Yeddi il Ermənistanda əsirlikdə olan və ötən il Azərbaycana qaytarılan Şahbaz Quliyev sensasiyalı və düşmən ermənilərin əlinə bizə qarşı təbliğat aparmaq üçün ciddi əsaslar verə biləcək açıqlama ilə çıxış edib.
Ş.Quliyev Kəlbəcər rayonuna öz ata-babayurdlarını ziyarət etmək üçün yox, Baş nazirin sabiq müavini və Qaçqınların və Məcburi Köçkünlərin İşləri üzrə Dövlət Komitəsinin sabiq sədri Əli Həsənovun tapşırığı ilə getdiklərini iddia edib:
“Çağırıb dedilər ki, “dövlətə lazımsan, getməlisən”. Mən də dedim ki, Dilqəm Əsgərov bələdçi kimi Kəlbəcəri yaxşı tanıyır, onu içəridən çıxarın, gedim. Dilqəm o vaxt tutulmuşdu, Şəmkirdə həbsdə idi.
Dilqəmi çıxarıb gətirdilər. Biz Əli Həsənovun kabinetindən yola salınmışıq. Əlimizə silah verilib, tapança, avtomat, qumbara verilib. Tam təchizatlı getmişik, erməni bunun hamısını çəkib, göstərib.
Əli Həsənova Qarabağdakı fəaliyyətimizlə bağlı 10 kaset vermişəm. Müdafiə Nazirliyində də bilirdilər. Bizim oradan çıxarıb verdiyimiz şəkillər hesabına “general” alanlar var. Biri də Səfər Əbiyevin bacısı oğludur. Mən əsir düşən günü Əli Həsənova verdiyim 10 kaseti ermənilər Xankəndidə gətirib qoydular stolun üstünə”.
Ş.Quliyev əsirlikdə olan zaman ailəsinə qarşı olan laqeydlikdən və hazırkı sosial vəziyyətindən narazı olduğunu deyib. O buna görə özünü öldürəcəyini bildirib və xaricdə yaşayan qızını gözlədiyini deyib:
“Bu gün harada səsim çıxır, götürüb yazırlar ki, “bunlar nə iş görüblər? Gedib orada dana yeyiblər”. 1 ay qalmışam orada, dananı acından ölməmək üçün yemişəm. Danışılası çox şeylər var. Mən onları saxlamışam ki, dövlət sirri kimi qalsın. Qızımın gəlməsini gözləyirəm. Onunla görüşdükdən sonra hər şeyi açıqlayacağam”.
Qeyd edək ki, bu il aprel ayının 1-də Şahbaz Quliyev sosial problemləri ilə bağlı Prezident Administrasiyası qarşısında etiraz edib.
Qaçqınların və Məcburi Köçkünlərin İşləri üzrə Dövlət Komitəsinin sabiq sədri Əli Həsənov Şahbaz Quliyevin ona qarşı ittihamlarına cavab verərkən deyib ki, zəng edin Dilqəm Əsgərova, ondan soruşun o deyər: “Şahbaz adlı adam tanımıram, heç görməmişəm də onun üzünü. Mən Müdafiə Nazirliyi-zadam, yoxsa xüsusi xidmət orqanıyam? Dilqəm Əsgərova yığın, o deyəcək onun danışdıqları nədir və nə üçün danışır. Mənim onunla heç bir əlaqəm olmayıb, elə adam da tanımıram”.
