“Biz regional vəziyyəti, Azərbaycanla Ermənistan arasında münasibətlərin normallaşması prosesini geniş müzakirə etdik. Bilirəm ki, Azərbaycandan sonra prezident Ermənistana səfər edəcək. Beləliklə, əminəm ki, bu səfər başa çatandan sonra onda tam təsəvvür formalaşacaq. Amma bizim mövqeyimiz çox açıqdır. Biz Ermənistanla sülh sazişi imzalamaq istəyirik. Biz münasibətləri normallaşdırmaq və düşmənçilik səhifəsini çevirmək istəyirik”. Bu fikirləri prezident İlham Əliyev Litva prezidenti Gitanas Nauseda ilə geniş tərkibdə görüşü zamanı səsləndirib.
Gitanas Nauseda Ermənistana səfəri fonunda üzləşdiyi hadisələr fonunda sülh məsələsində Bakı və İrəvanın hansı mövqedə olması haqda artıq tam təsəvvürə malikdir. Məsələ burasındadır ki, Ermənistanın “Müqavimət” müxalifət hərəkatının üzvləri İrəvana səfər edən Litva prezidentini “Nikol satqındır!”, “Türksüz Ermənistan!”, “ Nikolsuz Ermənistan”, “Ayıb olsun!” şüarları ilə qarşılayıb. Bu da Gitanas Nausedanı bir daha əmin edir ki, məhz ermənilər regionda sülhə qarşıdırlar. Qeyd edək ki, Litva nümayəndə heyətini və Nausedanı iqamətgah binasına daxil olmazdan əvvəl Ermənistan prezidenti Vaaqn Xaçaturyan qarşılayıb. Buna da müxalifət əngəl olmağa çalışıb. Polis “Müqavimət” hərəkatının tərəfdarlarına iqamətgahın darvazalarına yaxınlaşmağa imkan verməyib. Etirazçılar iqamətgahın qarşısında etirazlara davam edib. Bu fonda erməni müxalifəti regionda sülh istəyən ABŞ-a qarşı da aqressivləşib. Buna səbəb ABŞ-ın Ermənistandakı səfiri Linn Treysinin açıqlamalarıdır. Xanım Treysi diplomatik tərzdə Ermənistanda hakimiyyət dəyişikliyinə qarşı olduqlarını bildirib: “Biz erməni xalqına 2018-ci ildə tutduğu və 2021-ci il parlament seçkilərində bir daha təsdiq etdiyi yola əsaslanan gələcək qurmasına kömək etməyə sadiqik”. Daha sonra isə Linn Treysi “Armenpress”ə müsahibəsində bildirib: “ABŞ Azərbaycanla Ermənistan arasında ikitərəfli formatda sülh danışıqları üzrə vasitəçi kimi iştirak etməyə hazırdır”. Diplomat Azərbaycan prezidenti İlham Əliyevlə Ermənistanın baş naziri Nikol Paşinyan arasında aprelin 6-da Brüsseldə sülh danışıqları və sərhədlərin delimitasiyası üzrə ikitərəfli komissiyanın yaradılması ilə bağlı keçirilən görüşü alqışlayıb: “ABŞ Cənub Qafqazda sülh, demokratiya və rifahın çiçəklənməsinə sadiqdir. Dövlət katibi Entoni Blinkenin aprelin 5-də iki dövlətin lideri ilə telefon danışığı zamanı dediyi kimi, biz Azərbaycanla Ermənistan arasında sülh dialoqunun davam etdirilməsinə çağırırıq”. Lakin müxalifət bu barışıq təklifinə qarşıdır. Elə bu fonda Ermənistan müxalifəti Linn Treysiyə qarşı sərt bəyanatlar səsləndirir. Müxalifət iddia edir ki, ölkədə diktatura qurmaq yolunda addımlayan Paşinyan və Azərbaycana səfər etmiş səfir Ermənistanın gələcəyini müzakirə edə bilməz. Onlar bu xüsusda etiraz keçirərək “Treysisiz Ermənistan”, “Nikolsuz Ermənistan”, “Türksüz Ermənistan” şüarlarını səsləndiriblər. Qeyd edək ki, son vaxtlar erməni müxalifəti ABŞ səfirini daha çox tənqid etməyə başlayıb. Bütün bunlar Qərb ölkələrinə açıq göstərir ki, məhz Ermənistanda müəyyən qüvvələr sülhə qarşıdır.
