Uzun illərdir ki, türkfobiya, Azərbaycanfobiya Ermənistanın dövlət siyasətinə çevrilib. Yalnız meydanlara çıxıb antitürk, anti-Azərbaycan çağırışları edən revanşistlər deyil, bağça uşaqlarından tutmuş sadə vətəndaşlara qədər hər kəsdə türk millətinə qarşı kəskin nifrət var. O da gizlin deyil ki, ermənilər uşaqlarını beşikdəykən anti-türk ruhunda böyüdür. Antitürk siyasətini cəmiyyətin hər köşəsinə hopduran Ermənistan bu gün beynəlxalq aləmdə pis vəziyyətdə qalıb, türkofobiya ona baha başa gəlir.
Ermənistanın keçmiş deputatı Arman Babacanyan erməni mətbuatına diqqət çəkən açıqlama verib. Babacanyan deyib ki, ermənilərin Haaqa məhkəməsində nəzərdən keçirilən iddiası ləğv edilib: “Siz başa düşürsünüz ki, Haaqada nəzərdən keçirilən nifrət və dözümsüzlükdən bəhs edən iddiamız İrəvanın mərkəzində “türk” sözündən mənfi konnotasiya ilə istifadə edilməsi ritorikası ilə aradan qaldırılıb?! Rəqiblərimiz bundan çox gözəl yararlanacaqlar”.
Belə görsənə bilərmi ki, Haaqa da Ermənistandan üz döndərir? Bu, Azərbaycanın haqlı olduğunun qəbul edildiyi anlamına gəlirmi?
“Monoetnik dövlətə çevrilmiş Ermənistanın Haaqada iddialarının rədd edilməsinə təəccüb etməyə dəyməz”
Siyasi ekspert Rövşən Rəsulov “Bakı-Xəbər”ə şərhində bildirdi ki, artıq beynəlxalq insan haqları məhkəməsi də Azərbaycanın haqlı olduğunu anlamağa başlayıb. “Haaqa məhkəməsinə aydın olub ki, Ermənistanda türkfobiya, türkə nifrət, anti-Azərbaycan, anti-Türkiyə mövqeləri get-gedə daha da artmağa başlayır. Son proseslər, xüsusən Ermənistanı bürüyən aksiyalarda türklərə, türk xalqına qarşı səsləndirililən şüarlar da belə qənaətə gəlməyə əsas verir ki, Haaqa Məhkəməsi Ermənistanın apardığı siyasəti tam olaraq dərk etdiyi üçün ermənilərin Azərbaycana qarşı qaldırdığı əsassız iddianı rədd edib. Fakt budur ki, Haaqa məhkəməsinin Ermənistanın türkfobiya siyasətini ifşa etdiyini ermənilər özləri də etiraf edirlər. Etiraf edirlər edirlər ki, onlar türkfobiyanı və bu kimi mövqelərini davaç etdirdikcə daha çox zərərlərə, daha çox siyasi uğursuzluqlara, bu kimi məhkəmə ifşalarına düçar olacaqlar. Onu da nəzərə alaq ki, Azərbaycan da eyni iddialarla çıxış edib və Haaqa məhkəməsinə üz tutub”.
R.Rəsulovun sözlərinə görə, torpaqlarımız işğal altında qaldığı müddətdə Ermənistanın siyasi baxışını terrorizm, türkfobiya üzərində qurulduğunu sübut edən dəlillər təqdim edib, iddia qaldırıb. R.Rəsulov bildirdi ki, artıq iddiamızın qəbul olunduğu məlumdur. “Haaqa da Azərbaycanın iddiaları qəbul edilib, amma Ermənistanın Azərbaycana qarşı iddiaları tam əsasslandırılmış şəkildə rədd edilib. Bu həm də onu göstərir ki, Azərbaycanda ksenefobiya, digər xalqlara, dinlərə qarşı dözümsüzlük faktoru ümumiyyətlə mövcud deyil. Bunu Azərbaycanda yaşayan başqa xalqlar da, ölkəmizə gələnlər də deyir. Azərbaycan tolerant bir ölkədir, bunu dünya bilir. Amma Ermənistanda bunları müşahidə etmək mümkün deyil. Buna görə də biz belə deyə bilərik ki, Haaqa Ermənistandan həqiqətən də üz döndərir. Halbuki, ermənilərin bu məhkəməyə ümidi vardı. Artıq Ermənistanda gedən proseslər sübut edir ki, Ermənistan yalnız insan haqqları məsələsinə deyil, bütövlükdə regionda sülhün bərqərar olmasına ciddi maneələr törədir. Hakimiyyətdə kimin olmasından asılı olmayaraq ümumi erməniçilik fikri formalaşıb. Erməniçilik fikri antitürk, türkfobiya, eləcə də antiislam mövqeyinə yönəlib. Monoetnik dövlətə çevrilmiş Ermənistanın Haaqda iddialarının rədd edilməsinə isə təəccüb etməyə dəyməz”- deyə R.Rəsulov vurğuladı.
İradə SARIYEVA
