Arzuxan Əlizadə: “Bu ölkə üçün beynəlxalq hüquq və onun prinsipləri deyilən bir anlayış yoxdur”
“Mənə elə gəlir ki, Azərbaycan öz ekspansiyasını həqiqətən məhdudlaşdırmaq fikrində deyil və ona görə də, xüsusilə Avropanın vasitəçiliyi ilə sərhədlərin indiki vəziyyətini düzəldəcək sənədə ehtiyac yoxdur”.
Bunu erməni mediasına açıqlamasında Avrasiya İqtisadi İttifaqı İnstitutunun direktoru və Avrasiya Ekspert Klubunun həmtəsisçisi Vladimir Lepexin deyib.
Onun sözlərinə görə, Ermənistan Azərbaycanın işğallarının davam edəcəyindən qorxduğu üçün Avropada dəstək axtarır, amma bu məsələdə onun dəstəkçisi yalnız Rusiya ola bilər: “Birincisi, Ermənistan rəhbərliyinin bu prosesi aktivləşdirməsini yanlış hesab edirəm. Amma bunu niyə belə etdiyini başa düşürəm: çünki bununla Ermənistan hökuməti Azərbaycanın ekspansiyasını davam etdirməyəcəyinə dair qeyri-müəyyənliyini ifadə edir. Ermənistanın cavab verəcək heç nəyi yoxdur və ona görə də Ermənistan Avropanın, müxtəlif Avropa təşkilatlarının köməyi ilə Azərbaycana hansısa yolla təsir göstərməyə çalışır ki, 44 günlük müharibənin nəticələri təkcə üçtərəfli sazişdə deyil, hansısa beynəlxalq sənəddə qeyd olunsun. Bu, həm də sərhədlərə aiddir. Ancaq Avropa heç nəyə zəmanət verə bilməz. Əksinə, Birinci Qarabağ müharibəsindən başlayaraq, 44 günlük müharibəyə qədər Ermənistanı burnundan tutub apardı. Mənim fikrim həmişə belə olub ki, Rusiya Federasiyası Cənubi Qafqazda vəziyyətin ən azı müəyyən qədər sabitləşməsinin qarantıdırsa, bu istiqamətdə işləmək lazım idi”.
Lepexinin Rusiyanın vasitəçiliyinə önəm verməsi öz yerində. Ancaq bizim üçün maraqlı olan odur ki, Rusiyadan olan və rəsmi statusa sahib şəxs nə əsasla Azərbaycanın Ermənistanın “işğalını” davam etdirəcəyini deyir?
- “Lepexinin statusunu nəzərə alsaq, rəsmi Bakı buna görə Moskvadan izahat tələb etməlidir”
Məsələyə münasibət bildirən AMİP sədri Arzuxan Əlizadənin fikrincə, Rusiyanı təmsil edən ölkə rəsmilərindən nə desən gözləmək olar: “Çünki bu ölkə üçün beynəlxalq hüquq və onun prinsipləri deyilən bir anlayış yoxdur. Güclüsənsə istənilən ölkəni təhdid edə bilərsən. Dəfələrlə olub ki, Rusiya rəsmiləri Azərbaycanı ya haqsız yerə ittiham ediblər, ya da təhdid ediblər. 2017-ci ildə media vasitələri qarşısında xarici işlər naziri Sergey Lavrov həyasızcasına bəyan etdi ki, Qarabağ məsələsi Azərbaycanın daxili işi deyil. Bundan başqa, hakim “Vahid Rusiya” partiyasının üzvləri dəfələrlə Qarabağa qanunsuz səfər edib, Moskvada separatçılarla görüşüblər və s. Bir ay əvvəl Rusiya Dövlət Dumasının İqtisadi siyasət komitəsinin sədr müavini, deputat Mixail Delyaqin Azərbaycanı “proksi dövlət” adlandırdı. Bu azmış kimi, Azərbaycanın neft sənayesinin məhv edilməsi üçün taktiki nüvə silahından istifadə olunmasının vacibliyini qeyd etdi. İndi də rəsmi status daşıyıcısı olan Vladimir Lepexin Azərbaycanı Ermənistana ekspansiyada ittiham edir. Özü də ortaya fakt qoymadan bunu deyir. Yaxşı Azərbaycan Ermənistana hücum edibsə, o zaman Rusiya və patronu olduğu Kollektiv Təhlükəsizlik Müqaviləsi Təşkilatı (KTMT) hara baxır? Kreml niyə 10 noyabr 2020-ci ildə imzalanmış razılaşmanın bəndlərinin həyata keçirilməsini təmin etmir? Bu baxımdan hesab edirəm ki, Rusiya rəsmilərindən nə desən gözləmək olar. Ancaq Lepexinin tutduğu statusu nəzərə alsaq, rəsmi Bakı buna görə Moskvadan izahat tələb etməlidir. Çünki o, sıradan bir şəxs deyil”.
Partiya sədri onu da əlavə etdi ki, bu kimi məsələlərə son dərəcə həssas yanaşmaq lazımdır.
Vidadi ORDAHALLI
