Putinin araçılığında yeni Əliyev-Paşinyan görüşü - əvvəlkilər real nəticə verdimi?..

Sahil Kərimli: “Azərbaycan heç bir danışıqdan imtina etməməlidir”

img

Azərbaycan Prezidenti İlham Əliyev, Rusiyanın dövlət başçısı Vladimir Putin və Ermənistanın Baş naziri Nikol Paşinyan arasında üçtərəfli görüş keçirilə bilər.

Bunu Rusiya xarici işlər nazirinin müavini Andrey Rudenko  “Qarabağ məsələsinin nizamlanması yollarının axtarışı çərçivəsində yaxın gələcəkdə Azərbaycan, Rusiya və Ermənistan arasında üçtərəfli sammitin keçirilməsi mümkündürmü” sualına cavab olaraq bildirib.

O, üçtərəfli görüşün olacağını istisna etməyib:

“Biz 10 noyabr 2020-ci il, 11 yanvar və 26 noyabr 2021-ci il tarixlərində üçtərəfli bəyanatların ən yüksək səviyyədə gerçəkləşdirilməsi üçün bütün səviyyələrdə sistemli işi davam etdiririk. Liderlər daimi təmasdadırlar. Əgər belə bir ehtiyac yaranarsa, üzbəüz görüşün təşkilini istisna etmirik.

Xarici işlər naziri Sergey Lavrov mayın 12-də Düşənbədə MDB Xarici İşlər Nazirləri Şurasının iclası çərçivəsində Azərbaycan və Ermənistandan olan həmkarları ilə görüşüb. Danışıqların gedişində Bakı və İrəvan arasında münasibətlərin normallaşdırılması məsələlərinin bütün spektrləri müzakirə olunub”.

Məlumdur ki, müharibədən  sonra  Rusiyanın və digər vasitəçilərin iştirakı ilə tərəflər arasında bir neçə dəfə görüş olub. Həmin görüşlərdə Paşinyan konkret olaraq üzərinə öhdəliklər götürüb və bunu imzası ilə təsdiq edib. Sonra isə onların heç birinə əməl etməyib. Vasitəçilər isə bu yöndə Paşinyana hər-hansı təzyiqi göstərmirlərsə, belə nəticəsiz görüşlərə ehtiyac varmı?

Siyasi şərhçi Sahil Kərimli “ Bakı-Xəbər” ə açıqlamasında bildirdi ki, Ermənistanla Azərbaycan arasındakı sülh danışıqları  ilə bağlı ümidlər, gözləntilər hələ tam tükənməyib: “Danışıqların davam etdirilməsi və yeni nəticələrin əldə edilməsi istiqamətində səylər davam etdirilməlidir. Ermənistan təslim olandan sonra gedən proseslərdən hiss edilir ki, sülh sazişinin imzalanması zəruridir. Rusiyanın və Avropa İtifaqı vasitəçiliyi ilə keçirilən görüşlərdə müəyyən konstruktiv irəliləyişlər əldə olunub. Xüsusilə də Avropa İttifaqı rəsmisi Şarl Mişellə keçirilən görüşdə Ermənistan bizim irəli sürdüyümüz 5 bənddən ibarət təklifi qəbul etmişdi.  Ermənistan həmin addımı ilə sülh danışıqlarına hazır olduğuna dair mövqe ortaya qoymuşdu. Sonradan bəzi revanşist qüvvələrin təzyiqi ilə Ermənistan qeyri-konstruktiv addımlar atmağa başlayıb. Nikil Paşinyanın özü də bəzi bəyanatlarında ziddiyyətli fikirlər səsləndirir. Xüsusilə də artıq bizim üçün müzakirə mövzusu olmayan statusla bağlı məsələ ətrafında. Bununla Paşinyan üzərinə götürdüyü öhdəliklərdən boyun qaçırmağa cəhdlər göstərir. Bunların heç bir faydası olmayacaq. Çünki Azərbaycan öz qətiyyətli mövqeyini dəfələrlə bildirib. Bizim mövqeyimiz konkretdir. Yeni müharibənin başlamasını istəmirik. Azərbaycanın yaratdığı yeni reallıqlar çərçivəsində bölgədə sülhün və təhlükəsizliyin təmin olunmasını istəyirik. Çünki istənilən müharibə böyük faciələrə gətirib çıxara bilər. Xüsusilə də Ermənistan üçün bunun nəticələri daha ağır olar. 44 günlük müharibədə Ermənistana elə dərs verilib ki, onun bir daha müharibə etməyə nə ordusu, nə də maddi resursu qalıb. Buna görə də Ermənistanın danışıqlarda konstruktivlik nümayiş etdirməkdən başqa çıxış yolu qalmır. Azərbaycan heç bir danışıqdan imtina etməməlidir”.

Məhəmmədəli QƏRİBLİ

Peşə etikası

Son xəbərlər