Avrasiya İB rəsmisindən “Qarabağın Rusiyaya birləşmə” referendumu təklifi...

Elşad Musayev: “Rusiya yaxşı bilir ki, Qarabağın Ermənistanın tərkibinə daxil olması mümkün deyil”

img

Rusiya siyasi dairələri, xüsusən son zamanlar Kremlə bağlı şəxslər açıq şəkildə Qarabağla bağlı təhlükəli açıqlamalar verirlər. Bir qədər əvvəl “rus icması” oyununa başlayan Moskva, ardından Stanislav Tarasovun dili ilə Bakını hədələməkdən çəkinməmişdi. Tarasov deyirdi ki, Azərbaycan Qarabağı tam olaraq öz ərazisinə qatarsa, Rusiyanı qarşısında görəcək.

Bu arada Avrasiya İqtisadi İttifaqı İnstitutunun direktoru və Avrasiya Ekspert Klubunun həmtəsisçisi Vladimir Lepexin növbəti təxribatçı və həyasız açıqlama ilə çıxış edib. Lepexin Qarabağı Krımla müqayisə edib və öz aləmində oxşarlıqlar tapıb. Hətta referendum keçirmək, Rusiyaya birləşmək iddiasını ortaya atıb. O bildirib ki, Rusiya üçün Krımla bağlı vəziyyətdə Krım əhalisinin mövqeyi çox vacib idi: “Krım əhalisinin 80%-ni ruslar təşkil edirdi. Onlar Rusiyaya qoşulmaq istəyirdilər, Rusiya buna getdi. Bu zaman Rusiya tərəfi də diqqətini Qarabağda yaşayan insanların əhval-ruhiyyəsinə yönəldir. Niyə o deyir ki, gələcəkdə problemləri həll etmək lazımdır? Təbii ki, bu rəyin təsdiqlənməsi üçün Qarabağda referendum keçirilməlidir”.

Onun sözlərinə görə, Qarabağın statusla bağlı bir neçə variantı var. Lepexin qeyd edir ki, birinci variant Azərbaycanın tərkibində qalmaqdır. “İkincisi “müstəqil respublika” kimi qalmaqdır. Üçüncüsü Ermənistanın tərkibində, dördüncüsü isə Rusiya Federasiyasının tərkibində olmaqdır”.

Bununla bağlı Lepexin qeyd edib ki, Qarabağda yaşayan ermənilər birinci bənd barədə nə danışyacaq, nə də düşünəcəklər. “Onlar qalan üç bəndi nəzərdən keçirəcəklər. Eyni zamanda, Ermənistan rəhbərliyi Qarabağı rədd etdiyi üçün orada yaşayan ermənilər Ermənistanın bir hissəsi olmaq barədə düşünmürlər”.

Lepexinə görə, guya ən optimal variant Qarabağın Rusiyaya birləşdirilməsidir. Bundan əvvəl Azərbaycanı Ermənistana ekspansiyada ittiham edən Lepexin indi də Qarabağda Krıma bənzər referendum keçirilməsi barədə sərsəmləyir.

Maraqlıdır, ard-arda belə təxribat xarakterli açıqlamalar təsadüfdürmü?

  • “Lepexin kimi simasızlar vasitəsilə öz çirkin istəklərini ortalığa atır”

Məsələyə münasibət bildirən Böyük Azərbaycan Partiyasının sədri Elşad Musayevin fikrincə, Kremlə yaxın şəxslərin belə təxribatçı açıqlamalarla çıxış etməsi təsadüf deyil: “Bu il fevralın 22-də Azərbaycanla Rusiya arasında müttəfiqlik haqda bəyannamə imzalandı. O zaman da biz bəyan etdik ki, bu, reallığa hesablanmış məcburi addımlardır. Çünki Rusiya öz siyasətini heç vaxt dəyişməyib və dəyişməyəcək də. Kremlin istəyi odur ki, Cənubi Qafqazda qalsın. Bunun üçün də ən ideal variant Qarabağ kartını oynatmaqdır. O üzdən, Moskva bütün vasitələrlə çalışır Qarabağ problemi həll olunmasın. Ayrı-ayrı nümayəndələri vasitəsilə təxribatçı açıqlamaları dilə gətirir. Xüsusən də Dövlət Dumasında təmsil olunan şəxslər vasitəsilə bu qabardılır. Çünki Rusiya yaxşı bilir ki, Qarabağın Ermənistanın tərkibinə daxil olması mümkün deyil. Ona görə də Lepexin kimi simasızlar vasitəsilə öz çirkin istəklərini ortalığa atır. Hesab edirəm ki, Azərbaycan hökumət səviyyəsində belə təxribatlara dərhal reaksiya verməlidir. Təəssüflər olsun ki, bizim Milli Məclisin deputatları ehtiyatlı və qorxaq mövqe sərgiləyirlər. Hesab edirəm, belə yanaşmadan imtina etmək lazımdır. Daha sərt bəyanatlar verməliyik. Məlum olduğu kimi, Rusiya ordusu Ukraynada uğursuzluğa düçar olur. Diqqəti bunlardan yayındırmaq üçün Qarabağla bağlı təxribatçı açıqlamalarla çıxış edirlər. Rusiya Krımı ilhaq etsə də dünya bunu qəbul etmir. Nə Ermənistanın, nə də Qarabağın Rusiya ilə quru əlaqəsi var. Heç açıq dənizə çıxış da yoxdur. Belə olan halda hansı “birləşmədən” söhbət gedə bilər?”

Bütün hallarda, partiya sədri hesab edir ki, belə təxribat xarakterli açıqlamalara sərt reaksiya verilməlidir.

Vidadi ORDAHALLI

Peşə etikası

Son xəbərlər