəl bir neçə dəfə Ermənistan rəhbəri ilə bizim ölkə rəhbəri arasında görüşlər keçirilib. Hər dəfə də Nikol Paşinyan konstruktiv olmağa çalışıb. Hər görüşdə də müəyyən irəliləyişlərin əldə edilməsinə can atılıb. Ancaq hər görüşdən sonra o, ölkəsinə qayıdan kimi verdiyi sözlərdən imtina edib. Təbii ki, bura erməni xislətini də aid edə bilərik. Çünki onlar uzun tarix boyunca belə xarakter ortaya qoyurlar. Danmaq olmaz ki, bu məsələdə erməni müxalifıtinin Paşinyana böyük təsiri var. Müxalifətin radikal kəsimi yeni müharibəni başlamaqla erməni xalqını qırğına vermək istəyirlər. Bütün bunlar Ermənistandakı gərginlikdən xəbər verir. Buna görə də, Paşinyan hakimiyyəti müxalifəti oyundankənar vəziyyətdə saxlamaq yolunu tutub. İstənilən halda, belə qənaətə gəlmək olur ki, Ermənistan hakimiyyəti sağlam deyil. Onlar başa düşməlidir ki, bölgədəki sülh və təhlükəsizlik hamıdan çox Ermənistana gərəkdir. Ermənistan müxalifəti bilməlidir ki, belə tələbləri ilə heç vaxt ciddi nəticə əldə etməyəcəklər. Avropa qurumlarının təşkilatçılığı ilə keçirilən tədbirdə onlara yer verilməməsi həmin dairələrin Qərb tərəfindən də iqnor edildiyinə sübutdur”.
Məhəmmədəli QƏRİBLİ