Şahbazla birlikdə girovluqda olan Dilqəm Əsgərovun isə məsələyə münasibəti belə olub:
“Şahbaz Quliyev gözünün içinə qədər yalan deyir. Ondan soruşmaq lazımdır ki, Əli Həsənov kimdir, hansı səlahiyyətin sahibidir ki, bizə silah, kamera verib Qarabağa yola salsın? Mən Kəlbəcərə 1998-ci ildə Hidayət Abdullayevlə, 1999-cu ildə yevlaxlı Rəfi ilə, 2005-ci ildə isə Şahbazla getmişəm. 2010-cu ildə 44 günlük Vətən müharibəsində şəhid olmuş polkovnik-leytenant Anar Əliyevlə, 2007-ci il, 2009-cu il və başqa tarixlərdə digər şəxslərlə getmişəm. Onların adlarını açıqlamıram. Şahbazı Kəlbəcərə yüklərimi daşımaq üçün aparmışam. 2014-cü il iyunun 12-də biz tutulanda Həsən Həsənovu Şahbaz Quliyevə öldürtdülər. Oradakı bütün ermənilər də deyirdi ki, Həsən Həsənovu Şahbaz başından dəyənək vuraraq qətlə yetirib. Buna görə o həbs edilməlidir. Həbs ediləndə ermənilər mənim qollarımı qandallamışdı. Şahbaza dedilər ki, məni vursun. O da vurdu. Mən komaya düşdüm, xəstəxanaya apardılar. Sonra Qırmızı Xaç Komitəsindən gəldilər. Oradan gələn olmasaydı, Həsən kimi məni də öldürəcəkdilər. Həbsxanada bizə isti münasibəti olan erməni vardı. Deyirdi ki, azərbaycanlılara hörməti var. Şahbaz onu Şuşa türməsinin rəhbərliyinə satdı və o cəzalandırıldı. Şahbaz belə adamdır”.
Xatırladaq ki, 2014-cü il iyulun 11-də Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcər rayonunda öz ata-baba yurdlarını ziyarət etmək istəyərkən Ermənistan Silahlı Qüvvələri tərəfindən girov götürülüblər, Azərbaycan vətəndaşı Həsən Həsənov isə öldürülüb. Həmin illərdə işğal altında olan Qarabağda Dilqəm Əsgərov və Şahbaz Quliyev üzərində qanunsuz "məhkəmə" qurulub və "məhkəmə"nin qərarı ilə Dilqəm Əsgərov ömürlük, Şahbaz Quliyev isə 22 il müddətinə azadlıqdan məhrum edilmə cəzasına məhkum olunub.
2020-ci il dekabrın 14-də erməni girovluğunda saxlanılan Şahbaz Quliyev və Dilqəm Əsgərovun təyyarə ilə Bakıya gətirilməsi təmin edilib.
Şahbaz Quliyevin verdiyi açıqlamalarda hüquqi məsuliyyət yaradan məqamlar varmı?
Hüquqşunas Şəmsəddin Əliyev “Bakı-Xəbər”ə açıqlamasında bildirdi ki, Şahbaz Quliyevin son addımları onda da maraq yaradıb: “Bundan əvvəl aksiya keçirib, özünə imtiyaz tələb edirdi. Bu adamın birbaşa məsuliyyətə cəlb edilməsi mümkün deyil. Bunun üçün əsaslar təqdim edilməlidir. Azərbaycan dövləti öz vətəndaşı kimi onların hüquqlarının qorunması istiqamətində əllərindən gələn nə varsa, hamısını edib. Bizim bütün təbliğatımız belə olub ki, onlar öz ata-babalarının məzarlarını ziyarət etmək üçün ora gediblər. Ermənilər isə iddia edirdi ki, bu adamlar ora xüsusi hərbi tapşırıqla gəliblər. İndi Şahbazın danışdıqları erməni təbliğatı ilə sinxronluq təşkil edir. Mən belə başa düşürəm ki, Şahbaz belə üsüllarla özünə hansısa imtiyazları qoparmaq istəyir. Onun tələbləri hüquqi əsaslara söykənmədiyi üçün yerinə yetirilə bilmir. Ancaq bu da o anlama gəlmir ki, buna görə dövləti şantaj etmək lazımdır. Əli Həsənovla bağlı deyilənlər böhtandırsa, onu xüsusi ittiham qaydasında məhkəməyə verib məsuliyyətə cəlb edə bilərlər. Yox, əgər dedikləri təsdiqini taparsa, onda xüsusi bir cinayət təqibi ortaya çıxa bilər. Ancaq biz gördük ki, Əli Həsənov onun dediklərini təkzib edir. Təbiidir ki, Şahbaz Quliyevin açıqlamaları ermənilərin əlinə bizə qarşı təbliğat aparmaq üçün ciddi əsaslar verir. Əgər onun əlində belə faktlar varsa, niyə yazılı şəkildə dövlət qurumlarına təqdim etmir? Bunu ictimailəşdirməklə ölkənin imicinə ziyan gətirməkdən başqa nəyəsə nail olmadı”.
Məhəmmədəli QƏRİBLİ
