Şuşanın UNESCO-nun Ümumdünya Mədəni İrs Siyahısına salınması təklif edilib. Bu təkliflə Maltanın UNESCO üzrə Milli Komissiyasının sabiq rəhbəri Raymond Bondin Şuşadakı “Münaqişədən sonrakı humanitar gündəliyin inkişafı: mədəni mühitin canlandırılması yolu ilə davamlı inkişaf” mövzusunda beynəlxalq konfransında çıxış edib.
“Şuşa UNESCO-nun Ümumdünya Mədəni İrs Siyahısına ən yaxşı namizəddir. Şuşanın gözəlliyi, landşaftı və azərbaycanlıların buraya verdiyi əhəmiyyət bunu bir daha sübut edir”,- deyə R.Bondin bildirib.
Dəfələrlə Azərbaycan tərəfdən müəyyən səviyyələrdə bu fikir səsləndirilib ki, Şuşa bütün irsi ilə UNESCO-ya salınmalıdır. Amma R.Bondin bu təkliflə çıxış edən ilk qərbli mütəxəssisdir.
Bir əcnəbinin Şuşanın UNESCO-ya daxil olunması təklifi ilə çıxış etməsi çox maraqlıdır. Onun təklifini necə dəyərləndirmək olar? Bu təklif UNESCO tərəfindən dəyərləndirilərsə nə əldə edə bilərik?
"Fikrimcə, bu təklif həm UNESCO rəhbərliyi, həm də digər beynəlxalq qurumlar tərəfindən yüksək səviyyədə dəstəklənəcək"
Qafqaz Tarixi Mərkəzinin direktoru Rizvan Hüseynov "Bakı-Xəbər" ə şərhində bildirdi ki, Bondinin təklifi tamamilə əsaslandırılmış və yerində, zamanında irəli sürülmüş təşəbbüsdür:"
"Elə həmin tədbirdə mən özüm də iştirak edirəm. Çox gözəl bir təklifdir. Raymond Bondin bu təşəbbüsü, çağırışı tədbir iştirakçıları tərəfindən çox yüksək səviyyədə qarşılandı və biz onu alqışladıq. O öz geniş çıxışında Şuşanın UNESCO-ya daxil edilməli olduğu barədə təklifini tam olaraq əsaslandırdı və izah etdi. Bildirdi ki, bunun səbəbləri həm Azərbaycan mərkəzi mədəniyyət tarixinin, həm memarlıq üslubunun özünə məxsusluğudur. O, bu regionda Şuşanın əhəmiyyətli və vacibliyini çox gözəl təsbit etdi. Fikrimcə, bu təklif həm UNESCO rəhbərliyi, həm də digər beynəlxalq qurumlar tərəfindən yüksək səviyyədə dəstəklənəcək. Əslində, bu Şuşa, Azərbaycan üçün böyük bir şansdır, böyük qələbə olacaq. Gələn il də Şuşa Türk dünyasının mədəniyyət paytaxtı elan olunub. İstər bu il, istərsə də gələn il Şuşada çox gözəl tədbirlər keçirilməsi gözlənilir. Ümumiyyətlə, Şuşa həm mədəni mərkəzə, həm də burada keçirilən tədbirlərə görə özünəməxsus bir siyasi, elmi mərkəzə çevrilir". R. Hüseynovun fikrincə, Şuşanın bu rolunun artması ümumiyyətlə bütün Qafqaz və qonşu ölkələr üçün əhəmiyyətlidir. Ekspert hesab edir ki, bu, strateji baxımdan Azərbaycanın rolunun regionda artması üçün çox qiymətli bir addımdır.
İradə SARIYEVA
