Ordu-Giresun aeroportundan sonra Türkiyədə dəniz üzərində inşa edilən ikinci hava limanı olan Rizə-Artvin istifadəyə verildi. Limanın açılışında Türkiyə prezidenti Rəcəb Tayyib Ərdoğan və Azərbaycan dövlət başçısı İlham Əliyev iştirak edib. Məhz Türkiyə və Azərbaycan prezidentlərinin təyyarələri Rizədən 34 kilometr, Hopadan 54 kilometr, Artvindən 125 kilometr məsafədə yerləşən Pazar rayonundakı hava limanına ilk eniş edib.
3 milyon kvadratmetr sahədə inşa edilən Rizə-Artvin Hava Limanı 45 metr enində və 3000 metr uzunluğunda uçuş-enmə zolağı ilə bölgənin hava nəqliyyatının inkişafında mühüm rol oynayacaq. 2017-ci il aprelin 3-də təməli qoyulan hava limanının illik sərnişin tutumu 3 milyon olacaq. Hava limanının ümumi qapalı sahəsi 47 min kvadratmetr, terminal binası 32 min kvadratmetrdir. Bundan başqa, onun digər köməkçi binaları var. Bölgənin mədəni elementlərinin izlərini əks etdirən hava limanında çay stəkanı formasında 36 metr hündürlüyündə qüllə, eləcə də yerli memarlığın əks olunduğu terminal binası tikilib. Texniki və inşaat xüsusiyyətləri ilə öz sahəsində dünyanın bir neçə nümunəsi arasında yerini alacaq Rizə-Artvin Hava Limanı 19 futbol meydançası böyüklüyündədir, başqa sözlə, 135 min kvadratmetrdən çox landşaft sahəsinə malikdir. Hava limanının 49 min kvadratmetr sahəsi Qara dənizin coğrafi xüsusiyyətlərinə uyğun gələn 1453 ağacla yaşıllaşdırılıb. Rizə çayını bütün dünyaya tanıtmaq və çayın bağdan stəkana səyahətini tarixi ilə izah etmək üçün Çay Muzeyi və bədii əşyaların yerləşdiyi hava limanında 448 avtomobil tutumlu avtopark var. Şərqi Qara dəniz, Qafqaz və Yaxın Şərq ölkələri arasında potensial trafikdən yaranacaq nəqliyyat zəncirinin də transfer mərkəzi olacaq hava limanı beynəlxalq giriş-çıxışlara açıq daimi hava sərhəd qapısı olaraq təyin edilib.
Hava limanının açılışının Azərbaycan Prezidenti ilə birlikdə edilməsi Türkiyənin və ölkəmizin mövcud münasibətlərinin ən yüksək səviyyədə olduğunu bir daha nümayiş etdirir. Azərbaycan–Türkiyə əlaqələri ulu öndər Heydər Əliyevin dediyi kimi, “Bir millət, iki dövlət” tezisinə əsaslanır. Eyni soykökünə, dilə, dinə, mədəniyyətə və bir çox digər qarşılıqlı bağlara malik olması Azərbaycan və Türkiyə xalqları arasında əlaqələrin daim inkişaf etməsinə şərait yaradır. Ən əsası, Azərbaycan-Türkiyə əlaqələri bütün türk dünyası üçün də mühüm rol oynayır və türkdilli dövlətlər arasında münasibətlərin inkişafına da güclü təsir göstərir. Azərbaycan-Türkiyə qardaşlığı və əməkdaşlığının bütün sahələr üzrə davamlı inkişaf etdirilməsi indiki halda prezidentlər İlham Əliyev və Rəcəb Tayyib Ərdoğanın qardaşlıq münasibətlərindən də qaynaqlanır. Elə bundan irəli gəlir ki, Ərdoğan Rizə-Artvinin açılışına məhz İlham Əliyevi dəvət edib. Xatırladaq ki, bundan əvvəl Türkiyə prezidenti işğaldan azad olunmuş Azərbaycan ərazilərinə səfər edib, Qarabağın hava qapısı olan Füzuli Beynəlxalq Hava Limanının açılışında iştirak edib. İşğaldan azad olunmuş ərazilərimizdə inşa edilən ilk hava limanı - Füzuli Beynəlxalq Hava Limanı cəmi 9 ay ərzində qurulub. Füzuli Hava Limanı hər növ təyyarələri qəbul etmək imkanına malikdir. Bərpa olunan Qarabağda yükdaşımaların əhəmiyyətini nəzərə alsaq hava limanı prosesə xüsusi töhfə verir.
