2020-ci ilin noyabrından bəri Qarabağ separatçılarının rəhbərləri burada süni surətdə ruslaşma siyasəti aparmağa cəhdlər edirlər. 44 günlük müharibədə qondarma rus icmasını və rus kilsəsi keşişini ortaya çıxardılar, guya burada rus əhalisinin olduğuna dair görüntü yaratmağa çalışdılar. Bildiyimiz kimi, bu cəhdlərin heç bir alınmadı. Rusiya sülhməramlıları Qarabağ bölgəsinin ermənilər yaşayan hissəsində yerləşdikdən sonra isə separatçıların qol-qanadı daha da açılmağa başladı.
Rusiyanın, rus icmasının adından istifadə edərək bir sıra təxribatlar həyata keçirirlər. Son günlər Teleqram kanallarında və başqa sosial media resurslarında yayılan məlumata görə, ermənilər Ağdərə rayonunda rus mərkəzi açıblar.
Burada əsasən, rus dili tədris olunacaq, rus mədəniyyəti təbliğ ediləcək. Ermənilər iddia edirlər ki, rus mərkəzinin yaradılmasında buradakı ruslar da (yəqin sülhməramlıları nəzərdə tuturlar-İ.S) iştirak edib. Separatçılar bununla göstərmək istəyirlər ki, guya burada rus icması da yaşayır. Bildiyimiz kimi isə, Qarabağın rus icması yoxdur.
“...Erməni separatçıları Rusiyanın rəğbətini qazanmaq üçün rus mərkəzi açırlar”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə şərhində bildirdi ki, baş verənlər Rusiyanın özünün sifarişidir.
“Agdərədə Rus Mərkəzinin açılması, təbii ki, həm ermənilərin, həm də rusların maraqlarına cavab verən məsələdir. Eyni zamanda Rusiyanın da siyasətinin mahiyyətini gündəmə gətirir ki, rusların niyyəti nədir. Rusiya müəyən yerlərdə rus məktəblərinin, rus icmalarının, rus evlərinin açılmasına həmin yerlərin ona bəslədiyi münasibətin göstəricisi kimi baxırlar. Azərbaycanda bununla bağlı zaman - zaman mübahisələr olub ki, niyə bizim ölkədə rus məktəbləri fəaliyyət göstərir? Rusiya imperiyası dövlətlərin münasibətini bununla ölçür. Bu addımlar, sonuncu göstəricilərdir ki, özlərinə bununla təsəlli verirlər, bu və digər ölkələrdə rus məktəbləri var, sayları çoxdur və sair. Belə deyərdim. Ağdərədə baş verən başqa bir məsələdir. Rusiya sülhməramlıları, Rusiya regiona gəlib girib. Bu Rusiya sülhməramlılarının regionda qalmaq niyyətlərindən xəbər verir. Bilirsiz ki, Putinin 2020- ci il 10 noyabr razılaşmasından sonra açıqlaması oldu ki, Qarabağda "status kvo" saxlanılır və müəyyən müddətdən sonra o məsələyə qayıdılacaq”. A.Nağının sözlərinə görə, təbiidir ki, burada onların özlərinə məxsus planları var. O, hesab edir ki, böyük ehtimalla Rusiya hələ regiondan çıxmaq istəmir, hansısa ad altında Qarabağda qalmaq istəyir: “Bir tərəfdən deyə bilərik ki, erməni separatçıları Rusiyanın rəğbətini qazanmaq üçün rus mərkəzi açırlar. Amma istənilən halda bu ermənilərin təşəbbüsü deyil, Rusiyanın öz təşəbbüsüdür. Ermənilərin Agdərədə Rus Mərkəzi açması Rusiyanın sifarişidir, ermənilər bunu bu ölkənin tapşırığı ilə açıb.
Belə bir mərkəzin açılması ilə Rusiya münasibətini göstərir. Bilirsiz ki, Rusiya orada erməni əhali ilə xüsusi münasibətlər qurur. Ermənilərə humanitar yardımlar göndərilməsi, Qarabağda rus şəxsiyyətlərinin büstlərinin qoyulması və sair o məqsədə xidmət edir ki, burada Rusiyanın varlığını qoruyub saxlasınlar və sülhməramlılarının vaxtını uzatsınlar. Amma təbiidir ki, Rusiya yenə də müəyyən mənada gücdür, güc mərkəzidir, hesablaşmaq lazımdır. Amma həmçinin bu Rusiyanın gücsüzlüyünü göstərir ki, o bu gün özünü belə xırda məsələlərlə ovutmağa çalışır, kiçik nəticələrlə kifayətlənir.
Amma Azərbaycan bu məsələni diqqətdə saxlamalıdır və ən azından sülhməramlıların bu cür hərəkətlərinə görə Rusiya rəhbərliyindən cavab tələb etməlidir ki, siz bununla nə demək istəyirsiz? Orada nə üçün rus mərkəzi açılmalıdır? Orada Azərbaycan mərkəzi açılmalıdır. Yəni əgər arada 2020-ci il 10 noyabr razılaşması varsa proses Azərbaycanın həmin regiona qayıtması istiqamətində getməlidir. Orada Azərbaycan Mərkəzi açılmalıdır, Azərbaycan dövlətinin qanunları, atributları tətbiq olunmalıdır. Azərbaycan hakimiyyəti orada bərpa edilməlidir. O yöndə proses getməlidir. Amma rusun orada mövcudluğunun saxlanılması istiqamətində yox, Azərbaycan hakimiyyətinin orada bərpası istiqamətində getməlidir. Proses bu istiqamətdə irəliləməlidir. Görsənən isə odur ki, Rusiya razılaşmanı pozur. Azərbaycan məsələni diqqətdən yayındırmamalıdır. Rusiyanın diqqətinə çatdırmalıdır ki, siz bu prosesi yanlış istiqamətdə aparırsınız, proses razılaşdırılmış qaydalara, plana uyğun getmir. Çalışmalıdır ki, artıq həmin 10 noyabr razılaşmasına uyğun olaraq proseslər başlasın”- deyə A.Nağı bildirdi.
İradə SARIYEVA.
