Ermənistanın Baş naziri Nikol Paşinyan Moskvada keçirilən Kollektiv Təhlükəsizlik Müqaviləsi Təşkilatı (KTMT) sammitində gülünc vəziyyətə düşüb.
Belə ki, erməni liderin çıxışı, xüsusən qeyri-səlis, həmçinin bir qədər çəkingən nitqi ilə diqqət çəkib. Bundan əlavə, KTMT-yə sədrlik edən Ermənistanın liderinin iclasda sədr kimi davranmaq cəhdi də maraqlı görüntülər ortaya qoyub. Yayılan kadrlarda KTMT liderlərinin N.Paşinyanı heç də sədr kimi qəbul etmədiyi aydın müşahidə olunur. Əsasən də Lukaşenko Paşinyanın sədrliyini gülüşlə qarşıladı. Vəziyyəti belə görən erməni lider sammitə “sədrlik” etdiyini xatırlatmaq məcburiyyətində qaldı.
Bütün bunlar bir daha onu göstərir ki, Paşinyan KTMT dövlətləri arasında ciddi lider kimi qəbul olunmur. Rotasiya qaydasına əsasən quruma Ermənistan rəhbərlik etsə də, prinsipcə bu, nəyisə dəyişməyib. Üzv dövlətlər Paşinyanın timsalında Ermənistana etimad göstərmirlər. Sadəcə, formal qaydada bir araya gəlirlər.
“Mövcud xəritələr Ermənistanın iddialarının yalan olduğunu ortaya qoydu”
Məsələyə münasibət bildirən hərbi ekspert Ramil Məmmədlinin fikrincə, Paşinyan bütün mənalarda KTMT-yə yad siyasi fiqurdur: “Bunu KTMT-nin patronu olan Rusiya prezidenti Vladimir Putin də, digər üzv dövlətlərin prezidentləri də yaxşı bilir. O cümlədən onu da yaxşı bilirlər ki, Qərbin layihəsi olan Paşinyan candərdi bu təşkilatda təmsil olunur. Ona görə də Paşinyana yad siyasi məxluq kimi baxırlar. Paşinyanın imkanı olsa, Ermənistanın KTMT-ni tərk etməsinə çalışacaq. Sadəcə mövcud vəziyyət və Rusiyadan olan asılılıq buna imkan vermir. Paşinyan Ermənistanın baş naziri olandan sonra KTMT-yə qarşı bir sıra fəaliyyətlə məşğul oldu. Xüsusən də Ermənistanda Yuri Xaçaturova cinayət işi açılması bu təşkilata böyük zərbə oldu. Ona görə ki, həmin dövrdə Y.Xaçaturov KTMT-yə rəhbərlik edirdi. Paşinyan isə bu amili nəzərə almadı. Nəticədə onun bu addımı Rusiyadakı siyasi dairələrdə narazılıqla qarşılandı. Daha sonra Stanislav Zasın baş katib olmasını yubatdı. Ondan sonra Azərbaycan 44 günlük Vətən müharibəsi nəticəsində ərazilərini işğaldan azad etdi. Bu zaman, başda Paşinyan olmaqla. Ermənistan siyasiləri KTMT-ni sərt tənqid etməyə başladılar ki, bəs, KTMT Qarabağ müharibəsində Ermənistanın yanında olmayıb. Halbuki, Qarabağın KTMT-yə heç bir dəxli yoxdur. Daha sonra bəyan etdilər ki, 2021-ci ilin mayında Azərbaycan Ermənistan ərazisinə daxil olub, amma KTMT bunu önləməyib. Ancaq mövcud xəritələr Ermənistanın iddialarının yalan olduğunu ortaya qoydu. Buna rəğmən, Paşinyanın təşkilata qarşı tənqidləri səngimir. Bütün bunlar onu göstərir ki, Paşinyan bilərəkdən bu təşkilatı hörmətdən salır. O mənada ki, Ermənistanın KTMT-ni tərk etməsinə zəmin formalaşdırsın”.
Hərbi ekspert onu da qeyd etdi ki, get-gedə KTMT-nin amorf bir təşkilata çevrilməsi ehtimalı böyükdür.
Vidadi ORDAHALLI
