“İrəvan Qarabağı Azərbaycanın bir hissəsi kimi rəsmən tanıyıb" - separatçıların ittihamı...

Elşən Mustafayev: “Artıq anlayırlar ki, yeganə çıxış yolları Azərbaycanın yurisdiksiyasını qəbul etməkdir”

img

Qarabağdakı separatçı rejimin “milli assambleyası”nın “ədalət fraksiyası”nın üzvü Metakse Akopyan Ermənistan mətbuatına müsahibəsində deyib ki, Ermənistanın Azərbaycanın 5 təklifinə cavab verməsindən sonra Xankəndidən səs-küylü xəbər gözləmək olar:

“Özünü “dqr” adlandıran respublikanın bütün “nazirləri”, “prezidenti”, “deputatları” təcili olaraq Xankəndini azad etməli olacaqlar. İrəvanın Azərbaycanın təklif etdiyi beş bəndə cavabının təfərrüatını yalnız Bakı onları qəbul etdikdən sonra ictimaiyyətə təqdim etməsi (Bakı Ermənistanın 5 təklifə 6 təkliflə cavabını “absurd yanaşma” adlandırıb) artıq erməni xalqı üçün bir işarədir. İndi nəsə etməyə cəhd göstərmək belə mənasızdır. Bu bəndlərdə “dqr” lehinə heç bir müddəa görmədim. Ümumiyyətlə, bizə göstərildi ki, bütün bunların artıq heç biri olmayacaq. İrəvan Qarabağı rəsmən Azərbaycanın bir hissəsi kimi tanıyıb. Bu onu göstərir ki, biz hamımız Ermənistana qayıtmalı olacağıq”.

Bu vəziyyətdən separatçılarla Ermənistan rəhbərliyi arasında ciddi fikir ayrılıqlarının olduğu nəticəsini çıxara bilərikmi?

Politoloq Elşən Mustafayev “Bakı-Xəbər”ə açıqlamasında bildirdi ki, İrəvan özünü Qarabağda yaşayan ermənilərin müdafiəçisi qismində görür: “Buna görə də hesab edir ki, onların müqəddəratı həll olunmayana kimi Ermənistan  Azərbaycanla hər hansı münasibətin normallaşmasına gedə bilməz. Buna görə də təkidlə qaldırılan status məsələsinə bu qədər önəm verilir. Separatçılar isə  Brüssel görüşündən sonra bir daha dərk etdilər ki,  “status” məsələsi bir xülyadır və separatizmdən əl çəkməsələr ya məhv olacaqlar, ya da Qarabağı tərk edəcəklər. Ora Azərbaycan ərazisidir və oradakı ermənilər də Azərbaycan vətəndaşı kimi yaşamağa üstünlük verməlidir. Separatçıların isə sonu onların özlərinə də, hər kəsə də aydındır.

Qarabağdakı separatçı rejimin tör-töküntülərinin “bəyanatlarına” gəldikdə isə, ilk növbədə onu deyə bilərik ki, Qarabağın separatçılardan təmizlənməsi, həmin ərazinin, Xankəndinin Azərbaycanın yurisdiksiyası altına keçməsinin zamanı artıq yetişib. Və bu zaman da çox qısadır. Separatçılar yaxşı anlayırlar ki, sonlarına az qalıb. Ermənistan heç özünü zəruri olanlarla təmin etmək gücündə deyilsə, Qarabağdakı ermənilərə nə köməyi dəyə bilər? Sadəcə olaraq müharibədən sonra Azərbaycan hökumətinin apardığı humanist siyasət nəticəsində onlara çox ciddi güzəştə gedildi. Erməni separatçıları başa düşməlidir ki, nə qədər tez Azərbaycan dövlətinə tabe olsalar, bir o qədər yaxşı olar. Əks təqdirdə bu problemlər qaçılmaz olacaq. Xankəndidə su qıtlığı və təbii qazla bağlı problem yarananda əhalinin separatçılara qarşı üsyana qalxması göstərdi ki, bu onlar üçün başlanğıcdır. Ermənilərin daha pis günləri qarşıdadır. Azərbaycan təklif edir ki, vətəndaşlığımızı qəbul etsinlər. Bunu etməyən separatçıya biz niyə su və elektrik enerjisi və ya təbii qaz  verməliyik? Bunu separatçılar anladıqları üçün öz talelərini Ermənistanın ixtiyarına buraxmaq istəmirlər. Artıq anlayırlar ki, yeganə çıxış yolları Azərbaycanın yurisdiksiyasını qəbul etməkdir”.

Məhəmmədəli QƏRİBLİ

Peşə etikası

Son xəbərlər