Tanınmış politoloq, İqor Korotçenko deyib ki, son vaxtlar Moskvada ermənilər Bakıya qarşı çox fəallışıb: “Vəziyyət indi dinamikadadır. Bu, olduqca gözlənilməz, ziddiyyətli və təhlükəlidir. İndi biz Rusiyada yeni geosiyasi reallıqlarda Moskvanın Cənubi Qafqazda sülh və sabitliyə əvvəlki yanaşmalarına yenidən baxmağı təklif edən erməni lobbiçilərinin aktiv fəaliyyətini, çox kəskin fəallaşmasını görürük. Beynəlxalq hərbi-siyasi vəziyyətin pisləşdiyi, təlatümlərin müşahidə olunduğu bir şəraitdə erməni lobbiçiləri bulanıq sularda balıq tutmağa çalışırlar”.
Rusiyadakı ermənilərin bu fəallaşmasından hansı nəticəni çıxarmaq olar?
Siyasi elmlər doktoru, professor Vaqif Abdullayev “Bakı-Xəbər”ə açıqlamasında bildirdi ki, xaricdəki erməni lobbiçilərinin təsiri və maliyyəsi ilə Ermənistanda intensivləşən etiraz aksiyaları Azərbaycan və Ermənistan arasında sülh müqaviləsinin imzalanmasının qarşısını almağa, revizionist əhval-ruhiyyəni məqsədli şəkildə qızışdırmağa xidmət edir: “Baş verən hadisələr, eyni zamanda bu ölkədə dövlətçilik ənənələrinin hələ də formalaşmadığını və siyasi sistemin təşəkkül tapmadığını, erməni xalqının kortəbii kütlə düçüncəsindən uzağa getmədiyini göstərir.
Revanşizm xəstəliyinə yoluxmuş Ermənistan ərazi iddialarını yenidən alovalandırmaqla, küçələrə tökülüb indiki hakimiyyəti aşırmağa qalxan ermənilər elə bilirlər ki, yeni hökumət qurulacağı halda Qarabağı yenidən işğal edə biləcəklər. Bu, uptopiyadır, xam xəyallardır”.
Ekspertin sözlərinə görə, Ermənistanın sülh sazişini imzalamasında siyasi iradə nümay etdirə bilməməsi, müxtəlif dövlətlərin təsiri altında siyasi oyuncağa çevrilməsi bir daha bu ölkədə milli dövlətçilik prinsipinin, vahid dövlət iradəsinin və əxlaqının mövcud olmadığını təsdiqləyir: “Ermənistanın yaxın strateji müttəfiqinin və etibarlı dostunun olmamasının nəticəsidir ki, mühüm regional və qlobal məsələlərdə tək qalır. Xarici ölkələrdəki erməni diasporasının hesabına mövcudluğunu qoruyan və dəstək alan bu ölkə yerləşdiyi coğrafiyada da təkdir, qlobal nəqliyyat-tranzitlərdən, beynəlxalq layihələrdən kənarda qalıb. Ona görə də, haqlı olaraq Ermənistanı bədnam ölkə adlandırırlar. Bu baxımdan da, Rusiyadakı erməni diasporunun fəallaşmasının prosesə heç bir təsiri olmayacaq. Çünki Azərbaycan dövləti və cənab İlham Əliyev onların bütün planlarının və ideoloji əsaslarını darmadağın edib. Azərbaycan Prezidentinin Ermənistana bu günlərdə növbəti xəbərdarlığı onlar üçün dərs olmalıdır. Xaricdəki erməni diasporu da bilməlidir ki, bu, Ermənistan üçün son şansdır. Ya ölkə sülh yolu tutaraq regional birliyə qoşulacaq, ya da daha ağır dalana dirənib acınacaqlı vəziyyətə düşəcək”.
Məhəmmədəli QƏRİBLİ
