Əskipara kəndinin inzibati ərazisində, Əskipara -Bağanis yolunun kənarında rus hərbçilər hərbi qarnizon yerləşdirmək üçün 2 hektar ehtiyat ərazini icarəyə götürürlər. Bu barədə Ordu.az məlumat yayıb. Saytın qeyd etdiyinə görə, bunu erməni jurnalist Voskan Sarkisyan öz “Facebook” səhifəsində yazıb.
Əskipara sakinləri erməni jurnalistə bildiriblər ki, Rusiya hərbçiləri həmin ərazidə iş görüb, torpaq nümunəsi götürüblər. Rusiya hərbi qulluqçularının Tavus regional administrasiyası ilə 2 hektar torpaq icarəsi müqaviləsi imzalayacağına dair məlumatlar var və hazırda həmin sənəd hazırlanır. “Rusiya qarnizonu üçün bina tikilməsinin bir səbəbi ola bilər: sərhədin demarkasiyası, keçmiş Azərbaycan kəndlərinin ərazilərinin Azərbaycana verilməsi, Ermənistan-Gürcüstan dövlətlərarası zolağının Əskipara-Bağanis hissəsində xidmət etmək”, - deyə erməni jurnalist qeyd edib. Xəbəri dəqiqləşdirmək üçün “1or.am” nəşri Əskipara kəndinin inzibati rəhbəri İşxan Ağbalyanla əlaqə saxlayıb və o, xəbərlə bağlı məlumatının olmadığını bildirib.
Anklavların geri qaytarılmasının gündəmdə olduğu bir vaxtda rus hərbçilərinin Azərbaycana aid ərazilərdə icrayə torpaq götürdüyünə dair xəbərlərin yayılması nəyə xidmət edir? Rus hərbçiləri niyə orada Azərbaycanın razılığı olmadan torpaq icarəyə götürür ki? Bunu hansı haqla, hansı əsasla edir?
“Rusiya hərbçilərinin Azərbaycana aid anklavda torpaq icarəyə götürməsi çox təhlükəli məsələdir”
Siyasi ekspert Rövşən Rəsulov bizimlə söhbətində bildirdi ki, Ermənistan anklavların geri qaytarılmaması üçün istənilən oyunlardan çıxır, hər cür hiylə, kələk işlədir. R.Rəsulovun sözlərinə görə, indi də qəsdən Əskipara-Bağanis yolunun kənarında Rusiya hərbi qarnizonuna icarəyə ərazi verirlər. Bütün bunların qanunsuz olduğunu və üçtərəfli bəyanatla ziddiyyət təşkil etdiyini deyən R.Rəsulovun bildirdiyinə görə, Azərbaycan Xarici işlər nazirinin müavini Xələf Xələfovun 7 anklavın qaytarılacağını bəyan etməsindən sonra baş verənləri təsadüfi saymaq olmaz. “İlk növbədə Əskipara kəndinin inzibati ərazisi bilavasitə Azərbaycanın ərazisi sayılır. Bu gün üçtərəfli bəyanata əsasən həmin ərazilər də Azərbaycana qaytarılımalıdır. İndi xəbər yayılır ki, Ermənistan tərəfi Əskipara-Bağanis yolunun kənarında rus hərbiçilərinə torpaq icarəyə versə, yaxud onlar özləri o ərazini icarəyə götürürsə, orada hər hansı bir qarnizon, yaxud hərbi məqsədli məkan qurmaq istəyirlərsə artıq bu faktın özü Azərbaycanın Ermənistanın işğalında qalan torpaqlarına ikinci bir müdaxilə hesab oluna bilər. Birinci dövr işğal dövrüdür. Bu gün o ərazilərdə işğal faktının davam etməsi və eləcə də rus hərbçilərinin oranı icarəyə götürməsi, bunu Ermənistanın rəsmi dairələri ilə razılaşdırması artıq qırmızı xətlərin keçilməsi anlamını daşıyır. Hesab edirəm ki, Azərbaycanın müvafiq strukturları, Xarici İşlər Nazirliyi, eləcə də digər qurumlar sərt mesajlar verəcəklər. Çünki Rusiya hərbçilərinin Azərbaycana aid anklavda torpaq icarəyə götürməsi çox təhlükəli məsələdir. Bu bilavasitə Azərbaycanın ərazi bütövlüyünə qarşı atılan növbədi addımdır və bu addımın qarşısının alınması üçün dərhal kəskin addımlar atmaq lazımdır. Əks halda ermənilərin ayaqları yer alacaq və onların başlarını boş buraxdıqca daha böyük təxribatlar törədəcəklər”.
R.Rəsulov təəssüflə qeyd etdi ki, burada bizimlə müttəfiqlik bəyannaməsi imzalayan Rusiyanın da barmağı var. Rusiyanın Azərbaycan torpaqlarını Ermənistanla razılaşdıraraq icarəyə götürməsi Azərbaycan dövlətinə hörmətsizlikdir, bütün bunlara son qoyulmalı olduğunu deyən R.Rəsulovun fikrincə, Rusiya Ukraynada uğradığı ağır məğlubiyyətdən dolayı indi də diqqəti Qafqaza yönləndirməyə çalışır. O hesab edir ki, Rusiya bununla da yenidən Qafqazda vəziyyəti gərginləşdirmək istəyir. Cənubi Osetiya və Abxaziya kimi qondarma respublikaların Rusiyaya birləşmək üçün referendum keçirməyə hazırlaşdıqlarını xatırladan siyasi ekspert qeyd edir ki, bütün bunların hamısı Kremldən idarə olunur. “Bütün baş verənlər və Ermənistanın bizim torpaqları rus hərbçilərinə icarəyə verməsi barədə xəbərin yayılması artıq oxun yaydan çıxdığını göstərir. Bunlara qarşı dərhal addımlar atılmalıdır, əks halda bu siyasi həyasızlıqlar, Azərbaycana qarşı törədilən bu haqsızlıqlar davam edəcək. Düşünürəm ki, bunlara qarşı Azərbaycan dövləti sərt addımlar atacaq. Təbii ki, xalqımız da hər zaman Azərbaycan dövlətinin, iqtidarının, hakimiyyətinin yanındadır, təxribatçılara qarşı birləşib onların cavabını verməyə hazırdır”.
R.Rəsulov əlavə etdi ki, AzərbaycanınTürkiyə kimi sarsılmaz və qətiyyətli müttəfiqi var, bu ölkələr arasında keçən il imzalanan Şuşa bəyannaməsinə əsasən, torpaqlarımıza hər hansı bir müdaxilə olarsa Azərbaycan Türkiyədən qardaş yardımı ala bilər. “Artıq Şuşa bəyannaməsinin də işə salınması vaxtı çatıb. Əks halda bu kimi təxribatlar davam edəcək və bu təxribatların qarşısını almaq, Cənubi Qafqazda sülhün bərqərar olması üçün Azərbaycan və Türkiyə birgə şəkildə daha çevik fəaliyyətə başlamalıdır” - deyə R.Rəsulov vurğuladı.
İradə SARIYEVA
