Paşinyan hərbi əsirlər oyununu yenidən qızışdırır - 38 əsir hardadır?..
“Hazırda Azərbaycanda azı 38 erməni əsir var”. Bu sərsəm xarakterli açıqlamanı Ermənistanın Baş naziri Nikol Paşinyan Niderlandın Klinqendal Beynəlxalq Münasibətlər İnstitutunda çıxışı zamanı səsləndirib.
Paşinyan iddia edib ki, Azərbaycan prezidenti erməni əsirlərin daha bir qrupunu azad etmək vədi versə də, bu indiyədək baş verməyib. Qeyd edib ki, rəsmi İrəvan adamlardan siyasi məqsədlərlə istifadəni qınayır və Bakı əsirləri mina xəritələrinə dəyişməyə çalışarkən məhz belə davranıb: “Sonuncu dəfə Avropa İttifaqı Şurasının prezidentinin iştirakı ilə Azərbaycan prezidenti daha bir qrup erməni əsiri azad edəcəyinə söz vermişdi, lakin bu hələ baş verməyib. Daima bu prosesi müxtəlif mövzularda alver predmetinə çevirməyə cəhdlər olunur. Məncə, məsələnin humanitar tərəfini gözardı etməklə sülhdən danışmaq olmaz. Bunu praktikada göstərdik və minalanmış ərazilərin xəritəsini verdiyimizə görə ölkə daxilində ciddi tənqidlə üzləşdik. Biz əlimizdə olan xəritələri Azərbaycana verdik. Bu humanitar addımın ardınca digər humanitar addım atılmalıdır”.
Bütün bunlar bir daha Paşinyanın nə qədər siyasi oyunbaz olduğunu ortaya qoyur. Azərbaycan dəfələrlə ölkədə erməni hərbi əsirlərin olmadığını bəyan etsə də, Nikol yenə də süni şəkildə bu məsələni qızışdırmaqla diqqəti əsas məqamlardan yayındırır.
- “Paşinyan belə yalan məlumatlar verməklə diqqəti sülh sazişindən, digər həlli vacib məsələlərdən yayındırır”
Məsələyə münasibət bildirən hərbi ekspert Ramil Məmmədlinin fikrincə, Paşinyanın arqumentləri absurddur: “Əvvəla, 2020-ci il 10 noyabr üçtərəfli razılaşmaya görə, bütün əsirlər qaytarılıb. Hazırda Azərbaycanın əlində olanlar isə əsir yox, diversantdılar. Çünki onlar 10 noyabr razılaşmasını pozaraq Azərbaycan ərazisinə daxil olub təxribat törədiblər. Silahlı Qüvvələrimiz də həmin diversantları yaxalayıb. Ancaq əfsuslar olsun ki, Ermənistan əsassız şəkildə diversantları “hərbi əsir” kimi dünyaya təqdim edir. Üstəlik, ötən müddət ərzində Azərbaycan humanistlik göstərərək diversantların çoxunu qarşı tərəfə təhvil verib. Bir sıra dövlətlərin və beynəlxalq təşkilatların vasitəçiiyi ilə bu baş verib. Bunların müqabilində verilən mina xəritələrinə gəldikdə isə, onların əksəriyyəti saxta olub. Yaxşı olardı ki, Paşinyan bunlardan da danışsın. Azərbaycan dəfələrlə bəyan edib ki, verilən mina xəritələri doğru deyil. O baxımdan hesab edirəm ki, Paşinyan belə yalan məlumatlar verməklə diqqəti sülh sazişindən, digər həlli vacib məsələlərdən yayındırır”.
Hərbi ekspert onu da əlavə etdi ki, belə saxta təbliğatla Paşinyan öz planlarını reallaşdıra bilməyəcək.
Vidadi ORDAHALI
