Son zamanlar ermənilər yenidən saxta xəritələr yaymaq məsələsində aktivləşiblər. “Böyük Ermənistan” xülyası ilə yaşayan bu xəstə təfəkkürlü toplum özlərini o qədər aldadıblar və öz yalanlarına o şəkildə aludə olublar ki, indi də yalansız yaşaya bilmirlər. Qondarma “Böyük Ermənistan”ın yeni “xəritəsi” yayımlanıb.
Məlumatlara görə, “xəritə”ni 20-ci əsrin sonu və 21-ci əsrin əvvəllərinin erməni filosofu, hərbi strateqi Kristina Petrosyan buraxıb. Qeyd edilənə görə, əvvəllər “Böyük Ermənistan” Kürün sağ sahilinə qədər idi və Abşeron bura daxil deyildi. İndi isə “sərhəd” Qafqaza qədər yuxarı çəkilib. Bundan əlavə, xəritədə üç “Tigranakert” təsvir olunub. Maraqlıdır ki, “Kiçik Ermənistan” “Böyük Ermənistandan” ayrı verilib.
Qondarma “Böyük Ermənistan” xəritəsi niyə yenidən ortaya atılıb?
Qasım Hacıyev:“Bu saxta xəritənin yenidən gündəmə gətirilməsi təsdüfi deyil, çünki bu, Ermənistandakı revanşist qüvvələrin çirkin maraqlarına xidmət edir”
AMEA-nın Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, bu, saxtakarlıqdan başqa bir şey deyil və ermənilərin xəstə xülyaları o qədər genişlənib, indi də bu “xəritə”ni başqa cür ortaya çıxarırlar. “Bu saxta xəritənin yenidən gündəmə gətirilməsi təsdüfi deyil, çünki bu, Ermənistandakı revanşist qüvvəllərin çirkin maraqlarına xidmət edir. Təəssüf ki, ermənilər heç zaman öz yalanlarından əl çəkmir, yeni kitablar, xəritələr ortaya çıxarırlar. Bir vaxtlar qondarma “Böyük Ermənistan” xəritəsi daha geniş yayıldı, hər yerdə yayırdılar. Sonra səngidi. Neçə illərdir erməni alimləri yalanlarla, cəfəngiyyatlarla məşğul olurlar. Son tədqiqatlar da göstərir ki, ermənilərin “Böyük Ermənistan”a “daxil etdikləri” ərazilərin heç birinin ermənilərə aidiyyəti yoxdur. Yenə də təkrar edirəm ki, ermənilərin Qafqaz coğrafiyasında dövləti, ərazisi olmayıb. Erməni tarixdə dövləti olmayan bir toplumdur və hərəsi də bir yerə dağılıb. Faktiki olaraq, bu saxta tarixi də, saxta xəritələri də erməni diasporu ortaya çıxarır, onlar çəkdirirlər. Bu gün erməni ayağı dəyən-dəyməyən hər yerin bu saxta xəritəyə daxil edilməsi gülüncdür. “Böyük Ermənistan” məsələsinin qoyuluşu başdan-ayağa səhvdir, belə bir dövlət olmayıb. Bir məsələni də demək lazımdır ki, ermənilər belə xəritələr çox çəkib, belə uydurmaları çox yazıb. Hətta “Tarixi atlas” yaratmışdılar. Bu gün də xülyası ilə yaşadıqları üç dəniz arasındakı uydurma “Böyük Ermənistan” məsələsini qabartmaqla yenə öz mahiyyətlərini ortaya qoyurlar. “Böyük Ermənistan” dedikləri ərazilərin əsl sahibləri, o dövlətlərin gerçək xəritələri ortaya çıxanda ermənilər gərək utanıb xəcalət çəksinlər. Amma xəcalət çəkmirlər”.
Hafiz Cabbarov: “Tarixin ən böyük mifi elə məhz “Böyük Ermənistan”la bağlıdır”
Tarixçi Hafiz Cabbarov da bizimlə söhbətində bu “xəritənin” cəfəngiyyat olduğunu dedi.
“Tarixdə böyük xalqlar var və böyük xalqların özləri kimi tarixləri də böyük olub, böyük tarix yaradıblar. Onlar böyük və zəngin dövlətçilik ənənələrinə malikdirlər. Ancaq ermənilərin bir toplum olaraq tarixləri tamamilə heç bir böyüklüklə əlaqəsi olmayan əfsanələrdən ibarətdir. Ermənilərdə sadəcə o “böyük” sözünü böyük yalanla, böyük miflərlə assosiasiya etmək olar. Tarixin elə ən böyük mifi elə məhz “Böyük Ermənistan”la bağlıdır. Yəni ermənilərin yaratdıqları yalnız və yalnız böyük yalan və böyük mif ola bilər. Bu qondarma xəritəni ortaya atan erməni “hərbi strateqi” əgər strategiyanı bilsəydi və ermənilərdə belə strateqlər olsaydı, ermənilər bu gün məğlub duruma düşməzdilər. Bu bir daha göstərir ki, Petrosyan öz sahəsində düz-əməlli mütəxəssis deyil, o ki qala tarix sahəsində. “Böyük Ermənistan” deyilən anlayış tamamilə ermənilərin uydurmasıdır və bu, əyləncə yerlərindəki böyütmə güzgülərində özlərini “böyük” görən adamların davranışına bənzəyir. Ermənilər də tarix güzgüsündə öz tarixlərini süni surətdə şişirtmək istəyirlər...”
H.Cabbarovun qeyd etdiyinə görə, ermənilərin özlərinin “erməni tarixinin” atası saydıqları Musa Xorenli öz əsərlərində yazır ki, biz haylar kiçik, azsaylı, zəif, çox hallarda özgələrin hakimiyyəti altında yaşayan xalqıq. “Bu tarixən belə olub və belə olmaqda da davam edir. Ermənistanın təcavüzkar siyasəti davam etdikcə onların tarixi inkişafı da həmişə şübhə altında altında olacaq. Yersiz-yurdsuz toplum olaraq dünyaya səpələniblər, bunun da səbəbi “harda qarnın doyursa ora vətəndir” atalar sözündə göstərilib. Ermənilərin harada qarınları doyursa vətənləri ora olub. Bəzən onların “böyük”, “möhtəşəm”, “tarixi şəxsiyyət” adlandırdıqları və “Böyük Ermnənistan”a peyvənd etdikləri Tiqrana, Arataşesə və başqalarına gəlincə, “Erməni xalqının tarixi” kitabında qeyd edilir ki, nə Tiqranın, nə Artaşesin, nə də digərlərinin erməni olduğunu heç kim heç nə ilə sübut etməyib. Yəni ermənilər özləri də öz tarixləri ilə bağlı nə qədər yalanlar danışsalar da, bəzən həqiqətləri etiraf ediblər”- deyə H.Cabbarov qeyd etdi.
İradə SARIYEVA
