Əli Əlirzayev: “Hava limanları sayəsində ölkələr arasında əlaqələr daha da genişlənəcək”
Məlum olduğu kimi, Türkiyədə Rize-Artvin Hava Limanının açılış mərasimi keçirilib. Bununla Türkiyə dünyada dəniz üzərində inşa edilən cəmi beş hava limanından sayca ikincisinə sahib oldu və ümumilikdə hava limanlarının sayını 58-ə çatdırdı.
Sözügedən hava limanı Qara Dəniz sahili ölkələri ilə hava daşımaları və turizm üçün böyük imkanlar yaradır. Eyni zamanda, məhsulların dünya bazarına çıxarılması sahəsində mühüm rol oynayacaq. O da məlumdur ki, regionda ən çox inkişafda olan ölkələr Türkiyə və Azərbaycandır. Rize-Artvin Hava Limanı da coğrafi baxımdan Cənubi Qafqaza yaxın məkanda yerləşir. Nəzərə almaq lazımdır ki, Azərbaycanda da hava limanlarının sayı artır. Ötən ilin oktyabrında Füzuli Hava Limanının açılışı oldu. Zəngilanda da hava limanı tikilir və bu il istismara verilməsi planlaşdırılır. Eyni zamanda, Laçın rayonunda da hava limanı tikilir. O baxımdan bölgənin ümumi inteqrasiyasında, iqtisadi inkişafında, regionun geosiyasi və geoiqtisadi əhəmiyyətinin yüksəlməsində iki ölkənin hava limanları şəbəkəsi nə kimi rol oynayacaq?
- “Bütün bunlar daşıma xərclərinin azalmasına, iqtisadi-ticarət əlaqələrinin daha da genişlənməsinə gətirib çıxarır”
Məsələyə münasibət bildirən iqtisadçı alim, professor Əli Əlirzayevin fikrincə, bütün mənalarda hava limanları şəbəkəsinin genişlənməsi tərəflər üçün faydalı olacaq: “Hava limanları sayəsində ölkələr arasında əlaqələr daha da genişlənəcək. Gediş-gəliş əhəmiyyətli dərəcədə tezləşəcək. Birbaşa hava daşımalarına şərait yaranacaq. Məsələn, Rizəyə getmək və yaxud da yük daşımaq lazım olduqda birbaşa ora getmək imkanı olacaq. Bunun üçün Türkiyənin digər hava limanlarına getməyə və ondan sonra Rizəyə doğru istiqamət almağa ehtiyac olmaz. O cümlədən, Türkiyədən Qarabağa yüklərin, turistlərin gətirilməsində çoxsaylı hava limanları şəbəkəsi vacib rol oynayacaq. Burada mühüm məqamlardan biri də odur ki, hava daşımalarında xərclər azalacaq. Çünki nə qədər çox hava limanı olursa, bu, bir o qədər məsafənin qısalmasına səbəb olur. Bu da öz növbəsində daşıma xərcləsinin azalmasına təsir edir. Bütün bunlar isə iqtisadi-ticarət əlaqələrinin daha da genişlənməsinə gətirib çıxarır. Ona görə də sadalanan məsələlər bu və ya digər formada bir-biri ilə əlaqəlidir”.
Professor onu da əlavə etdi ki, ümumilikdə bütün bunlar regionun inkişafına təkan verəcək.
Viadi ORDAHALLI
