Biz istərdik, YUNESKO-nun nümayəndələri də işğaldan azad olunmuş ərazilərə səfər edərək ermənilərin törətdikləri dağıntıları öz gözləri ilə görsünlər.
Bunu Prezident İlham Əliyev ICESCO-nun Baş direktoru Salim bin Məhəmməd əl-Maliki qəbul edərkən deyib.
Ölkə başçısı Azərbaycanın uzun illər ISESCO ilə səmərəli və uğurlu əməkdaşlıq həyata keçirdiyini vurğulayaraq, torpaqlarımızın ermənilər tərəfindən işğal olunduğu, eləcə də 44 günlük müharibə dövründə ISESCO-nun ölkəmizin ədalətli mövqeyini davamlı dəstəklədiyinə görə minnətdarlığını bildirib. Dövlət başçısı qeyd edib ki, biz istərdik, YUNESKO-nun nümayəndələri də işğaldan azad olunmuş ərazilərə səfər edərək ermənilərin törətdikləri dağıntıları öz gözləri ilə görsünlər. Lakin əfsuslar olsun ki, müharibənin bitməsindən il yarımdan artıq vaxt keçməsinə baxmayaraq, bu təşkilatın nümayəndələri həmin ərazilərə səfər etməyiblər. Prezident onu da qeyd edib ki, ermənilər tərəfindən ölkəmizə vurulan maddi ziyanın qiymətləndirilməsində və bunun beynəlxalq ictimaiyyətə çatdırılmasında ISESCO-nun fəaliyyəti və onun ekspertlərinin iştirakı önəmli rol oynaya bilər.
Görünən odur ki, YUNESKO müxtəlif vasitələrlə nümayişkəranə şəkildə erməni vandalizmini ifşa etməkdən yayınır.
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı YUNESKO-nun məlum biganə münasibətini Qərbin Azərbaycanla bağlı sərgilədiyi ikili standartlarla əlaqələndirdi: “Qərbin siyasi istəyi olmadığı üçün YUNESKO erməni vandalizmini görmək istəmir. Budur məsələnin kökündə dayanan əsas səbəb. Azərbaycan Avropanın bir sıra ölkələrində - Vatikanda, Fransada tarixi abidələrin bərpasına dəstək verib. Ancaq çox təəssüflər olsun ki, Qarabağda çoxsaylı vandalizm aktları, mədəniyyət abidələrinin dağılması faktları ola-ola YUNESKO buna elə bir ciddi reaksiya vermir. Nəinki ciddi reaksiya vermir, heç gəlib vəziyyətlə yerində tanış olmaq da istəmir. Nümayəndələrini ora göndərmir. Bir məqamı da qeyd edim ki, Azərbaycan indi güclü dövlətdir, amma 90-cı illərdə biz zəif idik. O zaman biz Qərb demokratiyasına, ölkələrinə, onların ədalətinə çox inanırdıq. Çünki postsovet ölkəsi idik, sovet rejimindən təzə ayrılmışdıq. İnanırdıq ki, orada haqq-ədalət var. Ancaq məlum oldu ki, bu, heç də belə deyilmiş. Reallıq tamam başqa imiş. Onlar ancaq eşitmək və görmək istədiklərini qəbul edirlər. Digər məsələlərin onlar üçün elə bir önəmi yoxdur. YUNESKO-nun Qarabağla bağlı etinasız mövqe sərgiləməsi buna əyani sübutdur. Ancaq hesab edirəm 44 günlük Vətən müharibəsindən sonra regionda vəziyyətin köklü sürətdə dəyişməsi, biz bizi eşitmək istəməyənləri məcbur edəcəyik ki, o faktları görsünlər və reaksiya versinlər. Çünki beynəlxalq hüquq, qaydalar var və həmin təşkilatlar buna əməl etməyə borcludurlar. Prezident də haqlı olaraq onları tənqid edir”.
Professor onu da əlavə etdi ki, əvvəl-axır YUNESKO nümayəndələri Qarabağa səfər etmək zorunda qalacaq.
Vidai ORDAHALLI
