Mayın 12-də Azərbaycanın mədəniyyət paytaxtı Şuşa şəhərində V “Xarı Bülbül” Beynəlxalq Folklor Festivalının açılışı olub. Prezident İlham Əliyev və birinci xanım Mehriban Əliyeva festivalın açılışında iştirak ediblər.
Şuşa şəhərinin 270 illiyi ilə əlaqədar Prezident İlham Əliyevin Sərəncamı ilə elan edilən “Şuşa İli”ndə keçirilən V “Xarı Bülbül” Beynəlxalq Folklor Festivalı Heydər Əliyev Fondu, Mədəniyyət Nazirliyi və Şuşa Şəhəri Dövlət Qoruğu tərəfindən təşkil olunub. Mayın 14-də başa çatacaq sayca beşinci festivala xarici ölkələrdən müxtəlif folklor üslublarında çıxış edən musiqiçilər, rəqs kollektivləri, həmçinin Azərbaycanın müxtəlif regionlarından folklor kollektivləri qatılıb.
Xatırladaq ki, Şuşa şəhərində ilk “Xarı Bülbül” festivalı məşhur xanəndə, pedaqoq, xalq artisti Seyid Şuşinskinin (1889-1965) 100 illik yubileyi ilə əlaqədar 1989-cu ildə keçirilib. Tədbir həmin ilin mayında – Şuşada xarıbülbülün çiçəklənmə dövründə təşkil olunub.
Prezident, müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun Vətən müharibəsində şanlı Qələbəsindən sonra ənənəvi “Xarı Bülbül” festivalı yenidən Şuşa şəhərində təşkil edildi. 2021-ci il mayın 12-13-də Şuşanın Cıdır düzündə Heydər Əliyev Fondunun təşkilatçılığı ilə keçirilən festivalın açılışında Azərbaycan Prezidenti İlham Əliyev, birinci xanım Mehriban Əliyeva və ailə üzvləri də iştirak ediblər. Festival çərçivəsində milli rəqs, muğam sənəti təqdim olunub, ölkəmizin müxtəlif regionlarını və milli azlıqları təmsil edən folklor kollektivlərinin konsertləri keçirilib, Azərbaycan xanəndələrinin müxtəlif illərdə Şuşada lentə alınmış ifalarından ibarət videoçarxlar nümayiş etdirilib, klassik musiqi əsərləri təqdim olunub.
Qeyd etdiyimiz kimi, mayın 12-də dünyaya səs salan festivalın açılışında Azərbaycan Prezidenti İlham Əliyev və birinci xanım Mehriban Əliyeva iştirak edib. Festival çərçivəsində milli rəqs, muğam sənəti təqdim olunub, ölkəmizin müxtəlif regionlarını və milli azlıqları təmsil edən folklor kollektivlərinin konsertləri keçirilib, Azərbaycan xanəndələrinin müxtəlif illərdə Şuşada lentə alınmış ifalarından ibarət videoçarxlar nümayiş etdirilib, klassik musiqi əsərləri təqdim olunub.
Şuşada keçirilən müxtəlif festivallar, poeziya günləri bir daha Azərbaycan mədəniyyətinin mətbəx və xalq yaradıcılığının nə dərəcədə zəngin, nə qədər qədim olduğunu sübut edir. Bu qədimlik özü də azərbaycanlıların Şuşada, Qarabağda ta əzəldən yaşadıqlarına dəlalət edir.
Dünyanın müxtəlif ölkələrindən olan musiqi və sənət kollektivlərinin festivalda çıxışı Ermənistan kimi təcavüzkar ölkələrə hansı siyasi mesajlar verdi?
Jalə Əliyeva: “30 illik ayrılıqdan sonra mədəniyyət paytaxtımız olan Şuşada “Xarı Bülbül” musiqi festivalının keçirilməsi tarixi əhəmiyyət daşıyır”
Millət vəkili Jalə Əliyeva qeyd etdi ki, bu gün yenə də bütün dünyanın gözü Azərbaycanda – Şuşadadır: “30 illik ayrılıqdan sonra mədəniyyət paytaxtımız olan Şuşada “Xarı Bülbül” musiqi festivalının keçirilməsi tarixi əhəmiyyət daşıyır. Bu tədbir insanların-musiqiçilərin, rəqqasların, xanəndələrin, rəssamların bir sözlə bütün sənət aləminin və təbii ki, siyasətçilərin diqqətini cəlb etməkdədir. Biz bununla bütün dünyaya bir daha bəyan edirik ki, biz artıq qayıtmışıq, biz Şuşadayıq. 30 ildən artıq tapdaq altında qalan torpaqlarımızın hər qarışı uğrunda qəhrəmanlıqla mübarizə apardıq. Kapitulyasiya aktının imzalandığı gündən artıq Şuşaya yol çəkilməsi, Qarabağda infrastruktur işlərinə başlanılması özlüyündə Azərbaycanın bir daha iradəsindən, qətiyyətindən xəbər verir. Bu nailiyyətlərin hər birinin arxasında ölkə başçısı İlham Əliyevin dəmir iradəsi dayanır. Bütün dünya bir daha bu gün Azərbaycanın gördüyü işlərin şahidi olur. Biz Qarabağın hər bir bölgəsini yenidən cənnət məkanına çevirəcəyik. Məcburi köçkünlərimiz və qaçqınlarımız öz dədə-baba yurdlarına qayıdacaqlar. Azərbaycan bundan sonra inkişaf etmiş ölkə olaraq Cənubi Qafqazın parlaq bir ulduzu kimi hər zaman parlayacaq”.
Rəşad Mahmudov: “Şuşada V “Xarı Bülbül” Beynəlxalq Folklor Festivalının keçirilməsi sıradan bir mədəniyyət hadisəsi deyil”
Millət vəkili Rəşad Mahmudov bildirdi ki, müzəffər Ali Baş Komandan, Prezident İlham Əliyevin iştirakı ilə Şuşada V “Xarı Bülbül” Beynəlxalq Folklor Festivalının keçirilməsi sıradan bir mədəniyyət hadisəsi deyil. Bu, həm də Azərbaycanın bütün dünyaya musiqi dolu humanizm mesajıdır: “Bu, həm də onu bildirir ki, bizim kimsənin torpağında gözümüz yoxdur, biz bütün xalqlara, onların adət- ənənələrinə, dəyərlərinə hörmətlə yanaşırıq. Ölkəmizin apardığı siyasət ədalət üzərində qurulub. Azərbaycan multikultural dəyərləri, insanların mədəni müxtəlifliklərini qoruyan, ölkəmizdə yaşayan bütün xalqların inanc və əqidələrinə dözümlü yanaşan nümünəvi ölkələrdəndir. Qarabağın azadlığı sevincinə qarışan keçənilki və builki musiqi festivallarında da ölkəmiz bu tolerantlıq ənənəsinə sadiq qalaraq multikultural təhlükəsizliyin mükəmməl Azərbaycan modelini ortaya qoydu”.
Günel CƏLİLOVA
