30 il öz evlərinə qayıtmağın həsrətilə yaşayan şuşalıların geri qayıtmasına çox az qalıb. Prezident İlham Əliyevin sərəncamı ilə 2022-ci ilin “Şuşa İli” elan olunması, eləcə də bu il Şuşada çoxsaylı tədbirlərin keçirilməsi çox mühüm hadisədir və şuşalıların geriqayıdışının, geri köçünün tezliklə baş verəcəyinə bir işarədir.
Şuşa işğaldan azad edildikdən qısa müddət sonra burada tikinti-quruculuq işlərinə, abidələrin bərpası prosesinə başlanıldı. Bu gün ölkə Prezidentinin rəhbərliyi, şəxsi iradəsi, nəzarəti, diqqəti ilə Şuşa yenidən qurulur, yenidən tikilir, yenidən dirçəldilir. Müsbət haldır ki, ölkə vətəndaşları da bu prosesə qol-qanad verir. Şuşada tikinti-quruculuq işləri çox böyük sürətlə aparılır, səbəb də nə qədər mümkündür bir o qədər tez şuşalıları öz evlərinə qaytarmaqdır.
Şuşada nə qədər bina tikilir, neçə məhəllə salınır?
Şuşa Şəhəri Dövlət Qoruğu İdarəsinin İdarə Heyətinin sədri Məftun Abbasov Şuşada tikiləcək binaların sayı və mərtəbəsi açıqlayıb: “Gələn aydan etibarən Şuşada yeni yaşayış massivinin tikintisinə başlanılır”.
Onun sözlərinə görə, Prezident İlham Əliyevin göstərişi ilə Şuşa şəhərində böyük abadlıq və quruculuq işləri görülür: "Yeni tikilənlər sırasında xəstəxana, məktəb, bir çox iaşə obyektləri var. Gələn aydan etibarən isə yeni yaşayış massivinin tikintisinə başlanılır. Artıq tender bitib. Şuşada 24 ədəd dördmərtəbəli bina tikiləcək. Yeni evlər burada xidmət göstərən əməkdaşların yaşaması üçün və gələcəkdə Şuşa əhalisinin buraya köçürülməsi üçündür”.
“960 şagirdlik məktəb olacaq və bütün lazımi avadanlıqla təchiz olunacaq”
Məftun Abbasov həmçinin başqa bir şad xəbər də verib. O deyib ki, bu ilin sonu Şuşada tikilən məktəb təhvil veriləcək və artıq gələn ildən uşaqlar sərbəst məktəbə gedə biləcəklər. "Şuşada 1№-li məktəb var idi ki, ermənilər onu dağıtmışdılar. Prezidentimiz həmin yerdə yeni məktəbin təməlini qoydu. 960 şagirdlik məktəb olacaq və bütün lazımi avadanlıq ilə təchiz olunacaq. Bu məktəb ilk növbədə burada xidmət edən, bərpa-quruculuq işləri aparan şəxslərin uşaqları üçün nəzərdə tutulub. Təsəvvür edin, burada daimi olaraq polislər, həkimlər, qoruğun əməkdaşları fəaliyyət göstərirlər ki, onlar da məktəbə görə ailələrini gətirə bilmirlər".
Tarixi abidələr bərpa edilir, binalar tikilir...
Qeyd etiyimiz kimi 2020-ci ilin sonlarından və 2021-ci ilin əvvəllərindən başlayaraq Şuşada həyat yenidən qurulmağa başlayıb. Məlumdur ki, Şuşa şəhərinin yenidən qurulması üçün 5 hektar ərazi ayrılıb və bu ərazi də az deyil, kifayət qədər böyükdür. Burada tikiləcək yeni binalarda yenidən həyat canlanacaq, əvvəlvə Şuşada çalışan dövlət qulluqçuları da yaşayacaqlar, sonra isə yavaş-yavaş sakinlər köçürüləcəklər. Ekspertlər deyirlər ki, ümumiyyətlə, Şuşada yenidən qurma prosesi sürətlə gedir. Ekspertlər qeyd edirlər ki, inzibati, turizm onbyektləri ilə yanaşı tarixi abidələrə də böyük diqqət yetirilir, çünki bu tarixi Şuşayla bağlı məsələdir. Tikinti-quruculuq prosesi zamanı əsas diqqət yetirilən məqamlardan biri məhz Ermənistanın işğalı zamanı tarixi şəxsiyyətlərin dağılan evlərinin yenidən bərpa edilməsidir ki, artıq bir neçə şəxsiyyətin evi təmir-bərpa olunub, bəziləri isə bərpa prosesindədir. Şuşada aparılan bütün tikinti-quruculuq, bərpa işləri şəhərin yeni yaradılan baş planı əsasında aparılır və bu baxımdan bu şəhərin ruhunun tamamilə uyğundur. Məlumdur ki, burada yaşayış və digər binalar varsa su kanalizasiya xətti mütləqdir. Bu baxımdan kanalizasiya Şuşada yenidən qurulur. Bütövlükdə, bütün istiqamətlərdə yenidənqurma işləri nəinki Şuşada, ümumuyyətlə Qarabağın digər ərazilərində aparılır və bundan sonra da aparılacaq.
“...Böyük qayıdışa az qalıb”
“Qarabağa aparan yol” qəzetinin baş redaktoru, AYB üzvü Əli Mahmud “Bakı-Xəbər”ə bildirdi ki, Şuşaya qayıdacaqları günün sevinci ilə yaşayırlar. Ə.Mahmudun sözlərinə görə, yaşayış binalarının inşası prosesinə yaxın vaxtlarda başlanılması çox mühüm xəbərdir. “Doğurudan da, həm gələn ildən Şuşada məktəbin şagirdlərin ixtiyarına verilməsi, həm də artıq bu yaxınlarda tikinti prosesinə start veriləcəyi xəbəri bizi çox sevindirdi. Şuşalılar hər zaman inanıblar ki, öz şəhərlərinə ayıdacaqlar. Bu gün Şuşada bütün sahələrdə tikinti-quruculuq işləri aparılır. Bu bizə ümid verir ki, tezliklə tikinti-quruculuq prosesi başa çatacaq və biz evimizə qayıdacağıq. Bu gün Qarabağda tikinti işləri, ərazilərimizin yenidən dirçəldilməsi prosesi çox güclü gedir. Bu da onu deməyə əsas verir ki, böyük qayıdışa az qalıb. Əlbəttə, “Böyük qayıdış” prosesinə cənab Prezidentin rəhbərliyi ilə hazırlanılır. Şuşada həyata keçirilən bütün işlər əhalinin ora qayıtması, onların yaşayış səviyyələrinin yüksək səviyyədə təmin edilməsinə hesablanıb. Orada görülən hər bir iş geriqayıdışın sürətlənməsinə, daha tez baş verməsinə təkan verir. Tikinti-quruculuq işləri bunu bir daha əyani şəkildə göstərir ki, tezliklə qayıdacağıq”-deyə Ə.Mahmud qeyd etdi.
Ə.Mahmudun sözlərinə görə, bu gün Qarabağda gedən işlərə bütün dünya maraqla baxır və böyük qayıdış prosesi də Azərbaycanı istəyən dost ölkələrin diqqətindədir...
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