Bundan başqa, məlumdur ki, Azərbaycan və Türkiyə arasında tarixi müttəfiqlik haqqında Şuşa Bəyannaməsi imzalanıb. Azərbaycan-Türkiyə dostluğunun, qardaşlığının və birliyinin yeni təsdiqi sayılan müttəfiqlik münasibətlərinə dair Şuşa Bəyannaməsi hər iki ölkə ilə yanaşı, region və dünya üçün də son dərəcə mühüm əhəmiyyət kəsb edir. Şuşa Bəyannaməsi Azərbaycanla Türkiyənin münasibətlərini müttəfiqlik səviyyəsinə yüksəldir. Azərbaycan və Türkiyə regionun təhlükəsizliyinin qarantiyası rolunda çıxış edirlər. Bundan sonra bütün qonşu dövlətlər və dünya ictimaiyyəti bilməlidir ki, hər iki dövlətin suverenliyini təhdid etmək fikrinə düşənlər yeni regional hərbi-siyasi blokla qarşılaşacaqlar. İki dost və qardaş ölkə indiyə kimi imzaladıqları bütün beynəlxalq sənədlərə, xüsusilə, 1921-ci il 13 oktyabr tarixli Qars müqaviləsinə sadiq olduqlarını bir daha təsdiq edirlər. Qars müqaviləsinin Naxçıvanı Azərbaycanın tərkibində muxtar qurum kimi təsbit edən 5-ci maddəsinin bizim üçün önəmi hələ də qalmaqdadır. Belə ki, Zəngəzur dəhlizinin açılmasına və həmin dəhlizin davamı kimi Naxçıvan-Qars dəmir yolunun tikintisinə təminat verilir. Həmçinin Türkiyə-Rusiya Birgə Mərkəzinin fəaliyyəti Türkiyəyə qarşı əsassız soyqırımı iddialarının qarşısının alınmasında faydalı ola bilər. Bu Bəyannamə, həmçinin qlobal əməkdaşlığa töhfə verməsi və bütün çağırışlarla birgə mübarizə istiqamətində də önəmlidir. Şuşa Bəyannaməsi sadəcə Azərbaycan və Türkiyə ilə məhdudlaşmır, böyük Türk birliyinin gələcək təməlini qoyan bu sənədin iki ölkənin sərhədlərini aşaraq bütün türk coğrafiyasını əhatə etməsi şübhəsizdir. Bəyannamənin imzalanması ilə Prezident İlham Əliyevin liderliyi sayəsində Azərbaycan qarşısında duran çox mürəkkəb və taleyüklü məsələlərin həllinə nail oldu, öz tarixi inkişafının zirvəsinə yüksəldi. Eyni zamanda Rəcəb Tayyib Ərdoğanın rəhbərliyi dövründə Türkiyə dünyanın aparıcı ölkələrindən birinə çevrildi və hazırda bütün sahələrdə yüksək tərəqqi nümayiş etdirir. Bu mənada Bakı və Ankara münasibətləri bütün türk dünyasında əlaqələrin möhkəmlənməsinə xidmət edir. Bütün dünyaya nümunə olan və daim güclənən Azərbaycan və Türkiyə münasibətləri dayanmadan inkişaf edir, əməkdaşlığın yüksək səviyyəsi hərtərəfli əlaqələrin gücündən və sarsılmazlığından xəbər verir.
Tahir TAĞIYEV
