Daxili İşlər Nazirliyi (DİN) Böyük Britaniya səfirliyinin bəyanatına cavab verib. Bununla bağlı DİN bəyanat yayıb. DİN-nin bəyanatında bildirilir: “Artıq xəbər verildiyi kimi, 2022-ci il mayın 14-də bir qrup şəxs Səbail rayonu ərazisindəki “Fəvvarələr meydanı”nda müvafiq dövlət qurumları ilə razılaşdırılmamış aksiya keçirmişdir.
Bu aksiyanın Azərbaycan Respublikasının "Sərbəst toplaşmaq azadlığı haqqında" Qanununa zidd keçirilməsinə baxmayaraq, polis əməkdaşları tərəfindən aksiyaya müdaxilə edilməyib, əksinə, iştirakçıların təhlükəsizliyi təmin olunub və aksiyanın yekununda müvafiq bəyanat səsləndirilib. Aksiya zamanı hər hansı insident qeydə alınmayıb və saxlanılan olmayıb.
Bununla belə, elə həmin gün Böyük Britaniyanın Azərbaycandakı səfirliyinin polisin aksiyaya ciddi müdaxilə etməsi və çoxlu sayda saxlanılan şəxsin olması barədə yanlış məlumat yayması qəbuledilməzdir və Azərbaycan Respublikasının daxili işlərinə əsassız müdaxilədir. Bu aksiyanın təşkilatçıları və iştirakçıları tərəfindən aksiyanın normal şəkildə keçdiyi və polisin davranışının qənaətbəxş qiymətləndirildiyi halda Böyük Britaniyanın Azərbaycandakı səfirliyinin aksiyaya yanlış qiymət verməsi və ittihamedici iddialarla çıxış etməsi başadüşülən deyil. Bu bəyanatı öz xidməti vəzifələrini yerinə yetirən polisin nüfuzuna xələl yetirmək cəhdi kimi qiymətləndiririk.
Böyük Britaniyanın Azərbaycandakı səfirliyini yaydığı bəyanatı təkzib etməyə və yol verdiyi səhvi etiraf etməyə çağırırıq.
Ümid edirik ki, Böyük Britaniyanın Azərbaycandakı səfirliyi iki ölkə arasında əməkdaşlığın və səmimi dialoqun inkişafına xidmət edəcək tərzdə fəaliyyət göstərəcək, süni siyasi əngəllər yaratmaq cəhdindən çəkiləcəkdir”.
“Səfirlik təkzib verdikdən sonra haqq-ədalət yerini tapmış olacaq”
“Polisə Dəstək” İctimai Birliyinin sədri, tanınmış hüquqşünas Şəmsəddin Əliyev “Bakı-Xəbər”ə şərhində bildirdi ki, Böyük Britaniyanın ölkəmizdəki səfirliyinin yaydığı bu əsassız bəyanat beynəlxalq ictimaiyyəti çaşdırmağa xidmət edir. Ş.Əliyev hesab edir ki, səfirlik tez bir zamanda öz səhvini düzəltməlidir. Sözsügedən aksiya ilə bağlı bütün faktların ortada olduğunu deyən Ş.Əliyevin sözlərinə görə, bu aksiyada heç kəsə qarşı hər hansı bir xoşagəlməz hal baş verməyib: “Çox təəssüf edirəm ki, Avropanın inkişaf etmiş və söz azadlığına qiymət verə bilən bir ölkəsinin diplomatik korpusu belə bir həqiqətə uyğun olmayan bəyanat verib. Bu bəyanat, ümimiyyətlə, hüququn və qanunların aliliyinə xələl gətirən birt formada verilib. Əvvəla, Azərbaycanda hər hansı bir aksiyanın keçirilməsi üçün mütləq mənada ən azı bir həftə əvvəl müvafiq icra hakimiyyəti orqanlarına bu barədə məlumat verilməlidir. Onlara icazə verilərsə aksiya keçirə bilərlər. Müasir durumda Azərbaycanda xarici ölkələrin diplomatik korpuslarının şəxsi heyətinin, onların ailə üzvlərinin təhlükəsizliyinin tam təmin olunması bütün dünyaya görk olacaq bir addımdır. Təəssüf hissi keçirirəm ki, İngiltərə səfirliyi bu mənada Azərbaycanın Daxili İşlər Nazirliyinə, Azərbaycan dövlətinin bu istiqamətdəki siyasətinə məmnunluğunu ifadə etmək əvəzinə belə yanlış, həqiqətə uyğun olmayan, səhih mənbələrə söykənməyən belə bir bəyanat yayır. Təbii ki, DİN çox haqlı olaraq onlara “diplomatik missiyaya uyğun” nota göndərib. Mütləq mənada əgər İngiltərə səfirliyi, Böyük Britaniya krallığının diplomatik korpusu öz missiyasına uyğun və beynəlxalq hüququn prinsiplərinə, onun normalarına uyğun şəkildə təkzib verməzsə, bu həmin dövlətin Azərbaycandakı beynəlxalq hüququn prinsiplərinə uyğun diplomatik missiyanı həyata keçirməsinə xələl gətirə bilər. Bütün hallarda, İngiltərə səfirliyinin də tarixin saralmış səhifələrinə diqqətini cəlb edirəm. XIX əsrin əvvəllərinə kimi İngiltərənin koloniyalarında ayrıseçkiliyə yol verilib, insanların azadlıq hüququ pozulub. Martin Lüterin azadlıqla bağlı çox məşhur bir çıxışı vardı, o, “Mənim də bir arzum var” adlı nitq söyləyib. Düşünürəm ki, zaman-zaman insan azadlığı problemi orada olub. Azərbaycan 31 ildir müstəqil dövlətdir və bu dövr ərzində müstəqil dövlətlərin daxili və xarici siyasətinə uyğun həyata keçirilən bütün missiyalar, tədbirlər xarici ölkə səfirlərinin də gözü qarşısında olub. Həmişə də səfirliklər, diplomatik korpuslar məmnunluqlarını ifadə ediblər. Hətta səhv etmirəmsə, Almaniya səfirliyi belə bir fikir səsləndirmişdi ki, Respublika Daxili İşlər Nazirliyinin polis əməkdaşlarının ölkədəki sabitliyin təmin olunması ilə bağlı təcrübəsi, peşəkarlığı, fəaliyyətləri dünyaya nümunə olmalıdır. Bu baxımdan düşünürəm ki, DİN-in səfirliyiə təqdim etdiyi nota xarakterli bəyanatı və təkzib tələb etməsi müasir dünyanın tələblərinə uyğundur. Deyərdim, yeganə Azərbaycan dövlətidir ki, polisi həm cinayətkarlıqla mübarizədə, həm ölkədə vətəndaşların, insanların təhlükəsizliyinin təmin olunmasında, daha çox diplomatik korpusların şəxsi heyətinin, onların yerləşdikləri məkanların mühafizə olunmasında nümunəvi davranışlar, fəaliyyət növü sərgiləyir. Hesab edirəm ki, Böyük Britaniya səfirliyi DİN-in bəyanatına adekvat olaraq təkzib verməlidir. Səfirlik təkzib verdikdən sonra haqq-ədalət yerini tapmış olacaq”.
Ş.Əliyev hesab edir ki, səfirlik Azərbaycanın paytaxtda və regionlardakı təhülkəziliklə bağlı həyata keçirdiyi tədbirlərə, gördüyü işlərə nəzər salmaqdansa, dönüb öz tarixlərinə nəzər salsınlar.
İradə SARIYEVA