Ermənistanın “1in.am” nəşri yazır ki, bu halda Qərb müxalifət barədə təsəvvürlərini formalaşdırıb və bu qüvvələrlə işbirliyinə getməyəcək: “Bu fonda İrəvan küçələrində parlament müxalifətinin uğursuzluğu qeydə alınır. Əslində isə bu, yalnız ilk baxışdan müxalifətin uğursuzluğudur. Söhbət ümumilikdə Ermənistanın uğursuzluğundan gedir, çünki bütövlükdə ictimai etimad baxımından siyasi hakimiyyətlə rəqabət aparan siyasi müxalifəti olmayan dövlət uğursuzluğa düçar olub. Ermənistandakı siyasi böhranın səbəbi siyasi hakimiyyətlə bərabər legitimliyə malik siyasi müxalifətin olmamasıdır. Bu, kəskin təzahürlərə malik olmayan, lakin dövlət orqanizminin həyati fəaliyyətində həm daxili, həm də xaricdə uzunmüddətli geriləmə yaradan ciddi böhran növüdür. Ermənistanda “proqressiv” məntiqlə siyasi prosesin başlanmasını, onun sistemli, institusional irəliləyişini öz üzərinə götürməyə hazır olan qüvvələr varmı? Bu, dərin siyasi böhranın həllində əsas məsələlərdən biridir. Bu halda Qərb də müxalifətdən üz döndərir”. “Ədalətli Ermənistan” partiyasının lideri Norayr Norikyan da bildirir ki, küçədə meydana çıxan siyasi qüvvələrin fiaskosu göz deşir. Onun sözlərinə görə, gündəliklərinin həyata keçirilməsi nə qədər real olmursa, onların sıraları bir o qədər aqressivləşir: “Belə təəssürat yaranır ki, bu prosesə rəhbərlik edən bəzi adamlar üçün yaranmış çətin vəziyyətdən yeganə çıxış yolu küçələrdə qan tökməkdir ki, yaxın gələcəkdə siyasi oyunda qalmaq spekulyasiyaya çevrilsin... Xalqla tam səmimi olsanız, qarşınıza qoyulan problemləri həll edə bilmədiyinizi bəyan edib evinizə getsəniz, doğru olar. Əminəm ki, 4 ildir davam edən bu nəticəsiz müqavimətdənsə, etirafınız xalq tərəfindən daha yaxşı qəbul ediləcək”. O, dünya ictimaiyyətinin də erməni müxalifətini rədd etdiyini bildirir. Elə bu fonda Türkiyənin xarici işlər naziri Mövlud Çavuşoğlunun açıqlamaları xüsusi diqqət cəlb edir. Onun sözlərindən belə bəlli olur ki, erməni hakimiyyəti müxalifətin təqzyiqlərindən çəkinməyərək, Azərbaycanın xoş niyyətli yaxınlaşmalarına cavab verməlidir. Nazir bildirib ki, Azərbaycan qazandığı qələbədən sonra dünyaya bölgədə sülh və əminamanlıq istədiyini göstərib, Ermənistana hərtərəfli sülh sazişini təklif edib: “Sonra sərhədlərin müəyyənləşdirilməsi üzrə birgə komissiyanın yaradılması gündəmə gəlib, Brüsseldə keçirilən görüşlərdə bu məsələlərlə bağlı razılıq əldə edilib, birgə sərhəd komissiyası yaradılıb. Azərbaycan da Türkiyə ilə Ermənistan arasında danışıqları dəstəkləyir və bu müsbət haldır. Biz həmişə deyirik və təşviq edirik ki, Ermənistan da bu xoşməramlı yaxınlaşmalara cavab versin. Ermənistan administrasiyası daxildə radikallar, xaricdə isə diasporun təzyiqi altındadır. Türkiyə və Azərbaycan isə sülh istəyir, regionun sabitliyi üçün xoş niyyətlərini ortaya qoyublar”.
Samirə SƏFƏROVA
