Qədim və zəngin mədəniyyət ölkəsi olan Azərbaycan bu il dövlət müstəqilliyinin bərpasının 31-ci ildönümünü qeyd edir. İstər əvvəlki dövrlərdə, istərsə də son 31 ildə mədəniyyətin inkişafına daim diqqət göstərən Azərbaycan bugünə kimi öz mənəvi dəyərlərini qoruyub və nəsillərdən nəsillərə ötürə bilib. Ümumiyyətlə, Azərbaycan bəşəriyyətin beşiyi olan nadir ölkələrdən biridir. Burada həyat çox erkən yaranıb və Azıx mağarasında tapılmış azıxantrop Azərbaycanın ən qədim ibtidai insan məskənlərindən biri olmasını sübut edir.
Bütün bunlar hər birimizi maraqlandıran məsələdir. Azərbaycan tarixinin inkişafı zaman-zaman mədəniyyətimizin, adət-ənənələrimizin, elm və təhsilimizin, ədəbiyyatımızın tərəqqisinə səbəb olub. Azərbaycan xalqı dövlətçilik tarixinə, ənənələrinə bağlı bir xalq olaraq o təməllər üzərində böyük mədəniyyət hadisələri yaradıbdır. Ululardan bizə yadigar qalan bir çox adət və ənənələr var ki, onlar kiçik dəyişikliklərə uğrasalar da özlərini qoruya biliblər. Bu gün də sözügedən adətlər, məişət və mədəniyyət hadisələri xalqımızın ümummilli dəyəri olaraq öz yerini qoruyub saxlaylır. Azərbaycanın dövlətçilik tarixinin, milli adət-ənənələrinin, elm və mədəniyyətinin təbliğindən danışarkən müxtəlif dövrlərin hadisələrini təhlil etmək lazımdır. Əlbəttə, bu məsələdə bizə daha çox mütəxəssislərin köməyi dəyə bilər. Zəngin Azərbaycan tarixinin xalqımızın inkişafında rolu böyükdür və bu tarixin geniş təbliğinə ehtiyac var. İnanırıq ki, informasiya-kommunikasiya texnologiyalarının geniş inkişaf etdiyi indiki dönəmdə bu texnologiyaların potensial imkanlarından istifadə etməklə yüksək səviyyədə təbliğatın aparılması nəticəsində bütün dünya əhalisi Azərbaycanın qədim dövlətçilik tarixi, zəngin milli adət-ənənələri, elm və mədəniyyəti barədə daha ətraflı və geniş məlumata malik olacaq. Sözügedən təblğat vasitəsilə ölkəmizin beynəlxalq aləmdə nüfuzunun daha artması təmin ediləcək.
Azərbaycan həqiqətlərinin dünyaya çatdırılmasında mətbuatın rolu və jurnalistlərin fəaliyyəti əvəzolunmaz olub
19-cu əsrin ikinci yarısında yaranan Milli Mətbuatımızın milli-mənəvi dəyərlərimizin, ölkəmizin strateji maraqlarının qorunmasında, Azərbaycan həqiqətlərinin dünyaya çatdırılmasında mühüm rol oynayır. 20-ci əsrin sonlarında yenidən müstəqilliyini əldə edən Azərbaycanın dövlətçilik ənənələrinin formalaşması və qorunmasında, son illərdə həyata keçirilən islahatlar hesabına bütün sahələrdə əldə edilən davamlı iqtisadi inkişafın Azərbaycan modelinin ictimaiyyətə çatdırılmasında milli mətbuatımızın rolu əvəzsizdir.
Prezident İlham Əliyevin həyata keçirdiyi uğurlu siyasət nəticəsində medianın inkişafında keyfiyyət etibarilə yeni mərhələ başlanıb. Bu baxımdan, Azərbaycan Respublikası Prezidentinin 2021-ci il 12 yanvar tarixli Fərmanı ilə yaradılmış Medianın İnkişafı Agentliyi ölkəmizdə çap və onlayn medianın inkişafı, media orqanlarının maliyyə müstəqilliyinin gücləndirilməsi, fəaliyyətinin təkmilləşdirilməsi, mütərəqqi layihələrin davamlı dəstəklənməsi məqsədilə müxtəlif tədbirlər həyata keçirir. 44 günlük Vətən müharibəsində və müharibədən sonrakı dövrdə Azərbaycan həqiqətlərinin dünyaya çatdırılmasında mətbuatın rolu və jurnalistlərin fəaliyyəti əvəzolunmaz olub. Məhz nümayiş olunan peşəkarlıq, fədakarlıq və çeviklik sayəsində dünya ictimaiyyətinə müharibə ilə əlaqədar, o cümlədən rəsmi İrəvanın törədiyi hərbi cinayətlər haqqında dolğun məlumatların çatdırılması mümkün oldu. Öz peşə vəzifələrinin icrası zamanı Kəlbəcər rayonu ərazisində iki jurnalistin minaya düşərək həlak olması faktı isə beynəlxalq jurnalistlər birliyinin sərt reaksiyasına səbəb olub Bu günə qədər fasiləsiz davam edən informasiya müharibəsində mətbuat işçiləri öz peşəkarlığı və vətənpərvərliyi ilə daim fərqlənmişlər.
Diaspor nümayəndələri Azərbaycanın yaratdığı yeni reallıqlar fonunda, yeni strategiya əsasında öz işlərini qurmalıdırlar
Azərbaycanın dövlətçilik tarixinin, milli adət-ənənələrinin, elm və mədəniyyətinin dünyaya çatdırılmasında dünya azərbaycanlılarının, soydaşlarımızın üzərinə çox böyük yük düşür. Mütəmadi olaraq diaspor nümayəndələri Azərbaycanda toplaşır, onların fəaliyyəti ilə bağlı strategiya, hədəflər formalaşdırılır. Artıq Vətən Müharibəsindən sonra yeni baxışlar, yeni strategiya, yeni tapşırıqlar hazırdır. Bu dəfə keçirilən soydaşlarımızın qurultayı çox önəmli oldu. Çox qürurverici bir andır ki, diaspor nümayəndələri işğaldan azad olunmuş Azərbaycanın mədəniyyət paytaxtı, Türk dünyansının mədəniyyət paytaxtı Şuşa şəhərində toplaşdılar. Bu dəfə cənab Prezident İlham Əliyevin xüsusi yol xəritəsi ilə diaspor nümayəndələrinim qarşısında çıxış etdi. Nəzərə çatdırıldı ki, diaspor nümayəndələri Azərbayanın yaratdığı yeni reallıqlar fonunda, yeni strategiya əsasında öz işlərini qurmalıdırlar. Bu gün biz əminliklə deyə bilərik ki, dünyanın hər bir yerində yaşayan azərbaycanlı qürur və fəxarət hissi keçirir. Çünki biz torpaqlarımızı işğaldan azad etmişik, artıq biz ilkin hədəflərimizə nail olmuşuq. Bu gündən sonra isə, Azərbaycanın ən böyük hədəfi regionda öz gücünü və mövqeyini qoruyub saxlaması, Azərbaycanın dayanıqlı inkişaf strategiyasını yerinə yetirmək, dünya dövlətləri ilə Azərbaycanın münasibətlərinin yaxşılaşdırılması, Azərbaycan həqiqətlərinin dünya dövlətləri və xalqları tərəfindən qəbul edilməsidir. Bununla əlaqədar da həm dövlət nümayəndələri, həm də diaspor nümayəndələri və soydaşlarımız səfərbər olaraq birlikdə çalışmalıdırlar.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
