Ermənistanın Baş naziri Nikol Paşinyan İrəvanda Rusiya Baş nazirinin müavini Sergey Overçuk və xarici işlər nazirinin müavini Andrey Rudenko ilə görüşüb. Görüşdə Cənubi Qafqazda kommunikasiyaların açılması ilə bağlı məsələlər müzakirə edilib.
Paşinyan qeyd edib ki, Ermənistan tərəfi bu istiqamətdə müsbət nəticələrin əldə olunmasında maraqlıdır: “Biz regional, avtomobil və dəmir yolu kommunikasiyalarının açılması üzrə üçtərəfli işçi qrup çərçivəsində artıq görülən işləri yüksək qiymətləndiririk. Bu mövzunun bizim üçün nə qədər vacib olduğunu bilirsiniz, çünki biz konkret həll yolları tapanda bu, regiondakı vəziyyəti dəyişəcək. Biz konkret müsbət nəticədə maraqlıyıq”.
Öz növbəsində, Overçuk Rusiya-Ermənistan-Azərbaycan arasında nəqliyyat kommunikasiyalarının yaradılması ilə bağlı Paşinyanın qiymətləndirmələrini bölüşüb və Nikolun səylərini yüksək qiymətləndirib.
Bundan əvvəl Prezident İlham Əliyev Overçukla görüşündə Azərbaycanın dəmir və avtomobil yollarının çəkilməsi ilə bağlı gördüyü konkret işləri sadaladı. Eyni zamanda qeyd etdi ki, Ermənistan tərəfindən bunlarla bağlı heç bir işə başlanılmayıb. Ermənistan öz ərazisindən keçməsi nəzərdə tutulan avtomobil yolu marşrutunun coğrafi koordinatlarını belə qeyd etməyib. Azərbaycanın bu məsələni dəfələrlə qaldırmasına baxmayaraq, Ermənistan tərəfindən bununla bağlı heç bir cavab gəlməyib.
Belə olan halda Overçukun Paşinyanın səylərini yüksək qiymətləndirməsi nə deməkdir?
“Görünən odur ki, Rusiya kommunikasiya xətlərinin açılması ilə bağlı tələsmir”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, bütün bunlar Rusiyanın kommunikasiya xətlərinin tezliklə açılmasında maraqlı olmadığını göstərir: “Azərbaycan sözügedən məsələdə üzərinə düşən öhdəlikləri tamamilə yerinə yetirir. İstər dəmir, istərsə də avtomobil yolunun çəkilməsi istiqamətində sürətli işlər görülür. Ermənistanın isə sözügedən məsələ ilə bağlı mövqeyi vəd verməkdən o tərəfə keçmir. Gah Mehridən keçəcək dəmir yolunun çəkilməsi üçün maliyyə vəsaiti tapa bilmədiklərini bəyan edirlər, gah da avtomobil yolu marşrutunun coğrafi koordinatlarının verilməsini yubadırlar. Ona görə də hər hansı iş görülmədiyi halda Ermənistanın səy göstərdiyini deməyin özü siyasi naşılıqdır. O cümlədən, bu, siyasətdə ikiüzlülüyün təzahürüdür. Fikrimcə, əslində Rusiya Ermənistandan keçəcək yolların tezliklə açılmasında maraqlı deyil. Maraqlı olsaydı, o zaman bununla bağlı rəsmi İrəvana hansısa təzyiqlər edərdi. Belə baxanda, Rusiyanın əlində bununla bağlı yetərincə təsir rıçaqları var. Bununla yanaşı, Ermənistanda dəmir yollarının idarəçiliyi Rusiyanın əlindədir. Overçukun məlum fikirlərini diplomatik nəzakət də hesab etmək olmaz. Çünki bunun üçün elə bir əsas yoxdur. Sadəcə görünən odur ki, Rusiya kommunikasiya xətlərinin açılması ilə bağlı tələsmir. Baxmayaraq ki, həmin yolların açılması Rusiyanın da xeyrinə olacaq. Çünki yolların açılması bütövlükdə həm regionun inkişafına xidmət edəcək, həm də Rusiyanın bir sıra regionlara çıxışını təmin edəcək. Ancaq əfsuslar olsun ki, Rusiya bu yöndə gərəkən addımları atmır”.
Partiya sədri onu da əlavə etdi ki, Ermənistan prosesi yubatmaqda davam edərsə, o zaman həmin yollar İrandan keçəcək.
Vidadi ORDAHALLI
